Vuivuni 2:7-22

⁷Ma Yahweh God te gonia na tinoni, nia na pughu ni pari. Me aheahe savua nia na aheahe ni vola tana ihuna, mana tinoni te loghoa na vola.

⁸Keri ke Yahweh God te suba na leghai Eden iulu, me talua iga na mane te gonia.

⁹Ma Yahweh God te subai na lei vata ni ghai tana leghai - te ghaugharugha, mana vangani te manilu. Mi ghobuna na leghai te talua na ghai ni vola, mana ghai ni manahana na uto mana dika.

¹⁰Na betitina te tave horu tana leghai Eden, me ke vulia na leghai, me vokai gaa e vati na base ni beti tina.

¹¹Sakai tadira na base i Pishon, te tave talighutia na butonikomu i Havilah, te ghaha iga na gold.

¹²Na gold keri te uto me marabu. Mi ga ko topoa ghua na vatu utoutoa na ahana onyx, mara loghoa na ghaiuruuru tara holoa nia bdellium.

¹³Na ruani na basena i Gihon, te tave talighutia na butonikomu i Cush.

¹⁴Na toluni na basena Tigris, te tave talighutia ilevu uluna Asshur. Me vatini na basena Euphrates.

¹⁵Ma Yahweh God te talua na tinoni tana leghai Eden, ge ke vatoghaa.

¹⁶Ma Yahweh God te talua vania na bosa pungisi, “Ko tangomana so na ghaniani na lei vuavuani na lei ghai tana leghai eni.

¹⁷Hauva, mo ko bei ghania gea na vangana na ghai ni manahana na uto mana dika. Ke vagha ko ghania na vavangana ke, tana bongi keri ko mate.”

¹⁸Keri ke, Yahweh God te bosa, “E mua uto ge ke ghana heghena na mane. Inau ku gonia na dolana te ulaghana ge ke hangaa.

¹⁹Keri ge Yahweh God te gonighi na lei vata ni maumanu mana manu, nia na pari. Me holara vania mai na mane ge ke talu ahadira. Mana mane te vatuahana sasakai tadira.

²⁰Keri ke na mane te talu ahadira na lei maumanu dolo, mana lei manu soko, mana maumanu asi ghua. Hauva me mua sodoa na dolana te ulaghana ke kabu kolua me ke hangaa.

²¹Keri ge Yahweh God te nea Adam me maturu mate, me sipa keha sakai na huli kakasana, me mavo olia na bona te lavikeha iga.

²²Ma Yahweh God te gonia na vaivine nia na huli kakasana na mane, me lavia vania mai.