1Wɛ̃̀ pla papanaa gbɛra Firi'auna nana ò, à è á zɛna Nili lɛ́a.
2À è zùda mana mɛ̀kpananↄ bↄ̀tɛ swa pìi wɛ̀ɛn mɛ̀n suppla òtɛn sɛ̃̀ ble tàfee gũn.
3Akũ à zùda fɛ̃fɛ̃na wↄkↄwↄkↄnↄ è mɛ̀n suppla dↄ. Ò bò swawɛɛn ò tɛ̀ a káakupↄnↄ kpɛ ò zɛ̀ ń sarɛ swa lɛ́a.
4Akũ zù fɛ̃fɛ̃na wↄkↄwↄkↄ pìnↄ zù mana mɛ̀kpana pìnↄ mↄ̀mↄ, akũ Firi'auna vù.
5À ɛ̀ra à i ò, akũ à nana ò dↄ. À è ése sáko mana wɛ́de pìa ése lí dokↄ̃nↄa sáko suppla.
6Akũ à ése sáko wɛ́ kↄgↄkↄgↄ kũ legũ'i kĩ̀aḿmanↄ è, à pìa ń gbɛra dↄ sáko suppla.
7Akũ ése sáko wɛ́ kↄgↄkↄgↄ pìnↄ ése sáko mana wɛ́de pìnↄ mↄ̀mↄ. Kũ Firi'auna vù, à è nanan a ò.
8Kũ gu dↄ̀, à kú bídi gũn, akũ à Misila màsokɛrinↄ kũ wɛ́zɛ̃rinↄ sìsi ń pínki. À a nananↄ bàbańnɛ, ama ń gbɛ̃ke dí fↄ̃ à a bↄkↄtɛnaa ònɛro.
9Akũ wɛ̃kpaatɛriki fùtɛ à yã ò Firi'aunanɛ à pì: Taari kũ ma kɛ̀ yã dↄ̀magu gbãra.
10Kí, n pↄ fɛ̃̀ n zↄ̀blerinↄi yã, akũ n ma da kpɛ́siran n dogarinↄ gbɛ̃ zↄ̃kↄ̃ bɛa lɛɛlɛ kũ burodikɛrikio.
11Gwãani dokↄ̃nↄa o nana ò, ó baadi kũ a pↄ́o kũ a àlesiio.
12Eberu kɛfɛnna ke kú kũoo gwe, n dogarinↄ gbɛ̃ zↄ̃kↄ̃ↄ zↄ̀ↄmɛ. Kũ o ó nananↄ bàbanɛ, akũ à ó baadi pↄ́ bↄkↄtɛnaa ònɛ.
13Yã pìnↄ kɛ̀ lákũ à òwɛrɛ nà. N ɛra n ma da ma zĩn, akũ n burodikɛriki pìi lòko lía.
14Akũ Firi'auna gbɛ̃ zĩ̀ ò Yusufu sísi, akũ ò gɛ̀ɛ ò a bò wɛ̀ɛn likalika. À mìi bò à a pↄ́kasanↄ lìtɛ, akũ à gɛ̀ɛ Firi'auna kĩnaa.
15Akũ Firi'auna pìnɛ: Ma nana ò, gbɛ̃ke dí fↄ̃ à a bↄkↄtɛnaa òmɛnɛro. Ma mà ò pì, tó ò ònnɛ, ndì fↄ̃ ǹ a àlesi ońnɛ.
16Yusufu pìnɛ: Adi kɛ makũmɛro, Luda mɛ́ ani a àlesi onnɛ, kí.
17Akũ Firi'auna pìnɛ: Ma nana gũn ma è má zɛna Nili lɛ́a.
18Ma è zùda mana mɛ̀kpana mɛ̀n supplanↄ bↄ̀tɛ swawɛɛn òtɛn sɛ̃̀ ble tàfee gũn.
19Akũ ma zùda pãndenↄ è dↄ mɛ̀n suppla ò fɛ̃fɛ̃na wↄkↄwↄkↄ, mádi zù fɛ̃fɛ̃na bire takanↄ e Misila la zikiro.
20Akũ zùda fɛ̃fɛ̃na wↄkↄwↄkↄ pìnↄ zù mɛ̀kpana káakupↄ mɛ̀n suppla pìnↄ mↄ̀mↄ.
21Bee kũ ò ń mↄ́mↄ, ò gↄ̃̀ fɛ̃fɛ̃na lán yã bàmɛ, gbɛ̃ke ni dↄ̃ kũ ò ń mↄ́mↄ sero. Akũ ma vu.
22Nana gũn dↄ ma è, ése sáko mana wɛ́de pìa ése lí dokↄ̃nↄa sáko suppla.
23Akũ ma è ése sáko térere wɛ́ kↄgↄkↄgↄ kũ legũ'i kĩ̀aḿmanↄ pìa ń gbɛra dↄ sáko suppla.
24Akũ ése sáko wɛ́ kↄgↄkↄgↄ pìnↄ ése sáko wɛ́de pìnↄ mↄ̀mↄ. Kũ ma ò màsokɛrinↄnɛ, ń gbɛ̃ke dí fↄ̃ à a bↄkↄtɛnaa òmɛnɛro.
25Akũ Yusufu pìnɛ: Kí, nana kũ n òo pìnↄ àlesi dokↄ̃nↄmɛ. Luda yã kũ à ye à kɛ mↄ̀nnɛmɛ, kí.
26Zù mana mɛ̀n suppla pìnↄ bi wɛ̃̀ supplamɛ. Ése sáko wɛ́de sáko suppla pìnↄ sↄ̃ wɛ̃̀ supplamɛ. Nana pìnↄ àlesi dokↄ̃nↄmɛ.
27Zù fɛ̃fɛ̃na wↄkↄwↄkↄ mɛ̀n suppla kũ ò bↄ̀tɛ ò tɛ̀ a káakupↄnↄ kpɛ pìnↄ bi wɛ̃̀ supplamɛ. Lɛmɛ ése sáko wɛ́ kↄgↄkↄgↄ kũ legũ'i kĩ̀aḿma sáko suppla pìnↄ de lɛ dↄ. Abirekũnↄmɛ wɛ̃̀ suppla kũ nà ni ká ũ.
28Lákũ ma ònnɛ nà tera, kí, ma pì Luda tɛn yã kũ à ye à kɛ mↄnnɛmɛ.
29Pↄ́blewɛ nigↄ̃ di Misila gu sĩnda pínkia manamana ari wɛ̃̀ suppla.
30Abire gbɛra nà ni gɛ̃ ari wɛ̃̀ suppla, kãna gbãna pì yã ni sã Misilanↄgu. Nàa pì ni bùsuu pì dɛ.
31Nà kũ ani su pì nigↄ̃ pãsĩ manamana, kãna gbãna pì yã ni dↄ gbɛ̃kegu doro.
32Kí, kũ gɛ̃̀n plamɛ n nana pìi ò, kũ Luda mɛ́ à dìtɛ yãimɛ. Ani kɛ teramɛ, à sika vĩro.
33Tera sà kí, ǹ wɛ́zɛ̃ri ↄ̃ndↄ̃de wɛtɛ ǹ ditɛ àgↄ̃ de gbãnade ũ Misila.
34Kí, ǹ gbɛ̃nↄ ditɛ gbɛ̃ zↄ̃kↄ̃nↄ ũ Misila ògↄ̃ pↄ́blewɛ sↄↄrode kakara wɛ̃̀ suppla kũ pↄ́blewɛ nigↄ̃ din pìi gũn.
35Oni pↄ́ble kakara wɛ̃̀ mana kũ àtɛn sunↄ gũn ò pↄ́blewɛ ká dↄ̃̀nↄ gũn wɛ̃tɛ kũ wɛ̃tɛo kũ n tↄ́o, onigↄ̃ dãkpã.
36Tó nà kũ ani kɛ wɛ̃̀ suppla pìi kà Misila, pↄ́ble pì nigↄ̃ de zã̀na ũ de nàa pì sún Misilanↄ dɛdɛro yãi.
37Yã pìi kà Firi'aunagu kũ a ìbanↄ ń pínki,
38akũ à pìńnɛ: Gbɛ̃ dí Luda Nini vĩ. Óni gbɛ̃ke e lán a bà dↄ yá?
39Akũ à pì Yusufunɛ: Lákũ Luda tò ń yã birenↄ dↄ̃ pínki nà, wɛ́zɛ̃ri ↄ̃ndↄ̃de ke kun lán n bàro.
40Mↄkↄ̃n mɛ́ ĩnigↄ̃ de ma ↄn gbɛ̃ zↄ̃kↄ̃ ũ, ma gbɛ̃nↄ nigↄ̃ mì natɛnnɛ ń pínki. Kpata mɛ́ ani tó màgↄ̃ denla ado.
41Akũ à ɛ̀ra à pìnɛ: Ĩnigↄ̃ gbãna vĩ Misila bùsu gu sĩnda pínkia.
42Akũ à tãnka sèedakɛbↄↄ bò a ↄnɛa à dà Yusufunɛ a ↄnɛa, à taasaa uta dànɛ à wura gɛ̀rɛɛ dànɛ a wakaaa.
43À a sↄ̃go plade kpàa táa'obↄ ũ, akũ gbɛ̃ kũ ò donɛ arɛnↄ dìgↄ̃ pata: À kútɛ! À kútɛ! Lɛmɛ Firi'auna tò Yusufu gbãna vĩ Misila bùsun lɛ.
44À pìnɛ dↄ: Makũ Firi'auna, gbɛ̃ke ni fↄ̃ à yãke kɛ Misila la n lɛ́ sariro.
45À tↄ́ kpànɛ Zafɛna Panɛa, akũ à Ɛliↄpↄli wɛ̃tɛ sa'ori Potifɛra nɛ́nↄgbɛ̃ Asɛna kpàa nↄ ũ.
46Gↄrↄ kũ Yusufu zĩ lè Misila kína Firi'auna bɛa, a wɛ̃̀ baraakurimɛ. Akũ à bò Firi'auna kĩnaa à gɛ̀ɛ à kurè Misila gu sĩnda pínkia.
47Kãna gbãna kun ari wɛ̃̀ suppla, pↄ́blewɛ din manamana.
48Akũ Yusufu pↄ́blewɛ kũ à di Misila wɛ̃̀ suppla pìnↄ kàkara wɛ̃tɛ kũ wɛ̃tɛo zã̀na ũ, wɛ̃tɛ sĩnda pínki kũ a bura kũ ò likainↄ pↄ́o.
49A pↄ́blewɛ kàkara zↄ̃kↄ̃zↄ̃kↄ̃ lán ísiralɛ bùsu'atɛ̃ bà, akũ ò zɛ̀ a zaka lɛ́ yↄ̃naaa, kũ oni fↄ̃ ò a lɛ́ dↄ̃ro yãi.
50Ari nà gↄ̃ gɛ́ ká Yusufu nanↄ Asɛna, Potifɛra nɛ́, nɛ́gↄ̃gbɛ̃nↄ ì mɛ̀n pla.
51Yusufu tↄ́ kpà a dauduunɛ Manase à pì: Luda tò ma de bedenↄ kũ wari kũ ma kɛ̀ɛo yã sã̀magu pínki.
52Akũ à tↄ́ kpà a pladenɛ Ɛflaimu à pì: Luda tò ma gↄ̃ nɛ́de ũ bùsu kũ ò wɛ́ tã̀man.
53Kũ kãna gbãna kũ à kú Misila wɛ̃̀ suppla pìi làka,
54akũ wɛ̃̀ suppla kũ nà ni ká dàtɛ lákũ Yusufu ò nà. Nàa kà bùsu kũ bùsuuo pínki, ama pↄ́blewɛ di Misila gu sĩnda pínkiamɛ.
55Kũ nàa gɛ̃̀ Misilanↄgu pínki, ò wiki lɛ̀ Firi'aunanɛ à pↄ́ble kpáḿma. Akũ à pìńnɛ ń pínki: À gɛ́ Yusufu kĩnaa à kɛ lákũ ani oárɛ nà.
56Nàa dà bùsuu pìla pínki, akũ Yusufu dↄ̃̀nↄ wɛ̃̀wɛ̃ à pↄ́blewɛ yìa Misilanↄa, kũ nàa pì gbãna kũ̀ ń bùsun yãi.
57Akũ gbɛ̃nↄ bò andunia gu pínkia ò sù Misila pↄ́blewɛ lú Yusufua, zaakũ nà gbãna kũ̀ andunia gũn pínkimɛ.
