Kini Pieke 2:7-22

⁷Kutupa mo Tekehali Koda꞉ma꞉ta꞉ kenkena꞉ dokolo mea hali au laa wepiata꞉ ipika꞉ mineke pa꞉ta꞉ta꞉ mo da꞉ta꞉la꞉eki hala꞉la꞉ pomo po lo pambeeke handaata꞉ mo halita꞉ tiao da꞉taa hayekeme.

⁸Kutupa mo Tekehali Koda꞉ma꞉ta꞉ mo nate opa꞉la꞉ nane wieke Ideni kenke pa꞉ta꞉ e pokaata꞉ mo hande wepieke hali koto e pa꞉ta꞉ haena꞉ leekeme.

⁹Koda꞉ma꞉ koto e pa꞉ta꞉ta꞉ mo ta꞉ta꞉ ta꞉ta꞉ piki epeke au leke timanu opaota꞉ epeke ti potekemanu eiyaeyekeme. Koto e tukikina꞉ta꞉ mo da꞉ta꞉la꞉eki kita꞉la꞉ ti make mo epeke hau pita꞉la꞉eki pita꞉ hoke hau pita꞉la꞉eki yaapona꞉ hone u tiaasa꞉ ti make hayekeme.

¹⁰Mo Ideni e pa꞉ta꞉ta꞉ yopulu hala꞉ ikali ma꞉nda꞉ma꞉ mo e ikali halo hayekeme. Mo ikalita꞉ Ideni mo pate leketa꞉ ata꞉ka꞉ tonkopu piekeme.

¹¹Mo titina꞉ ikalita꞉ Pisoni ikalie. Ipikita꞉ mo Ha꞉pila kenke popei yao yapeekeme.

¹²Mo ala꞉ta꞉ ma꞉nda꞉ na ta̱leke kolo make totopo piki weta꞉ make seliapo piki toopimanu make koto pa꞉ta꞉ handa꞉peke ya꞉la꞉me.

¹³Mo yaapo peao ikalita꞉ Kioni ikalie. Ipikita꞉ mo Kusu kenke popei yao yapeekeme.

¹⁴Mo tepo peao ikalita꞉ Taikitisi ikalie. Ipikita꞉ mo A꞉sitia kenkena꞉ nate opa꞉la꞉ nanema꞉ yapeekeme. Kutupa mo tonko peao ikalita꞉ Yupoteitisi ikalie.

¹⁵Kutupa Tekehali Koda꞉ma꞉ mo hande halita꞉ Ideni e pa꞉ta꞉ yu lia handeteke haena꞉yeke hawayekeme.

¹⁶Koda꞉ma꞉ ipiki pa꞉ta꞉ alota꞉ Mo ena꞉ hala꞉ ti poteke paeyaota꞉ napeke ya꞉la꞉pateta꞉

¹⁷mo epeke hau pita꞉ hoke hau pita꞉la꞉eki yaapona꞉ hone u tiaasa꞉ ti poteke homeke homeke dia꞉me. Mo koto tina꞉ poteketa꞉ ota꞉ na napeke laata꞉ Neka꞉na꞉ta꞉ kota꞉ mo nelipi natena꞉ kone homilipikie laa leekeme.

¹⁸Kutupa mo Tekehali Koda꞉ma꞉ alota꞉ Mo hali ipika꞉ siki hata꞉ta꞉ hoela꞉me. I̱ma꞉ta꞉ ipiki tamba꞉ mina꞉ ota꞉ epeke ta꞉ma꞉ni ma꞉nda꞉ wepulueke laa leekeme.

¹⁹Koto ekina꞉ta꞉ Koda꞉ma꞉ mandane dokolomanu mea hoteke paeyao make ba paeyao make wepiekeme. Kutupa ipikana꞉ma꞉ mo alemanu mo halima꞉ handaa biki loma꞉ loma꞉ pina꞉ yeke hatuku epeekeme. Kotota꞉ ika꞉ hande biki mimiki tupa꞉e.

²⁰Koto ekina꞉ mo halima꞉ta꞉ mo bamanu paeyao make hotekemanu paeyao make biki hale hale piekeme. Pate koto ale manuta꞉ ota꞉ ma꞉nda꞉ hondo ipiki tamba꞉ mea꞉peke ta꞉ma꞉ni ma꞉nda꞉ na hayekeme.

²¹Koto ekina꞉ mo Tekehali Koda꞉ma꞉ta꞉ mo hali u̱ yoka꞉lupa pena꞉ leekeme. Kutupa u pelia haena꞉ta꞉ Koda꞉ma꞉ mo halina꞉ pa꞉ta꞉liki homeke ma꞉nda꞉ ipila꞉ mea mo loke a꞉mbaeyekeme.

²²Koda꞉ma꞉ta꞉ koto pa꞉ta꞉likima꞉ta꞉ wanda꞉ wepia mo hali pa꞉ta꞉ hatuku epeekeme.