1Akũ Dikiri pì Nuhunɛ: Ǹ gɛ̃ gó gũn kũ n bedenↄ, zaakũ mↄkↄ̃mmɛ ma n e yãnnade ũ gbãragbɛ̃nↄ tɛ́.
2Ǹ nↄ̀bↄ kũ à de sa'opↄ ũnↄ sɛ́ ǹ gɛ̃ kũńwo da kũ a sàao mɛ̀n supplapla, ǹ nↄ̀bↄ kũ òdi sa ooronↄ sɛ́ mɛ̀n plapla da kũ a sàao.
3Ǹ bãnↄ sɛ́ ǹ gɛ̃ kũńwo dↄ da kũ a sàao mɛ̀n supplapla de ń burinↄ gↄ̃ kú andunia gu sĩnda pínkia.
4Zaakũ gↄrↄ suppla gbɛra mani tó legũ ma zĩtɛ ari gↄrↄ bupla fãnantɛ̃ kũ gwãanio, de mà pↄ́ wɛ̃̀ndide kũ ma kɛ̀nↄ wara zĩtɛ pínki.
5Nuhu yã kũ Dikiri ònɛɛ kɛ̀ pínki.
6Gↄrↄ kũ í dà anduniala, Nuhu kun wɛ̃̀ wàa aakↄ̃mɛ.
7À gɛ̃̀ gó'itɛ gũn kũ a nɛ́nↄ kũ a nanↄo kũ a nɛ́nↄ nↄnↄo de ò bo í pì yãn.
8Akũ nↄ̀bↄ kũ ò de sa'opↄ ũnↄ kũ nↄ̀bↄ kũ òdi sa ooronↄ kũ bãnↄ kũ pↄ́ kũ òdi táa o kũ kùaonↄ
9sù Nuhu kĩnaa gó gũn mɛ̀n plapla da kũ a sàao lákũ Luda ònɛɛ nà.
10Gↄrↄ suppla gbɛra í da pìi dà anduniala.
11Nuhu wɛ̃̀ wàa aakↄ̃de gũn a mↄ plade gↄrↄ gɛ̃ro awɛɛplade zĩ, akũ í kũ à kú zĩtɛ gbárunↄ pũ̀tã pínki, akũ ludambɛ guforonↄ fↄ̃̀.
12Legũ mà ari gↄrↄ bupla fãnantɛ̃ kũ gwãanio.
13Gↄrↄ birea Nuhu gɛ̃̀ gó gũn kũ a nɛ́nↄ Sɛmu kũ Hamuo kũ Yafɛtio kũ api nanↄo kũ a nɛ́nↄ nↄnↄ gbɛ̃nↄn aakↄ̃,
14kũ nↄ̀bↄsɛ̃ntɛnↄ pínki ń buria kũ bɛ pↄ́kãdenↄ pínki ń buria kũ pↄ́ kũ òdi táa o kũ kùaonↄ pínki ń buria kũ pↄ́ vurananↄ pínki ń buria, bãnↄ kũ pↄ́ dɛ̀mbɛrɛdenↄ pínki.
15Pↄ́ kũ òdi wesa bonↄ sù Nuhu kĩnaa gó gũn buri kũ burio mɛ̀n plapla.
16Pↄ wɛ̃̀ndidenↄ buri pínki gɛ̃̀ da kũ a sàao lákũ Luda dìtɛnɛ nà. Akũ Dikiri gbà tàtańlɛ.
17Legũ mà ari gↄrↄ bupla. Kũ í tɛn kara, akũ à gó pìi sɛ̀ zĩtɛla.
18Í fùtɛ à kàra manamana à dà zĩtɛla, akũ gó pì fù íla.
19Í kàra à dà zĩtɛla lái, à dà kpi lei kũ ò kú andunia gũnnↄla míↄmiↄ.
20Í fùtɛ à dà kpi pìnↄla ari gã̀sãkuru gɛ̃ro.
21Pↄ́ wɛ̃̀ndide kũ òdi táa o zĩtɛnↄ gàga pínki, bãnↄ kũ bɛ pↄ́kãdenↄ kũ nↄ̀bↄsɛ̃ntɛnↄ kũ pↄ́ kũ òdi táa o kũ kùaonↄ kũ bisãsirinↄ ń pínki.
22Pↄ́ kũ òdi wesa bo kũ ò kú sĩ̀sĩanↄ gàga pínki.
23Luda pↄ́ wɛ̃̀ndide kũ ò kú sĩ̀sĩanↄ kàkatɛ pínki. À bisãsirinↄ kũ nↄ̀bↄnↄ kũ pↄ́ kũ òdi táa o kũ kùaonↄ kũ bãnↄ kàkatɛ andunia gũn. Nuhu mɛ́ à bò ado kũ pↄ́ kũ ò kú kãao gó gũnnↄ.
24Akũ í gↄ̃̀ da anduniala ari gↄrↄ basuppla akuri.
