Jenesis 2:7-22

⁷Ano badeh Laban Kindrei rawi ndren eme loken, ano iy amwekes ndramak na aliy; ano badeh iy aluhi kohan handru i no-on ma ndramak dah asahan awas.

⁸Ano badeh Laban Kindrei mwesekei bilin nyaran Iden udu loboho an eme loken. Ano badeh iy tiye ndramak nane, iy mwesekei dah udu aliy ai.

⁹Iy badeh mwesekei saba kei mwasin badeh ateh udu aliy ma edeu salin. Eme udu alih ta bilin badeh kei lu-ei le, kei doh ta edeu koham winiyan bano bwe. Ma kei ale ta edeu tanan ndra-in ma tanan mwasin.

¹⁰Ma gwa rawa badeh arorou, udu bolo Iden ta edeu gwa i ta bilin; ano udu doh badeh, apou i handra.

¹¹Gwa rawa ma bwena eh, badeh aloh gwa Pison, badeh arorou awudi kon munyak aloh nyaran Habilah.

¹²Ya bek nyikilikin aloh gol badeh, udu aliy ma kei ta suluw badeh udu aliy ma hawe bek mwasin mwasin badeh udu aliy ale.

¹³Ya andra gwa rawa ja aloh gwa Gihon; badeh arorou awudi kon munyak aloh Kus.

¹⁴Ano andra gwa taloh badeh gwa Taigres; iy badeh arorou loboho an eme loken ta kon Aseriya. Ano andra gwa hahuw badeh nyaran gwa Yupretis.

¹⁵Ano badeh Laban Kindrei atehei ndramak nane udu bilin loboho kon Iden ta iy kinyor ma iy katondrok.

¹⁶Ano iy tiye i tan, “Ou badeh winiyan aimon buwa kei mari badu bolo bilin;

¹⁷Arile kei ala ta leheya tanan ndra-in ma ta leheya tanan mwasin badeh ou saimon buwan ndri-i labai. I buku na len ou aniy kameh, ou kameh amak.”

¹⁸Ano Laban Kindrei lomondra i buku doh, “Ei, bamwenen se bwe, i buku ndramak udu ya iy badeh le ari le. Jo kamwesekei ari seben mwasin ta aseben iy.”

¹⁹Eme iy andrei ndren eme, ano iy mwesekei iri katin haka mari ma hawe iri sirih. Ano badeh iy tukumwi iri ase ala hawe i ndramak nane dah ta iy katondrohan nyara iri.

²⁰Eme ma iy tondrohani nyara iri sirih mari ma hawe iri katin haka mari; arile ari toro badeh mwasin ta asahan borobwar tan bwe.

²¹Ano ja badeh Laban Kindrei badeh mwesekei ndramak dah amadin tuk; eme iy i ndramatinou kahis le badeh iy andrei ndruwi kabeden ari. Ano iy lowosani odan i hamon ja.

²²Eme iy mwesekei badih dah nane na ndruwi kabede ndramak dah ano sirini iy ili hawen.