Vuhuna 2:7-22

⁷Muri e BAKOVI DAGI a Vure i pipia na habulo a bakovi, i vaki dilia na ruperena a bangona nimahuri, i bele a bakovi mahuri.

⁸Muri, e BAKOVI DAGI a Vure i varoa a hania o Iden na nirikena haro. I rua vonga a bakovi i rata rikea.

⁹E BAKOVI DAGI a Vure i rata rike a maka kai legelege ri mapoda na malala, a maka kai mata kamumu, i kamumu a kanena ni kanina. Na kurukuruna hania a kai i rua ru pesi: a kai i habi a nimahuri, turana a kai i habi a lohokanga na naro kamumu na naro hale.

¹⁰A naru dagi i tua tala vonga o Iden i bako va, ne vona ni vakamea a hania.

¹¹A bakona muga ni gale e Pison, i tua marogo lae na robo e Havila, a robo na gol.

¹²A robo iea i vona a kai manginoro, a gol kamumu turana a maka kedo na mahala ranga.

¹³A ruana bakona naru dagi ni gale e Gihon, i tua marogo lae na robo e Kus.

¹⁴A rana toluna bakona naru dagi tara e Tigris. I tua na tabeke na nirikena haro na robo e Asiria. A vana bakona naru dagi ni gale e Iupretis.

¹⁵E BAKOVI DAGI a Vure i bolea a bakovi i vakamadea na hania o Iden ge leho vona ge matakaria.

¹⁶E BAKOVI DAGI a Vure i vakukua a bakovi, i ta maea, “A maka kanena kai lobo o kani,

¹⁷pali a kai i habi a lohokanga na naro kamumu na naro hale, naha ni kania a kanena. Muholi hateka, na tahuna o kania bara o mate.”

¹⁸E BAKOVI DAGI a Vure i ta maea, “I uka ma i kamumu a bakovi ge ia kikeri. Ga ratea tara turana ge tuhoria.”

¹⁹E BAKOVI DAGI a Vure i rata rike pali na malala a maka livoa na robo turana a maka kadirovo. I bole lakea na bakovi ge matai ria ge vunu a rane ria takutaku. E rei a rana i vunu ria vona takutaku bara i tabuli liu a rana.

²⁰A bakovi i vunu a rana a maka sipsip a bulmakau, a kadirovo, a livoa na robo, pali i uka tara ge mata manga e Adam ga rihina.

²¹Lakea e BAKOVI DAGI a Vure i ratea e Adam i mahita mate. Na tahuna i mahita mate i paru talea a karona, muri i kavitagu mulea na bobona.

²²Muri i pipia a ngatavine na karo i paru talea na bakovi, muri i tuli lakea vona a ngatavine.