Mphattuwelo 2:7-22

⁷Vano Apwiya Nluku yahomuumpa ntthu ni ntthupi notthaya ni yahommucelela mphulani iphumu cookumi, ni ntthu ule ahothatuwa nkumi.

⁸Vaavale, Apwiya Nluku yahopanka iluwani yo Eeteni yaari mphantte unkela ncuwa, ni yahomweesa ntthu yampankilyaya.

⁹Wahoolo, Apwiya Nluku yahomeliha itthaya yothene miri co khula nnanna, cooreera wa miithoni ni coociva ulya. Ni wariyari iluwani wahaawo mwiri wookumi ni mwiri nkina uncuweliha yooreera ni yoonanara.

¹⁰UEeteni wahophattuwa mooloko waamicera iluwani. Ni uhoolo nwo wahekawanihaca nuukhala myoloko micese.

¹¹Mooloko woopacera uyo uneehaninya Pisomi. Uvinre ilapo yothene yo Havila, uri iwooru.

¹²Iwooru yo yeeyo ilapo iyo iri yooreera; ciicammo, wonwo haawo lumpani ni maluku ocaayira.

¹³Wonayeeli uvinre ilapo yothene yo Kuusi uneehaninya Kihoni.

¹⁴Woneeraru uvinre mphantte unkhuma ncuwa weemelaka ilapo yo Usiiriya, uneehaninya Tikire; ni woneecese uneehaninya Ufarati.

¹⁵Apwiya Nluku yahomweesa ntthu iluwani yo Eeteni wiira awehawehe ni alime.

¹⁶Vano Apwiya Nluku yahonlamulela ntthu yiiraka: Ulyeeke wootthunawaa mihokorokho cothene ciri nluwani mmo,

¹⁷nanso uhilye nhokorokho wo mwiri uncuweliha yooreera ni yoonanara, kontha nihuku ninhalaa ulya, khweeli unaakhwa.

¹⁸Wahoolo, Apwiya Nluku yahoolumaca yiiraka, khawanreera nlopwana ukhala veekha. Kinaampankela oonkavihera wiira amwiiwanane.

¹⁹Vano noompileene itthaya ni inama cothene co ntakhwani, ni asaanuni othene ooculu, Apwiya Nluku yahomwiihera nlopwana ule, wiira amoone caahalawe wiihana, ni wo khula ncina nivahilyawe nlopwana, khula itthu yoomumula, nenno phiri ncina naya.

²⁰Phimaana nlopwana ule hovaha macina mihuwo cothene, asaanuni ooculu ni inama cothene contakhwani. Nanso Attamu khaaphwannye oonkavihera wiira amwiiwanane.

²¹Vano Apwiya Nluku yahonvaha ikhove cinci nlopwana ule, ni waarupawe vaa yahonkumiha niparari nimoca nuuttiya nenno nipuro nno ni ithayi.

²²Niparari nakumihiyawe nlopwana ule, Apwiya Nluku yahompanka nthiyana nunrwehela nlopwana.