Dəkəcop 2:7-22

⁷Kɔ Kanu Kəpɔŋ kəsɛlɛ fum kəbof ka dəntɔf. Kɔ Kanu kəfurup kɔ dololəm kifir ka kəyinɛ doru, kɔ fum ɔyɔnɛ paka peŋesəm.

⁸Kɔ Kanu Kəpɔŋ kəmbɔf tɔk yokom nde dalɛ da Edeŋ, kəca nkɛ dec dɛmpɛ mɔ, k'ɛmbɛrsɛ di fum nwɛ ɛnasɛl mɔ.

⁹Kɔ Kanu Kəpɔŋ kəsɔŋɛ kɔ tɔk yokom yɔbɔt kədi yompoŋəs-poŋəs fəp, kəlɛkɛnɛ kətɔk ka kəyinɛ wəyeŋ katina nkɛ kənacəmɛ nde dalɛ dacɔ mɔ, kɔ kətɔk ka kəcərɛnɛ pətɔt kɔ pəlɛc.

¹⁰Kɔ kəŋgbɔkɔ kəwur Edeŋ, nkɛ kəŋc-dəməs dalɛ mɔ. Kɔ kəŋgbɔkɔ kaŋkɔ kəŋkɔ kəyerənɛ dalɛ disrɛ waca maŋkəlɛ.

¹¹Kəca kəcɔkɔ-cɔkɔ k'aŋc-we «Pisɔŋ», ki kənɔŋkər atɔf ŋa Hawila fəp, nde kɛma kəyi mɔ.

¹²(Nde ambəp kɛma kəsoku pɛs mɔ, ŋcɛmcɛm yobotu ambɔŋc, kɔ masar momotər-motər .)

¹³Kəca ka mɛrəŋ k'aŋwe «Kihɔŋ», ki kənɔŋkər atɔf ŋa Kus.

¹⁴K'aŋwe kəŋgbɔkɔ ka maas «Tikər», ki kəcepər kəca nkɛ dec dɛmpɛ dare da Asur mɔ. Kəŋgbɔkɔ ka maŋkəlɛ kəyɔnɛ «Efərat.»

¹⁵Kɔ Kanu Kəpɔŋ kəlɛk fum, kɔ kəmbɛrsɛ kɔ dalɛ da Edeŋ disrɛ, a pəbɔfət ca, pəbumɛnɛ sɔ di.

¹⁶Kɔ Kanu Kəpɔŋ kətiŋtiŋ fum: «Məntam kədi yeri ya dalɛ dandɛ fəp.

¹⁷Mba ta mədi pokom pa kətɔk ka kəcərɛnɛ pətɔt kɔ pəlɛc de! Bawo dɔsɔk ndɛ məndedi pokom pa ki mɔ, məŋfi!»

¹⁸Kɔ Kanu Kəpɔŋ kəloku: «Pəmar fɛ wərkun pəyi sona! Indelompəs wəmarəs kɔn, ntɛ tɔŋsɔŋɛ ŋayi mɛrəŋ mɔ.»

¹⁹Kɔ Kanu Kəpɔŋ kəŋkɛrɛ fum sɛm ya dalɛ kɔ bɛmp ya dareŋc nyɛ kənawurɛ dəntɔf mɔ, kədemɔmən ntɛ ende pəcwe yi mɔ. Ntɛ tɔŋsɔŋɛ yowurɛ yɔn fəp yɔyɔ mewe mmɛ fum ende pəcwe yi mɔ.

²⁰Kɔ fum ɔsɔŋ sɛm yɔcɔl fəp mewe, kɔ bɛmp ya dareŋc kɔ fum ɔsɔŋ sɔ sɛm ya dəkulum fəp mewe. Mba ta fum taŋ, ɔsɔtɔ fɛ nwɛ endetam kəcmar kɔ mɔ.

²¹Kɔ Kanu Kəpɔŋ kəsɔŋ wərkun mere mɔpɔŋ, k'endirɛ. Kɔ Kanu kəwurɛ wərkun kəbɛnt kəkəsək ka dɛbəkəc. Kɔ kəluksərnɛ sɔ, kɔ kəntaməs dənda.

²²Kɔ Kanu Kəpɔŋ kəlompəsɛ wəran kəbɛnt kəkəsək nkɛ ɛnawurɛ wərkun mɔ, k'eŋkenɛ wərkun wəran nwɛ.