1Yusufu pì a bɛgwariinɛ: Ǹ pↄ́blewɛ káka gbɛ̃ pìnↄnɛ ń asasanↄ pa lákũ oni fↄ̃ ò sɛ́ nà. Ǹ baadi ↄgↄ danɛ a asasa lɛ́n
2ǹ ma andurufu toko sɛ́ ǹ da ń dakũna asasan kũ a pↄ́blewɛ ↄgↄo. Akũ à kɛ̀ lákũ Yusufu ònɛ nà.
3Kũ gu dↄ̀ gↄ̃̀nↄ, ò ń gbárɛ kũ ń zaakinↄ.
4Ari ògↄ̃ gɛ́ ká zã̀, akũ Yusufu pì a bɛgwariinɛ: Ǹ futɛ ǹ pɛ́tɛńyĩ. Tó n ń lé, ǹ ń la ǹ pi bↄ́ yã mɛ́ à tò ò fĩnaa bòmɛnɛ kũ a vãnio a mana gɛ̃nɛ ũu?
5Bↄ́ yã mɛ́ à tò ò ma toko kũ madì í mio mà màso kɛoo sɛ̀ kpãnii? Ǹ ońnɛ kũ ò yã vãni kɛ̀.
6Kũ à ń lé, à yã pìi òńnɛ,
7akũ ò wèa ò pì: Mare, à kɛ̀ dera n ò lɛɛ? Kúku! Ókↄ̃nↄ n zↄ̀blerinↄ, odì yã bire taka kɛro.
8Ɔgↄ kũ o lè yã ó asasanↄ lɛ́ gũn, ódi ɛra o suonnɛ bona zaa Kanaaroo? Óni fↄ̃ ò andurufu ke wura sɛ́ kpãni n dikiri bɛa yá?
9Mare, ó gbɛ̃ kũ n lè a kĩnaa, ade gà, ó pínki óni gↄ̃ n zↄ̀nↄ ũ.
10À pì: Tↄ̀, à kɛ lákũ a ò nà. Gbɛ̃ kũ ò lè a kĩnaa ni gↄ̃ ma zↄ̀ ũmɛ, á gbɛ̃ kparanↄ ni gↄ̃ taari sari.
11Akũ ń baadi a asasa kìpa à pòro gↄ̃̀nↄ.
12Akũ bɛgwarii pì ń asasanↄ gwàgwa. À nà ń vĩ̀ni pↄ́a ari à gɛ̀ɛ à kào ń dakũna pↄ́a, akũ à toko pìi lè Biliaminu pↄ́ gũn.
13Ò ń utanↄ gà ò kɛ̃̀kɛ̃, akũ ń baadi a aso yĩ̀ a zaakinɛ ò ɛ̀ra ò gɛ̃̀ wɛ̃tɛ gũn.
14Kũ Yuda kũ a gbɛ̃nↄ kà Yusufu bɛa, ò a lè gwe, akũ ò kùtɛ a arɛ zĩtɛ.
15À pìńnɛ: Bↄ́yãin a kɛ̀ lɛɛ? Á dↄ̃ kũ ma taka dì màso kɛroo?
16Yuda wèa à pì: Dikiri, óni pinnɛ deramɛɛ? À yãke ona vĩro. Óni kɛ dera ò ó zĩda bo yãnn? Luda mɛ́ à bò ó taaria. Dikiri, o gↄ̃ n zↄ̀nↄ ũ dí, ókↄ̃nↄ kũ gbɛ̃ kũ ò toko pìi lè a kĩnaao.
17Akũ Yusufu pì: Kai! Mani fↄ̃ mà abire kɛro. Gbɛ̃ kũ ò toko pìi lèa mɛ́ ani gↄ̃ ma zↄ̀ ũ, á gbɛ̃ kparanↄ áni ɛra à tá á de kĩnaa aafia.
18Akũ Yuda nài à pì: N yã nna dikiri! Ǹ tó makũ n zↄ̀bleri mà yã onnɛ. Ǹsun pↄ fɛ̃mairo dikiri, zaakũ ń sára kũ Firi'aunaomɛ.
19Dikiri, n ó lá yã tó ó de vĩ ke dakũna.
20Akũ o pì ó de zĩ kũ̀, akũsↄ̃ ó dakũna kun dↄ, ó de a ì a zĩkũnaa gũmmɛ. Nɛ́ pìi vĩ̀ni dadokↄ̃nↄde gà, àkũ mɛ́ à gↄ̃̀ ado, akũ ó de pì yei manamana.
21N ò ókↄ̃nↄ n zↄ̀blerinↄnɛ ò a sɛ́ ò su kãaonnɛ de ǹ wɛ́ sialɛ.
22Dikiri, o pìnnɛ nɛ́ pì ni fↄ̃ à a de tóro. Tó à a tò, de pì ni gamɛ.
23Akũ n pìwɛrɛ, tó ódi su kũ ó dakũna pìioro, óni wɛ́ sikↄ̃lɛro.
24Kũ o ta ó de kĩnaa, o n yã ònɛ.
25Akũ ó de pìi pì ò ɛra ò gɛ́ pↄ́blewɛ lú fíti dↄ.
26O pì, tó adi kɛ ó dakũna kú kũoo baasiro, óni fↄ̃ ò gɛ́ro, zaakũ tó à kú kũooro, óni wɛ́ sikↄ̃lɛro.
27Akũ ó de pìwɛrɛ, ó dↄ̃ kũ a nanↄ nɛ́ ì mɛ̀n pla.
28Kũ a do bò a bɛa, adi a e doro ari gbãra. À pì nↄ̀bↄ pãsĩ mɛ́ à a sò.
29À pì tó o nɛ́ bire sìawa, akũ yã vãni a lè, lákũ a zĩ kũ̀ nà, óni tó à tá miran kũ pↄsiraomɛ.
30Tera sà, tó ma ta ma de kĩnaa, akũ a nɛ́ pì kú kũooro, ani gamɛ, zaakũ a pↄ kúamɛ.
31Tó ó de dí nɛ́ pì e ó tɛ́ro, ani tá miran a zĩkũnaa gũn kũ pↄsiraomɛ.
32Ma a zĩda kpà ma dea nɛ́ pìi gɛ̃nɛ ũmɛ, ma pì tó mádi sunɛ kãaoro, mani gↄ̃ a taaride ũ ari ma wɛ̃̀ndi lɛ́n.
33Dikiri, n yã nna! Ǹ tó mà gↄ̃ n zↄ̀ ũ nɛ́ pìi gɛ̃nɛ ũ de à tá kũ a vĩ̀ninↄ.
34Tó adi kɛ kũ nɛ́ pìioro, mani fↄ̃ mà tá ma de kĩnaaro. Ǹsun tó mà yã vãni kũ ani ma de le ero.
