1Sara kɛ̀ wɛ̃̀ basuddo awɛɛsuppla,
2gbasa à gà zaa Kiriataba kũ òdi pi tera Ɛblↄnu, Kanaanↄ bùsun. Akũ Ibrahĩ a wɛ̃nda kɛ̀ à ↄ́ↄ dↄ̀ a gana yã musu.
3Kũ à gò a nanↄ gɛ̀ kĩnaa, à gɛ̀ɛ à pì Iti burinↄnɛ:
4Nibↄ kũ gbɛ̃ zĩ̀tↄↄon ma ũ á tɛ́. À zĩtɛ yíama ma gɛ̀vĩki ũ mà gɛ̀ vĩn.
5Akũ Iti burinↄ pìnɛ:
6Mare, ǹ ó yã ma. Luda gbɛ̃ arubarikademɛ n ũ ó tɛ́. Ǹ n gɛ̀ vĩ gbɛ̀wɛɛ kũ à kɛ̀nnɛ mana gũn. Ó gbɛ̃ke ni n tɛ̃ gbɛ̀wɛɛ kũ ĩni n gɛ̀ vĩ a gũnlo.
7Akũ Ibrahĩ fùtɛ à kùtɛ bùsupidenↄnɛ
8à pìńnɛ: À ma yã ma, tó a we mà a gɛ̀ vĩ la. À wɛ́ kɛmɛnɛ Zoa nɛ́ Ɛflↄnua
9à Makpɛla gbɛ̀wɛɛ kũ à kú a bú lɛ́i yíama a ↄgↄa, ani gↄ̃ ma gɛ̀vĩki ũ á bùsun.
10Ɛflↄnu vutɛna ń tɛ́ a wɛ̃tɛ bĩnilɛa gwe, akũ à ò Ibrahĩnɛ Itinↄ wára ń pínki à pì:
11Oi mare, ǹ ma yã ma. Ma n gba bura pì kũ gbɛ̀wɛɛ kũ à kú gweo. Ma n gba ma gbɛ̃nↄ wára. Ma n gbamɛ, de ǹ n gɛ̀ vĩn.
12Ibrahĩ kùtɛ bùsupidenↄnɛ,
13akũ à pì Ɛflↄnunɛ ń pínki wára: Ǹ sã kpá ǹ ma yã ma. Mani bura pì fĩna bonnɛ. Ǹ ma ↄgↄ sí, mani ma gɛ̀ vĩn.
14Akũ Ɛflↄnu pìnɛ:
15Mare, ǹ ma yã ma. Zĩtɛ kũ a ↄgↄ kà andurufu wàa plamɛ, bↄ́n abire ũ ó daguraa? Ǹ n gɛ̀ vĩn.
16Ibrahĩ a yã mà, akũ à andurufu kũ à òo yↄ̃̀nɛ gbɛ̃nↄ wára lagatarinↄ zakaaa.
17Lɛmɛ Ɛflↄnu bú kũ à kú Makpɛla, Mamare sarɛ, gↄ̃̀ Ibrahĩ pↄ́ ũ lɛ kũ gbɛ̀wɛɛ kũ à kú gweo kũ lí kũ ò kú gwenↄ zaa bú pì lɛ́i pínki.
18À gↄ̃̀ Ibrahĩ pↄ́ ũ Iti kũ ò sù wɛ̃tɛ bĩnilɛanↄ pínki wára.
19Abire gbɛra Ibrahĩ a nanↄ vĩ̀ Makpɛla bura gbɛ̀wɛɛ pìi gũn Mamare kũ òdi pi tera Ɛblↄnu sarɛ, Kanaanↄ bùsun.
20Lɛn bú kũ gbɛ̀wɛɛ kũ à de Itinↄ pↄ́ ũ yãoo gↄ̃̀ Ibrahĩnɛ gɛ̀vĩki ũ lɛ.
