Proverbs 19

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Kabfel’ ni ga ba gafgow machane ga ba yul’yul’ ko gab sasalap l’ugun ma gab balyang.

²Pasigan’ ndariy ban’en ni yi manang e de fel’; mra dabyag ni ngam kadan’um mra fekem nga fithik’ e oloboch.

³Boch e girdi’ e yad ma gafgow niged yad ko ngongol rorad ni manan’ miyad yon’ e kireb riy nga daken SOMOL.

⁴Girdi’ nib yo’or ban’en rorad e gubin ngiyal’ ma yad ma pir’eg e pi tafager nib be’ech, machane pi’in gafgow e ku ra n’agrad e chu’uw i tafager rorad.

⁵Fa’an ga ra weliy e thin nde riyul’ u tafen e puf oloboch, ma yira gechig nagem, ndariy e gin ngam mil ngay.

⁶Gubin e girdi’ nma guy rogon ni ngar fel’gad u wan’ e pi’in tolang; ma gubin e girdi’ nma yog ni yad tafager e pi’in yad ma pi’ ban’en nib puf pa’rad ngay.

⁷En dariy ban’en rok e mus ngak e pi’in yad nga yal ma darir ta’gad ngak u ban’en; arfan ngay ni dariy be’ ni yow tafager. Ni demturug rogon feni gel ni be athmagiliy, ma dabiyag reb e fager ngak.

⁸Mu fal’eg rogom ngam fil urngin e tin rayag rom; ma aram me par u wun’um e tin kamfil mra fel’ rogom.

⁹Dariy be’ nra weliy e thin nde riyul’ u tafen e puf oloboch nrayag ni thay ko gechig; ya gafgow e nge tay.

¹⁰De mat’aw ngak e pi’in yad bbalyang ni ngar pired u fithik’ e fla’ab, ma sib e de mat’aw ni ngar gagiyeg naged e pilung.

¹¹Fa’anra gur be’ ni ga ba filmungyan’, mrayag ni ngam filan’um ko damumuw rom. Nap’an nra rin’ be’ ban’en ngom nib kireb, ma ri fel’ngin e ngam n’agfan u wun’um.

¹²Damumuw ko pilung e bod e tolul rok ba layon, machane ra felan’ ma bod e waangchol u daken ran’ e pan.

¹³Bitir ni balyang e ra girengiy e gafgow nga daken e gallabthir rok. Ma le’engin be’ nib ta pupuwan’ e bod ran ni be map’map’.

¹⁴Be’ ni pumo’on e rayag e gayog ngak ko gallabthir rok ni naun nge salpiy, machane karimus ni go’ SOMOL e ra pi’ le’engin ni be’ nib gatram.

¹⁵Mu par ni arogon ni ga ba gamead; ngu’um mmol, machane ga ra yim’ ko bilig.

¹⁶Mu tay e pi motochiyel rok Got u gil’ me n’uw nap’an ni mu par; ma fa’an ga ra fek yathin, ma ga ra yim’.

¹⁷Ga ra pi’ ban’en ngak e gafgow, ma bod ni SOMOL e ka mu pi’ ngak, ra sulweg SOMOL puluwon ngom.

¹⁸Mu fanownag pifakam ko ngiyal’ nikyad bitir ni yad be fil ban’en. Ma fa’anra dab mu rin’, me gur e kam aywegrad ni ngar kireb nagedyad.

¹⁹Fa’anra be’ nib papay e damumuw ngak, ma ga digey nge sul wenigan e tirok’ ngak. Ma fa’an ga ra ayweg ko oloboch rok ta’abyay, ma ke mdugil ni ka ga ra ayweg bayay.

²⁰Fa’anra um motoyil ko fanow me fel’ u wan’um e tin ga be fil, mra reb e rran ma ga ra gonop.

²¹Bo’or e pin’en ni be tanomnag e girdi’ u lanin’rad, machane laniyan’ SOMOL e ra aw nga rogon.

²²Ra n’en thabi ga’fan u rogon be’ e yul’yul’, ya kabfel’ e gafgow ko fel’fel’ l’ugun.

²³Mu fol rok SOMOL ma ga par nib n’uw nap’an e yafos rom, ma ga ba gaman ndariy ban’en nra buch rom.

²⁴Boch e girdi’ e kaygi gel feni gamead ni mus ko ggan ni ngar ted nga l’ugunrad ma dabiyag.

²⁵Be’ nib tolngan’ e thingar ni gechignag, ya nge yag ni fil e pi’in der nanged ban’en riy. Ma fa’anra ga ba gonop ma ga ra fil ban’en ko ngiyal’ ni yibe yal’uwegem.

²⁶En ma modyargal ko chitamngin me tuluf e chitiningin u tabnaw e be’ nib m’ayfan nib thiyar, ma bk’ar tamra’.

²⁷Fakag, fa’an ga ra tal i fil ban’en, ma dariy nap’an ma ga pag e tin gamnang.

²⁸De mat’aw ni en ni ir e mich ko thin e ke duwgiliy ni nge gafgownag be’. Girdi’ nib kireb e ba’adag lamean e kireb.

²⁹Be’ nib thogolngan’ ma bbalyang e rib muduwgil ni yira pirdi’iy.