1Nuhu kũ nↄ̀bↄsɛ̃ntɛnↄ kũ bɛ pↄ́kãde kũ ò kú kãao gó gũnnↄ pínki yã dↄ̀ Ludan. Kũ à ĩa gbàrɛ zĩtɛa, akũ í nà babanaaa.
2Í kũ ò kú zĩtɛ gbárunↄ kũ ludambɛ guforonↄ tàta, akũ legũ kɛ̃̀.
3Í pì tɛn baba busɛbusɛ àtɛn lago ari gↄrↄ basuppla akuri.
4A mↄ supplade gↄrↄ gɛ̃ro awɛɛplade zĩ gó pìi dì kpi kũ òdi pi Ararataa.
5Í pì tɛn lago ari mↄ kuride gũn. Mↄ kuride pì gↄrↄ káaku zĩ kpinↄ mìsↄ̃ntɛnↄ bòbo.
6Gↄrↄ bupla gbɛra Nuhu gó wondo kũ à bòn yã wɛ̃̀,
7akũ à kãakãanna gbàrɛ. Àtɛn vura àtɛn gɛ́ àtɛn su ari í bàba zĩtɛa.
8À potɛ̃nɛ gbàrɛ dↄ de à le à dↄ̃ tó í làgo zĩtɛa.
9Kũ potɛ̃nɛ dí diki lero, akũ a ɛ̀ra à sù Nuhu kĩnaa gó gũn, zaakũ í da anduniala pínkimɛ. Nuhu ↄ bò à a kũ̀ à gɛ̃̀o gó gũn.
10À kámma bò ari gↄrↄ suppla, akũ à ɛ̀ra à potɛ̃nɛ gbàrɛ dↄ.
11Potɛ̃nɛ pìi ɛ̀ra à sù à kĩnaa ↄkↄsi à kù lá kɛ̃̀ à kpá a lɛ́i. Akũ Nuhu dↄ̃ kũ í làgo zĩtɛa.
12À kámma bò gↄrↄ suppla dↄ, akũ à ɛ̀ra à potɛ̃nɛ pìi gbàrɛ, adi ɛra à sù a kĩnaa doro.
13Nuhu wɛ̃̀ wàa aakↄ̃ awɛɛdode gũn a mↄ káaku gↄrↄ káaku zĩ, í bàba zĩtɛa, akũ à gó pìi musu gò. Kũ à gu gwà, à è í làka zĩtɛa.
14A mↄ plade gↄrↄ baraasↄↄro awɛɛplade zĩ í bàba zĩtɛa.
15Akũ Luda yã ò Nuhunɛ à pì:
16Ǹ bo gó gũn kũ n nanↄo kũ n nɛ́gↄ̃gbɛ̃nↄ kũ ń nↄnↄo.
17Ǹ pↄ́ wɛ̃̀ndide kũ ò kú kũnwonↄ bↄtɛ pínki, bãnↄ kũ nↄ̀bↄnↄ kũ pↄ́ kũ òdi táa o kũ kùaonↄ pínki, de ò fãkↄ̃a zĩtɛ ògↄ̃ nɛ́ i ògↄ̃ kara andunia gũn.
18Akũ Nuhu bò kũ a nɛ́nↄ kũ a nanↄo kũ a nɛ́ pìnↄ nↄnↄo.
19Nↄ̀bↄnↄ pínki kũ pↄ́ kũ òdi táa o kũ kùaonↄ pínki kũ bãnↄ pínki kũ pↄ́ kũ òdi táa o zĩtɛnↄ pínki bↄ̀tɛ gó gũn buri kũ burio.
20Akũ Nuhu Dikiri gbagbaki bò. À nↄ̀bↄ kũ bã kũ òdi sa oonↄ kũ̀, akũ à sa'opↄ kũ òdi ká tɛ́n à tɛ́ kũ òa.
21Kũ Dikiri a gbĩ mà, à kɛ̀nɛ nna, akũ à laasun lɛ̀ à pì: Mani ɛra mà láari bo zĩtɛa bisãsiri yãi doro, zaakũ bisãsiri laasun dìgↄ̃ vãni zaa a kɛfɛnnakɛgↄrↄamɛ. Mani ɛra mà pↄ́ wɛ̃̀ndidenↄ kakatɛ lákũ ma kɛ̀ nà doro.
22Ari andunia gɛ́ àgↄ̃ kunwo pↄ́tↄ̃na kũ pↄ́kɛkɛnaao, ĩa kũ guwãnao, bunsirɛ kũ sakareo, fãnantɛ̃ kũ gwãanio, ń ke ni lákaro.
