Proverbs 8

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Mu telmed! Gonop e be pong. I Tamilangan’ e kan rung’ag laman.

²Yungin’en nib tolang nike yan e kanawo’ riy e bay riy nike sak’iy u marichlen e kanawo’, ma ku bay ko yungin’en ni madardar ko kanawo’.

³U langan e garog ngalan binaw ngu to’oben e pi garog e ke par riy be pong ni be ga’ar,

⁴“Gu be wenig ngomed e girdi’; gu be non ngak urngin e girdi’ nu fayleng.

⁵Mogned, kigimed be par ni leam ko bitir e bay romed? Mu filed rogon ni ngam leamgad ni bod e pi’lal. Mogned, kigimed bbalyang? Mu filed rogon ni ngam gonopgad.

⁶Mu telmed ko thin rog nib th’abi fel’; urngin e tin gu be yog ngomed e mmat’aw.

⁷Tin gu be yog e bariyul’; malulifith l’ugun e gu ba fanenikay.

⁸Urngin e tin gu be yog e bariyul’; dariy ban’en riy nde riyul’ ara bannag be’.

⁹Pi’in nib tamilangan’rad e btamilang gubin ban’en u wan’rad; en ni manang e pin’ey e bgagiyel ni be guy.

¹⁰Mu m’oneged u wun’med e fonow rog ko silber; ma llowan’ e nge m’on u wun’med ko gol ni th’abi fel’.

¹¹“I gag Gonop e kabpag fanag fel’ ko churwo nib tolang puluwon; dariy ban’en ni gimed ba’adag nrayag ni ngam puluw niged ngog.

¹²I gag Gonop e bay e tamilangan’ rog, bay e llowan’ rog nge rogon i duwgiliy ban’en me yan i aw ni bfel’.

¹³Ra ngan par ni bay madgun SOMOL u wun’uy, ma aram e nga ni fanenikay e tin kireb; dabug e ufanthin nge tolngan’, nge ngongol nib kireb nge thin ni yima yog nde riyul’.

¹⁴Gu ma leamnag ban’en ni nggu rin’ mu gu rin’. Bay e tamilangan’ rog, ma gu ba gel.

¹⁵Gu ma ayuweg e pi pilung ngu’ur gagiyeggad nge pi’in ma gagiyeg ngu’ur ngongliyed e motochiyel ni bfel’.

¹⁶Urngin e pi’in yad be gagiyeg u fayleng e gag e gu be ayuwegrad, ni ta’reb rogon e pi’in ma tay murung’agen e nam nge pi’in tolang.

¹⁷Ba t’uf rog e pi’in gu bt’uf rorad; en nra gayeg e ra piri’egeg.

¹⁸Pin’en ni bfel’ nge tayfan e bay u pa’ag ni gu ra pi’, nge fel’ rogon nge mon’og.

¹⁹Tin nggu pi’ ngom e kabfel’ ko tin th’abi fel’ e gol, ma kabfel’ ko silber.

²⁰Gu be yan u kanawo’en e tin nib mat’aw, ngu daken e wo’ nib yal’uw,

²¹ma gu be yo’ornag ban’en rok e pi’in gu ba t’uf rorad, ni gu be suguy e pi naun rorad ko pi machaf.

²²“I SOMOL e sunimiyeg ni th’abi som’on, ni som’on ko maruwel rok kakrom.

²³Gag e ni ngongliyeg aram ko tabolngin, aram ko som’on ndawori sum e fayleng.

²⁴Ni gargel nigeg u m’on ndawori sum e day, ko ngiyal’ ni ba’aram ndariy e pi alublub.

²⁵Ni gargel nigeg ni gu bm’on ko pi burey, ndawor ni tay e yungi ted nga tagil’rad,

²⁶u m’on ndawori sunumiy Got e fayleng nge yungi flang, ara buchu’uw ko som’on ko but’.

²⁷Gu bay me fek lanelang nge tay nga tagil’, nge ngiyal’ ni tay tan e lang nga tagil’ u daken e day,

²⁸nge ngiyal’ ni tay e manileng ngalan e lang, nge fa ngiyal’nem ni bing e pi alublub ni bay u maday,

²⁹me yog ngak e day ndabi ga’ e yilu’ nge pag e gin keyog ni ngi i mus riy. Gu bay ko ngiyal’ ni sunumiy e pi def ko fayleng.

³⁰Ug moy u to’oben ni bod be’ nib salap i muruwliy ban’en, i par ni gubin e rran ni be felfelan’ ngog, ma gubin ngiyal’ ni gu be par rok ni gub felfelan’,

³¹ni gub felfelan’ ko fayleng ma bfel’ u wun’ug e girdi’ ni bay riy.

³²“Gimed e pi’in pagel, mu telmed ngog. Mu rin’ed e tin kugog mu um pired ni gimed ba felfelan’.

³³Mu telmed ko tin ku gu fil ngomed. Ngam gonopgad nge dab mu pi’ed keru’med ngay.

³⁴En nra rung’ag e tin gu be yog e ra felfelan’, ni en nra par u langan e mab rog ni gubin e rran, ni be son u langan e mab ko naun rog.

³⁵En nra piri’egeg e ke pir’eg e yafos, ma ra i par ni bfel’ u wan’ SOMOL.

³⁶Ma en ndabi piri’egeg e ra i gafgownag ir; ma en ni be fanenikayeg e ba’adag e yam’.”