1Abire gbɛra Dikiri yã ò Abramunɛ wɛ́gupu'enaa gũn à pì: Abramu! Ǹsun vĩna kɛro. Makũmɛ n sɛ̃gbako ũ, n láada nigↄ̃ zↄ̃kↄ̃ manamana.
2Akũ Abramu pì: Dikiri Luda, bↄ́n ĩni ma gbaa? Má nɛ́ vĩro. Damasuku gbɛ̃ Ɛliɛza mɛ́ anigↄ̃ de ma bɛ túbibleri ũ.
3Kũ ńdi ma gba nɛ́ro, ma bɛ zĩkɛri pì mɛ́ anigↄ̃ de ma túbibleri ũ.
4Akũ Dikiri pìnɛ: Àpi mɛ́ anigↄ̃ de n túbibleri ũro. Nɛ́ kũ ani bo n wóplɛn mɛ́ anigↄ̃ de n túbibleri ũ.
5Akũ à bò kãao bàai à pì: Ǹ musu gwa ǹ susunɛnↄ naro, tó ĩni fↄ̃. Lɛmɛ n burinↄ nigↄ̃ de lɛ.
6À Dikiri náani kɛ̀, akũ Dikiri tò yã bò kãao nna a náani kũ à kɛ̀ yãi.
7À pìnɛ dↄ: Dikirimɛ ma ũ, makũ mɛ́ ma n bo Uru, Kaladia bùsun, de mà bùsu díkĩna kpámma yãi.
8Akũ Abramu pì: Dikiri Luda, deran manigↄ̃ dↄ̃ kũ anigↄ̃ de ma pↄ́ ũu?
9À wèa à pì: Ǹ zùnunu wɛ̃̀ aakↄ̃ sɛ́ kũ blè wɛ̃̀ aakↄ̃o kũ sãkaro wɛ̃̀ aakↄ̃o kũ potɛ̃nɛtɛ̃nnao kũ lukulukuuo.
10Akũ à pↄ́ pìnↄ sɛ̀ à sùo pínki à pàrapara à gògokↄ̃a, akũ à kàtɛ à ń arɛ dↄ̀dↄkↄ̃a, ama adi bãnↄ parapararo.
11Kũ yumburukunↄ sù ò dìdi nↄ̀bↄↄ pìnↄa, akũ Abramu pɛ̀ḿma.
12Kũ ifãntɛ̃ tɛn gɛ̃ kpɛ́n, i zↄ̃kↄ̃ Abramu kũ̀, akũ gusira zↄ̃kↄ̃ vĩnade dàala.
13Akũ Dikiri pìnɛ: Ǹgↄ̃ dↄ̃ kũ n burinↄ nigↄ̃ nibↄ ble bùsu kũ à de ń pↄ́ ũro gũn, onigↄ̃ zↄ̀ ble gwe, onigↄ̃ wɛ́ tãḿma ari wɛ̃̀ wàa pla.
14Ama mani wari dↄ buri kũ òtɛn zↄ̀ bleńnɛa, n burinↄ ni bↄtɛ kũ aruzɛkɛ zↄ̃kↄ̃ↄo.
15Mↄkↄ̃n sↄ̃, ĩnigↄ̃ aafiamɛ ari ǹ gɛ́ zĩ kũo, gbasa ǹ ká n dizinↄla oni n vĩ.
16N nasionↄ mɛ́ oni ɛra ò su la, zaakũ Amↄrinↄ durunna dí papa kↄ̀ro.
17Kũ ifãntɛ̃ gɛ̃̀ kpɛ́n, gu sì, akũ Abramu è kĩni kũ àtɛn túsukpɛ bo kũ sɛ̃̀tɛo tɛn gɛ̃ nↄ̀bↄ kũ à pàrapara pìnↄ dagura.
18Zĩ birea Dikiri pì a bàka nigↄ̃ kú kũ Abramuo à pì: Mani bùsu díkĩna kpá n burinↄa zaa Misila bùsu lɛ́zɛki swai ari swada kũ òdi pi Yuflati,
19bùsu kũ Keninↄn kun kũ Kenizinↄ kũ Kadamↄnunↄ
20kũ Itinↄ kũ Pɛrizinↄ kũ Rɛfaimunↄ
21kũ Amↄrinↄ kũ Kanaanↄ kũ Gigasinↄ kũ Yebusinↄo.
