1Mlɛ̃̀ mɛ́ à manafiki vĩ de pↄ́ kũ Dikiri Luda kɛ̀nↄla pínki, akũ à nↄgbɛ̃ là à pì: Luda pì àsun dàkoo pì lí ke nɛ́ blenloo?
2Akũ nↄgbɛ̃ wè mlɛ̃̀ɛ pìia à pì: Óni fↄ̃ ò dàkoo pì línɛ ble,
3ama lí kũ à kú dàkoo pìi guragura, Luda pì òsun a nɛ́ blero òsun ↄ naa sero, de òsun garo yãi.
4Akũ mlɛ̃̀ɛ pìnɛ: Áni garo fá!
5Zaakũ Luda dↄ̃ tó a blè, á wɛ́ ni kɛ̃ áni gↄ̃ lán a bà, ánigↄ̃ a mana dↄ̃ kũ a vãnio.
6Kũ nↄgbɛ̃ è lí pì nɛ́ mana, akũsↄ̃ a blena nigↄ̃ nna ani tó gbɛ̃ wɛ́ kɛ̃, akũ à a nɛ́ kɛ̃̀ à blè. À kpà a zãa dↄ, akũ à blè se.
7Ń pla ń pínki ń wɛ́ kɛ̃̀, akũ ò dↄ̃̀ sà kũ ò kun pótompo. Akũ ò gboroda lá nàbi ò yĩ̀ḿma.
8Kũ gↄ̃gbɛ̃ kũ a nanↄo Dikiri Luda kĩni mà àtɛn kure dàkoo pìi gũn ↄkↄsi, akũ ò ùtɛnɛ dàkoo pì lán.
9Akũ Dikiri Luda lɛ́ zù gↄ̃gbɛ̃i à pì: Ń kú mámɛɛ?
10À wèa à pì: Kũ ma n kĩni mà, akũ vĩna ma kũ kũ má kun pótompo yãi, akũ ma utɛ.
11Akũ Dikiri Luda a là à pì: Dí mɛ́ à ònnɛ ń kun pótompoo? Lí kũ ma ginnɛ ǹ a nɛ́ ble, n blèn yá?
12À wèa à pì: Nↄgbɛ̃ kũ n kpàma àgↄ̃ kú kũmao mɛ́ à lí pì nɛ́ kpàma ma blè.
13Akũ Dikiri Luda nↄgbɛ̃ là à pì: Bↄ́yãi n kɛ̀ lɛɛ? À wèa à pì: Mlɛ̃̀ mɛ́ à ma kɛkɛ, akũ ma blè.
14Akũ Dikiri Luda pì mlɛ̃̀ɛnɛ: Kũ n kɛ̀ lɛ, ĩnigↄ̃ láaribona pↄ́ ũ de bɛ pↄ́kãdenↄ kũ nↄ̀bↄsɛ̃ntɛnↄla pínki, ĩnigↄ̃ táa o n kùua, bùsutitin ĩnigↄ̃ ble ari n wɛ̃̀ndi lɛ́n.
15Mani ibɛrɛ da mↄkↄ̃n kũ nↄgbɛ̃o dagura, n buri kũ a burio dagura. A buri ni n mì wí, ĩni a gbátoki kĩnna.
16Akũ à pì nↄgbɛ̃nɛ: Mani n nↄ̀sinaa wari karannɛ, ĩnigↄ̃ nɛ́ i kũ wãwão. N zã ni nigↄ̃ kúmmamɛ, anigↄ̃ kí ble n musu.
17Akũ à pì gↄ̃gbɛ̃nɛ: Lákũ n n nanↄ yã mà nà, lí kũ ma ginnɛ ǹ a nɛ́ ble n blè, ma láari bò zĩtɛa n yãi, ↄsi kũ ↄsioon ĩnigↄ̃ pↄ́ble en ari n wɛ̃̀ndi lɛ́n.
18Ani lɛ̀nↄ kũ lá ũkãdenↄ butɛnnɛ, gbasa ǹ burapↄnↄ ble.
19Ísimmawaranaa gũnn ĩni pↄ́ble en ari ǹ ɛra ǹ gɛ̃o bùsun, zaakũ gwen ma n bon. Bùsutitimɛ n ũ, ĩni ɛra ǹ gↄ̃ bùsutiti pìi ũmɛ.
20Adamu tↄ́ kpà a nanↄnɛ Awau, zaakũ gbɛ̃ pínki daimɛ.
21Dikiri Luda bára uta kɛ̀ Adamunɛ kũ a nanↄo, akũ à dàńnɛ.
22Akũ à pì: Bisãsiri a mana kũ a vãnio dↄ̃̀ sà, à gↄ̃̀ lán ó bà. Óni gínɛ à lí wɛ̃̀ndide nɛ́ kɛ̃ à ble de àsungↄ̃ kun gↄrↄ sĩnda pínkiro yãi.
23Akũ Dikiri Luda pɛ̀a à a bò Ɛdɛni dàkoo pìi gũn. Akũ Adamu gɛ̀ɛ à zĩtɛ kũ Luda a bòn zĩ kɛ.
24Kũ Dikiri Luda pɛ̀a, akũ à kɛrubunↄ kàtɛ Ɛdɛni dàko ifãboki kpa, de ògↄ̃ lí wɛ̃̀ndide zɛ́ dãkpã kũ fɛ̃nɛda kũ àtɛn tɛ́ kɛ àtɛn litɛlitɛo.
