Text copied!
CopyCompare
Luda yã takada kũ Bisã yão - NAANAA

NAANAA 26

Help us?
Click on verse(s) to share them!
1Nàa kà bùsuu pìn a káakupↄ kũ à kà Ibrahĩ gↄrↄa baasi, akũ Isaaku fùtɛ à gɛ̀ɛ Filisitininↄ kína Abimɛlɛki kĩnaa Gera.
2Akũ Dikiri bò à sùa à pì: Ǹsun tá Misilaro, ǹ vutɛ gu kũ mani onnɛn.
3Ǹgↄ̃ kú bùsu díkĩnan gĩa, manigↄ̃ kú kũnwo mà arubarika dannɛ. Mani bùsu díkĩna kpámma pínki kũ n burinↄ, mani lɛ́ kũ ma kɛ̀ n denɛ kɛnnɛ.
4Mani n buri kara lán susunɛnↄ bà, mani bùsu díkĩna kpáḿma pínki. Buri kũ à kú zĩtɛnↄ ni arubarika le n buri gãi ń pínki
5kũ Ibrahĩ ma yã mà yãi. À ma ↄdↄki gwà, akũ à yã kũ ma dìtɛnↄ kũna kũ ma yãdannɛnanↄ kũ ma dokayãnↄ.
6Akũ Isaaku gↄ̃̀ Gera.
7Kũ wɛ̃tɛpidenↄ tɛni a la a nanↄ yã musu, à pì a dãremɛ. Àtɛn vĩna kɛ, zaakũ àtɛn da tó à pì a nanↄmɛ, oni a dɛ nↄ pì yãi, zaakũ nↄ pì bi nↄ manamɛ.
8Kũ a gↄrↄ pla kɛ̀ gwe, Filisitininↄ kí Abimɛlɛki wɛ́ kpàtɛ wondoo gũn, akũ à è Isaaku tɛn bã̀ndara gá kũ a nanↄo.
9Akũ à Isaaku sìsi à pì: Ase n nanↄmɛɛ! À kɛ̀ dera n pì n dãremɛɛ? À wèa à pì: Matɛn da oni ma dɛ a yãimɛ.
10Abimɛlɛki pì: Bↄ́ yã n kɛ̀wɛrɛ lɛɛ? Fíti mɛ́ à gↄ̃̀ kũ ó gbɛ̃ke ni wútɛ kũ n nↄ pìio, de ǹ ó da taarin.
11Akũ Abimɛlɛki gbɛ̃nↄ sã gbɛ̃̀ńnɛ pínki à pì: Gbɛ̃ kũ à ↄ nà gↄ̃gbɛ̃ pìia kũ a nanↄo, oni a dɛ.
12Isaaku pↄ́ tↄ̃̀ bùsuu pìn, akũ à pↄ́ lè wɛ̃̀ birea lɛu basↄↄro, kũ Dikiri arubarikaa dàn yãi.
13À kàra, a aruzɛkɛ tɛn kara ari à kɛ̀ aruzɛkɛde zↄ̃kↄ̃ ũ.
14À sãnↄ kũ zùnↄ vĩ dasi kũ zĩkɛrinↄ, akũ Filisitininↄ zã̀n.
15Akũ ò lↄ̀gↄ kũ a de Ibrahĩ gbɛ̃nↄ yↄ̃̀ a gↄrↄanↄ tàta kũ bùsuuo pínki.
16Akũ Abimɛlɛki pì Isaakunɛ: Ǹ futɛ ó kĩnaa, zaakũ ń gbãna deóla manamana.
17Akũ Isaaku bò gwe à bùraa kàtɛ Gera guvutɛn, akũ à gↄrↄ pla kɛ̀ gwe.
18Lↄ̀gↄ kũ ò yↄ̃̀ a de Ibrahĩ gↄrↄa akũ Filisitininↄ tàta a de ga gbɛranↄn à ɛ̀ra à bↄ̀bↄ à tↄ́ dokↄ̃nↄ kũ a de kpàńnɛ yãnↄ kpàńnɛ dↄ.

19Isaaku zĩkɛrinↄ lↄ̀gↄ pãnde yↄ̃̀ guvutɛ pìn, akũ ò bò í manaa.
20Akũ Gera pↄ́dãrinↄ fìti kɛ̀ kũ Isaaku pↄ́dãrinↄ ò pì: Ó ímɛ. Akũ à tↄ́ kpà lↄ̀gↄↄ pìinɛ Fìtii, kũ ò fìti kɛ̀ kãao yãi.
21Ò lↄ̀gↄ pãnde yↄ̃̀, akũ ò fìti kɛ̀ lↄ̀gↄↄ pì yã musu dↄ, akũ à tↄ́ kpànɛ Íbɛtɛ.
22À bò gwe, akũ à lↄ̀gↄ pãnde yↄ̃̀ dↄ, odi fìti kɛ a yã musu doro. Akũ à tↄ́ kpànɛ Mɛ̀poroki, zaakũ à pì: Dikiri tò o mɛ̀ɛ pòro, óni dagula sà.
23Abire gbɛra à gɛ̀ɛ Bɛsɛba.
24Dikiri bò à sùa gwãani birea à pì: Makũmɛ n de Ibrahĩ Luda ũ, ǹsun vĩna kɛro zaakũ má kú kũnwo. Mani arubarika dangu mà n buri kara ma zↄ̀bleri Ibrahĩ yãi.
25Gwen à sa'oki bòn à Dikiri sìsi. Akũ à bùraa kàtɛ gwe à gbɛ̃nↄ tɛn lↄ̀gↄ yↄ̃.
26Akũ Abimɛlɛki bò Gera à sù Isaaku kĩnaa kũ a kpàasi Auzao kũ a zĩ̀karinↄ gbɛ̃ zↄ̃kↄ̃ Fikↄluo.
27Isaaku ń lá à pì: Kũ a zãmagu a pɛma á bɛa, à kɛ̀ dera a su ma kĩnaa?
28Ò wèa ò pì: O è Dikiri kú kũnwo, akũ o pì à mana ò lɛ́dokↄ̃nↄ kɛ ò la dakↄ̃nɛ a yã musu
29kũ ĩni yã vãni ke kɛwɛrɛro, zaakũ ódi wɛ́ tãmmaro. Yã manan o kɛ̀nnɛ o n gbarɛ aafia, akũ Dikiri arubarikaa dàngu.
30Akũ Isaaku ń yàrii kɛ̀, ò pↄ́ blè ò í mì.
31Kũ ò fùtɛ kↄnkↄ, ò la dàkↄ̃nɛ, akũ Isaaku zɛ̀ńnɛ, ò bò a kĩnaa aafia.
32Zĩ birea Isaaku gbɛ̃nↄ sù ò lↄ̀gↄ kũ ò yↄ̃̀ yã ònɛ ò pì: O í è.
33Akũ à tↄ́ kpànɛ Sɛba. A yã mɛ́ à tò òdi wɛ̃tɛ pì sísi Bɛsɛba ari kũ a gbãrao.
34Kũ Isau kà wɛ̃̀ bupla, à Iti nↄ sɛ̀ mɛ̀n pla, Beri nɛ́ Yudi kũ Ɛlↄni nɛ́ Basɛmao.
35Isaaku kũ Rɛbɛkao nɛ̀sɛɛ dìgↄ̃ yakana ń yãimɛ.