NAANAA 2:7-22

⁷Dikiri Luda gↄ̃gbɛ̃ í kàsa kũ bùsutitio, akũ à ĩa wɛ̃̀ndide vù a yĩn, akũ gↄ̃gbɛ̃ pìi gↄ̃̀ gbɛ̃ bɛ̃nɛ ũ.

⁸Dikiri Luda swadakoo kɛ̀kɛ ifãboki kpa gu kũ òdi pi Ɛdɛni, akũ à gↄ̃gbɛ̃ kũ à kɛ̀ɛ pìi dà gwe.

⁹Dikiri Luda tò lí buri sĩnda pínki bùtɛ zĩtɛ. Lí pìnↄ kɛ̀ mana, akũsↄ̃ ń nɛ́ blena nna. Lí wɛ̃̀ndide kú dàkoo pìi dagura. Lí kũ àdi dↄ̃na mana kũ a vãnio ińnɛ kú gwe dↄ.

¹⁰Swa kú Ɛdɛni àdigↄ̃ mↄtↄ pisi dàkoo pìia. Bona gwe à ↄnɛ kɛ̀ siikↄ̃.

¹¹A káaku tↄ́n Pisↄ̃, àkũ mɛ́ à lika Avila bùsuui pínki. Wura kú bùsuu pìi gũn,

¹²wuraa pì mana. Gbɛ̀ bɛ̀ɛrɛdenↄn kú gwe dↄ.

¹³Swa pì ↄnɛ plade tↄ́n Giↄ̃, à lika Kusu bùsuui pínki.

¹⁴A ↄnɛ aakↄ̃de tↄ́n Tigiri, a dↄ̀rↄↄ tà Asiria bùsu ifãboki kpa. Swa pì ↄnɛ siikↄ̃de tↄ́n Yuflati.

¹⁵Dikiri Luda gↄ̃gbɛ̃ pìi dìtɛ Ɛdɛni dàkoo pìi gũn de àgↄ̃ a zĩ kɛ àgↄ̃ gwa.

¹⁶Akũ à yã dìtɛnɛ à pì: Ĩni fↄ̃ ǹ dàkoo pì lí nɛ́nↄ ble pínki,

¹⁷ama ǹsun lí kũ àdi dↄ̃na mana kũ a vãnio ińnɛ nɛ́ blero. Tó n blè, ĩni gamɛ.

¹⁸Dikiri Luda pì: Gↄ̃gbɛ̃ kunna ado manaro. Mani kpanyĩri kɛnɛ a gbɛ̃ndo ũ.

¹⁹Akũ Dikiri Luda bùsuu sɛ̀ à nↄ̀bↄnↄ kɛ̀o pínki kũ bãnↄ pínki, akũ à sù kũńwo gↄ̃gbɛ̃ pì kĩnaa de à e deran ani tↄ́ kpáńnɛ nà. Tↄ́ kũ gↄ̃gbɛ̃ pìi kpà pↄ́ wɛ̃̀ndide pìnↄnɛ pínki gↄ̃̀ ń tↄ́ ũ.

²⁰Gↄ̃gbɛ̃ pì tↄ́ kpà bɛ pↄ́kãdenↄnɛ pínki kũ bãnↄ kũ nↄ̀bↄsɛ̃ntɛnↄ pínki, ama adi kpanyĩri e ń tɛ́ a gbɛ̃ndo ũro.

²¹Akũ Dikiri Luda i zↄ̃kↄ̃ↄ dà gↄ̃gbɛ̃ pìla. Kũ àtɛn i o, akũ à a gbã̀ntɛrɛwa mɛ̀n do bò, akũ à a mɛ̀baasi tàta a gbɛ̀n.

²²Akũ à gↄ̃gbɛ̃ gbã̀ntɛrɛwa kũ à bòo pìi lìtɛ nↄgbɛ̃ ũ, akũ à gɛ̀ɛ kãao a kĩnaa.