1Ibrahĩ nↄ pãnde sɛ̀ dↄ a tↄ́n Kɛtura.
2Nɛ́ kũ à ì kãaonↄ tↄ́n dí: Zimlã, Yↄkↄsã, Mɛdã, Midiã, Isibaki, Sua.
3Yↄkↄsã mɛ́ à Seba kũ Dedão ì. Dedã burinↄn Asirianↄ kũ Lɛtusinↄ kũ Lɛuminↄ ũ.
4Midiã nɛ́gↄ̃gbɛ̃nↄ tↄ́n dí: Efa, Ɛfa, Anↄku, Abida, Ɛlɛda. Ń pínki Kɛtura burinↄmɛ.
5Ibrahĩ a aruzɛkɛ kpà Isaakua pínki,
6akũ à gba dà a nↄ yìgisaride nɛ́nↄnɛ à ń gbárɛ ifãboki kpa de à kpɛ́ à ga, de òsungↄ̃ kú kũ Isaakuoro yãi.
7Ibrahĩ kɛ̀ wɛ̃̀ bakɛ̃ndo sↄↄro sari,
8akũ à gà. À zĩ kũ̀ yúkuyuku, gbasa à kà a gbɛ̃nↄla gyãwãn.
9A nɛ́nↄ Isaaku kũ Sumailao a vĩ̀ Makpɛla gbɛ̀wɛɛ gũn, Mamare ifãboki kpa, bura kũ à de Iti buri Zoa nɛ́ Ɛflↄnu pↄ́ ũ yã
10kũ Ibrahĩ pìi lù Itinↄa. Gwen ò a vĩ̀n kũ a nanↄ Sarao.
11Ibrahĩ ganaa gbɛra Luda arubarikaa dà a nɛ́ Isaakun. À vutɛna Ludabɛ̃nɛkũadima'e lↄ̀gↄↄ sarɛ.
12Ibrahĩ nɛ́ Sumaila burinↄ yãn dí. Sara zĩkɛri Hazara, Misila nↄgbɛ̃ mɛ́ à nɛ́ pìi ì kãao.
13Sumaila nɛ́gↄ̃gbɛ̃nↄ tↄ́n dí lákũ ò ń í nà. A daudu tↄ́n Nɛbayo. A dakũnanↄ tↄ́n dí: Keda, Adabɛli, Mibisamu,
14Misima, Duma, Masa,
15Adada, Tema, Yetu, Nafisi kũ Kedemao.
16Sumaila nɛ́gↄ̃gbɛ̃nↄ tↄ́n gwe. Ń baadi a tↄ́ kpà a lakutu ke a bùraanɛ. Mↄ́kↄ̃nↄmɛ a buri kuri awɛɛplanↄ kínanↄ ũ.
17Sumaila kɛ̀ wɛ̃̀ basuddo akuri awɛɛsuppla, akũ à gà à kà a gbɛ̃nↄla gyãwãn.
18A burinↄ vùtɛ zaa Avila ari à gɛ̀ɛ pɛ́ Surua, Misila ifãboki kpa gɛna Asiria bùsu kpa. Òdi kↄ̃ tɛ́ kpákpa kũ Ibrahĩ buri kparanↄro.
19Ibrahĩ nɛ́ Isaaku burinↄ yãn dí. Ibrahĩ Isaaku ì.
20Kũ Isaaku kà wɛ̃̀ bupla, akũ à Labã dãre Rɛbɛka sɛ̀. Àkũmɛ Siria bùsu gbɛ̃ Bɛtuɛli kũ à bò Mɛsↄpↄtamia bùsun nɛ́ ũ.
21Isaaku wɛ́ kɛ̀ Dikiria a nanↄnɛ, zaakũ paramɛ, akũ Dikiri a adua sì, a nanↄ pìi nↄ̀ↄ sì.
22Sìkanↄ tɛn ↄsi ká a gbɛrɛn, akũ à pì: Bↄ́ yã mɛ́ à tò yã bire taka ma lee? Akũ à gɛ̀ɛ à Dikiri là.
23Dikiri pìnɛ: Buri mɛ̀n pla kú n nɛ́'isↄn, gbɛ̃nↄn pla kũ ò kú n gbɛrɛn pìnↄ ni kɛ̃kↄ̃a. Buri mɛ̀n do gbãna nigↄ̃ de a dola, a kũ à bò káaku nigↄ̃ nɛ́ ũ gbɛ̃ kpɛdenɛ.
24Kũ a nɛ́'igↄrↄ kà, akũ à sìkanↄ ì gↄ̃gbɛ̃nↄ ũ.
25Kũ gbɛ̃ káaku tɛn bo, à bò tɛ̃ɛ zónzon. À mɛ̀kã vĩ lán uta kãde bà, akũ ò tↄ́ kpànɛ Isau.
26Abire gbɛra kũ nɛ́ plade tɛn bo, à dↄ̀ Isau gbátokia, akũ ò tↄ́ kpànɛ Yakubu. Isaaku wɛ̃̀ baaakↄ̃de gũnn à nɛ́ pìnↄ ì.
27Nɛ́ pìnↄ zↄ̃kↄ̃ kũ̀. Isau kɛ̀ tofekari gbãna kũ àdi kɛ̃ sɛ̃̀ntɛaro ũ. Yakubu sↄ̃ bɛgwariimɛ.
28Isaaku ye Isaui kũ à nↄ̀bↄ lɛ́'i vĩ yãi. Rɛbɛka sↄ̃ à ye Yakubui.
29Zĩkea Yakubu tɛn dòo kuku, akũ Isau sù kũ sɛ̃̀ntɛo nà tɛni a dɛ.
30Akũ à pì Yakubunɛ: N yã nna! Ǹ tó mà dò tɛ̃ra bire ble, zaakũ nà tɛni ma dɛmɛ. A yã mɛ́ à tò, ò tↄ́ kpà Isaunɛ Ɛdↄmu.
31Yakubu pì: Ǹ n daudukɛzɛ kpáma gĩa.
32Akũ Isau pì: Má kú ga lɛ́i, bↄ́n ma daudukɛzɛ ni kɛmɛnɛɛ?
33Akũ Yakubu pìnɛ: Ǹ la damɛnɛ gĩa. Akũ à la dànɛ à a daudukɛzɛ kpàa.
34Akũ Yakubu burodii kpàa kũ bládoo pìio. À blè à í mì, akũ à fùtɛ à bò. Lɛmɛ Isau kɛ̀ lɛ, à a daudukɛzɛ dìtɛ pã.
