Miamun 2:7-22

⁷Da Anutu Yawe iyu intap fain da itip garamin da igufi nifu pau rima marantaʼan yataŋʼ garam yu-bampun da garam igi isu garam gar marantaʼan.

⁸Da Anutu Yawe iraf gum ŋarubini maŋan imiŋʼ Iden imiŋʼ gubuʼ yaban da itaŋin garam araŋan tipan ugu impa gin.

⁹Anutu Yawe inaŋ da gai mara maran dauman iyab intap, gai maran aridagin da nidzun dauman i gadan. Da miŋʼa gum igi wasaʼ gan, araŋan itaŋin gai rima marantaʼan ntiŋan aŋu da gai kupisa uwayant i nam bini da nam maisan.

¹⁰Da mpui maran maŋan intuap iwaʼ Iden da irunt imiŋʼ wasaʼ i gum igi i rima raŋaraŋ rutin, da ibatsaf isu mpui baŋin iruʼ da iruʼ.

¹¹Mpui miamun biŋangan Pison, da irunt iŋuaŋʼ iŋuaŋʼ imiŋʼ wasaʼ i garam Hawila intapan, da intap igi gol imiŋʼ gin.

¹²(Da gol miŋʼa intap igi ŋarubini biŋan iyus, da gai gurun gauntan waʼa bini da tauf griʼgriʼan imiŋʼ nigi impruʼ.)

¹³Mpui baŋin maŋan suda iruʼrun gin biŋangan Gihon, irunt iŋuaŋʼ iŋuaŋʼ imiŋʼ wasaʼ intap Kus.

¹⁴Mpui baŋin maŋan suda iruʼ da bits biŋangan Taigris, irunt gamp Asur marafain gan miŋʼa bida gubuʼ yaban. Da mpui baŋin maŋan suda iruʼ da iruʼ biŋaŋgan Yufretis.

¹⁵Da Anutu Yawe iyu garam da itaŋin i gum miŋʼa Iden i naŋa gum gin da mpada tayaŋʼ gin.

¹⁶Da ifai nan i araŋan ini ibiani, “Gai nidzun miŋʼa gum ani sib aŋu da u buŋʼ ayu da wagan,

¹⁷da bitsintaʼ gai bits rima uwayant i nam bini da maisan, agu anuŋʼ gada i nidzuŋgan u, i gubuʼ aru u gadan igi da u buŋʼ amamp.”

¹⁸Da Anutu Yawe ini i uŋgan ini binaʼ, “Anuŋʼ bini i garam runtaʼ aŋu mpadan u. Dzi buŋʼ atip i gan sarimpan gan maŋan saŋʼa i rima araŋan sib.”

¹⁹Ibinigi da Araŋan iyu intap da itip apu yuŋa intap da dzufan sib aŋu gin da iyu iba da garam i tsaŋanda garam rima biŋan bida anuŋʼ gin. Da biŋan idzuwai araŋan nuʼa gin, da nigi isu i biŋaŋgan.

²⁰Ibinigi da garam irim biŋan da apu dzuf da apu buman da marapagraʼ miŋʼa intap sib aŋu, da bitsintaʼ apu igi gan bits anuŋʼ ifasaŋʼ i sarimpa garam igi da rima araŋan sib u.

²¹Ibinigi da Anutu Yawe inaŋ da garam igiŋʼ marampruʼ funub da itus araŋan dzabaran bits da irim iwaʼ ifan, da itip yamits araŋan riniubit sib.

²²Da Araŋan iyu garam dzabaran da itip isu sagat da iyu iba da garam.