Proverbs 4

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Pifakag, mmotoyilgad ko machib ko chitmangimed. Mu fal’eged e motoyil, mra tamilangan’med.

²N’en ni gu be machibnag ngomed e ba manigil, ere nge par uwan’med ni gubin.

³Nap’an ni ku gu ba’chig, ni kar gu mus e pagel ni fak e gal labthir rog,

⁴mi i machib nageg e chitmag. I yog ni ga’ar, “Mu tafeniyam ko tin gu be yog ma dariy bi’id ni ngam pagtalin. Mu rin’ e n’en kugog ma ga par ni gabfos.

⁵Nge yag ngom e gonop nge nangan’! Ma dab mu pagtalin ara mu sabalbalyang ko n’en ni gu be yog.

⁶Dab mu n’ag e gonop ya ir e ra yoror rom; mu t’ufeg me tem ni dabi buch ban’en rom.

⁷Gonop ni nge yag ngom e ireram e n’en th’abi ga’fan ni ga ra rin’. Ma tin kabay ni nge yag ngom e nangan’.

⁸Nge t’uf rom e gonop, ya ir e ra gel nigem. Mu gamuchmuch ngak, me tolang nagem.

⁹Ra mang te’elyaw rom nib gamog.”

¹⁰Fakag, mmotoyil ngog. Ngam fanay e n’en ni gu be yog ngom, me yag nim par nib n’uw nap’am.

¹¹Kugfil ngom e gonop nge rogon e par nib yal’uw.

¹²Dariy ban’en nra yib i magawonnag e kanawo’ rom ni fa’anra um man ni ga ba gonop, ma dabi tun em ko ngiyal’ ni ga be mil.

¹³Mu tay uwun’um e n’en kamfil ni gubin ngiyal’. Tin kamfil e aram e yafos rom — mu chathowliy ni bfel’ rogon.

¹⁴Dab mman u kanawo’en e girdi’ ni kireb. Dab mu falwok ko pi’in kireb.

¹⁵Ri dab mu rin’! Mu par u orel ko kireb! Mu siyeg e kireb ma ga yan ko birom e wo’

¹⁶Girdi’ nib kireb e dabi mol owcharad ni fa’anra dawor ra ngongliyed ban’en nib kireb. Dabiyag ni ngar molod ni fa’anra dawor ra gafgow niged be’.

¹⁷Tin kireb ban’en nge ma’ngach e ke mang ggan nge garbad ngorad.

¹⁸Fare pa’ i kanawo’ nma yan e girdi’ nib mat’aw u daken e bod e yal’ ni nge m’ug, ni be ga’ ra’en i yan nge mada’ ko ngiyal’ ni kari rran.

¹⁹Machane, fare pa’ i kanawo ko girdi’ ni kireb, e bod feni rumug e nep’. Bay ur dol’gad, machane dab ra guyed ko mang e be tun ayrad ngay.

²⁰Fakag, mmotoyil ko mang e gu be yog. Mu rung’ag e thin rog.

²¹Dariy e ngiyal’ ni ngam pag nge chuw u lanin’um. Mu tafnayam riy mag cha’riy u lanin’um.

²²Pi thin nem e ma pi’ e yafos mma golnag e en ma tamilangan’ riy.

²³Mmokol ayuw u rogon ni ga be leam; ya lanin’um e be duwgiliy rogon e yofos rom.

²⁴Dariy e ngiyal’ ni ngamog ban’en nde riyul’. Mu pithgem ko ban nge felfel’igun.

²⁵Mu duwgiliy e changar rom u puluwom nga m’on nib pagan’um ngom; mu pug owchem ngalang ni dab mu tamra’.

²⁶Mu fal’eg i gonpiy e n’en ni ga be rin’, ma demturug e n’en ga ra rin’ mra yib i aw nib mat’aw.

²⁷Mu pithigem ko kireb ngam man u puluwom nga m’on. Dab mu chaf nga wuru’ e wo’.