Text copied!
CopyCompare
Luda yã takada kũ Bisã yão - NAANAA

NAANAA 12

Help us?
Click on verse(s) to share them!
1Dikiri pì Abramunɛ: Ǹ bo n bùsun n danɛnↄ tɛ́ n de bɛa, ǹ tá bùsu kũ mani mↄnnɛn.
2Mani tó n buri kɛ dasi, mani arubarika dangu mà n tↄ́ bo, n kĩnaan onigↄ̃ arubarika len.
3Mani arubarika da gbɛ̃ kũ oni sa mana onnɛnↄn, mani gbɛ̃ kũ oni sa vãni onnɛnↄ ká. Andunia buri sĩnda pínki ni arubarika le n gãi.
4Akũ Abramu dà zɛ́n lákũ Dikiri ònɛ nà. Lutu gɛ̀ɛ kãao. A wɛ̃̀ baaakↄ̃ akuri awɛɛsↄↄrode gũn à bò Arana
5kũ a nanↄ Saraio kũ a vĩ̀ni nɛ́ Lutuo kũ ń aruzɛkɛ kũ ò vĩnↄ kũ gbɛ̃ kũ ò sɛ̀ gwenↄ. Lɛn ò bò Arana lɛ ò dà Kanaa zɛ́n. Kũ ò kà gwe,
6akũ ò gɛ̃̀tɛ bùsuu pìn ari ò kà Mↄre gbiri lí kĩnaa Sɛkɛmu. Kanaanↄn kú bùsuu pìn gↄrↄ birea.
7Akũ Dikiri bò à sù Abramua à pì: Mani bùsu dí kpá n burinↄamɛ. Akũ à Dikiri gbagbaki bò gwe.
8Kũ à fùtɛ gwe, à mìi pɛ̀ kpi kũ ò kú Bɛtɛli ifãboki kpanↄa, akũ à bùraa kàtɛ gwe, Bɛtɛli kú ifãlɛtɛ kpa, Ai kú ifãboki kpa. À Dikiri gbagbaki bò gwe dↄ, akũ à a sìsi.
9Akũ à dà zɛ́n dↄ à mìi pɛ̀ Nɛgɛvia.
10Kũ nàa kà bùsuu pìn, akũ Abramu gɛ̀ɛ gↄrↄ pla kɛ Misila, zaakũ nàa pìi gɛ̃̀ ↄla.
11Kũ à kà kãni kũ Misilao, à pì a nanↄnɛ: Má dↄ̃ nↄ manamɛ n ũ.
12Tó Misilanↄ n e, oni pi ma nanↄmɛ n ũ, oni ma dɛ oni n tó.
13Ǹ pińnɛ ma dãremɛ n ũ de ò ma sí ↄplapla n yãi. Lákũ ĩni ma mì sí nàn gwe.
14Kũ ò kà Misila, Misilanↄ è nↄgbɛ̃ pì mana gɛ̃̀.
15Kũ Misilanↄ kína Firi'auna ìbanↄ a è, ò a mana gↄ̃̀gↄ̃nɛ, akũ ò a sɛ̀ ò gɛ̃̀ kãao Firi'aunanɛ a bɛa.
16Akũ à Abramu gwà manamana a yãi, à sãnↄ kpàa kũ zùnↄ kũ zaakinↄ kũ gↄ̃gbɛ̃ zĩkɛrinↄ kũ nↄgbɛ̃ zĩkɛrinↄ kũ lakuminↄo.
17Akũ Dikiri gyã pãsĩnↄ kà Firi'aunagu kũ a bedenↄ Abramu nanↄ pì yãi.
18Akũ Firi'auna Abramu sìsi à pìnɛ: Bↄ́ yã n kɛ̀mɛnɛ gwee? Bↄ́ yã mɛ́ à tò ńdi omɛnɛ kũ n nanↄnloo?

19À kɛ̀ dera n pì n dãremɛ, akũ ma a sɛ̀ nↄ ũu? N nↄn di! Ǹ n pↄ́ sɛ́ ǹ táo.
20Firi'auna yã ò a gbɛ̃nↄnɛ Abramu yã musu, akũ ò gɛ̀ɛ ò zɛ̀nɛ kũ a nanↄo kũ a aruzɛkɛnↄ pínki.