Jenesis 2:7-22

⁷Nalö miaŋgöreŋ Kembu Anutunöŋ gölme sömsöm memba miaŋön azi mem yaköba malmalgö numbu ösumŋi söŋgöröŋe ui geiga öröba guliba malmalgö uŋaŋambuk ahök. Mewö.

⁸Mewö aiga Kembu Anutunöŋ wehön kotkotŋe göröken miri qetŋi Eden miaŋgöreŋ oyaeŋkoyaeŋ nup kömöta azi miwikŋaiyöhi, i miaŋgöreŋ al waŋgiyök.

⁹Al waŋgiba jiiga gölmenöhök ip tandökŋini könaŋi könaŋi asuhuba wahötket. Ip mi eksihimŋinambuk aiga ölŋini neneŋi mi nahömŋinambuk. Oyaeŋkoyaeŋ nup bibiŋe malmal köhöikŋaŋgö ipŋi aka mötkutukutugö ipŋi mi mohotŋe jim kutuiga asuhuyohot. Mötkutukutugö ipŋaŋgö könaŋi kewö: Ölŋi nemba miaŋön ölöpŋi aka bölöŋi mietkö könaŋiri mi möt kutubahotpuk.

¹⁰Ip mewö wahötketka o töwatŋi kun mi Edenök könahiba oyaeŋkoyaeŋ miri mem kelita miaŋgöreŋök eta jula o böröŋi töwatŋi 4 aka anget.

¹¹O töwatŋi mutukŋaŋgö qetŋi Pison, mi Hawila gölme körek liliköba ahöba anja. Gölme miaŋgöreŋ goul ahöza.

¹²Gölme miaŋgö goulŋi mi ölöpŋi kötökŋi akza. Sileqösösök umköhöwakŋambuk qetŋi bedelion aka köt ölŋambuk qetŋi oniks mi mewöyök miaŋgöreŋ ahözahot.

¹³O böröŋi töwatŋi jaŋgö 2 miaŋgö qetŋi Gihon. Mi (Mesopotemiagö) gölme qetŋi Kus mi körek liliköba ahöba anja.

¹⁴O böröŋi töwatŋi karöbutŋi qetŋi Taigris. Mi Asiria gölme wösöŋe wehön kotkotŋe göröken geba anja. O böröŋi töwatŋi jaŋgö 4 miaŋgö qetŋi mi Yufreitis.

¹⁵Mewö aiga Kembu Anutunöŋ azi waŋgita oyaeŋkoyaeŋ miri Eden köl kömöta ek galöm akŋapköra jiba al waŋgiyök.

¹⁶Al waŋgiba kewö jiba jim kutum waŋgiyök: “Oyaeŋkoyaeŋ nup uruŋe ip pakpak kin anjei, mieŋgö ölŋini mi ölöp amqeba mem nemba malman.

¹⁷Mimö, mötkutukutugö ipkö ölŋi mi mönö kude neman. Mi nemba ölöpŋaŋgö könaŋi aka bölöŋaŋgö könaŋi möt kutuman ewö, gi mönö wehön miaŋgöreŋök kömum köhöiman. Miaŋgöra mi mönö kude neman.”

¹⁸Mewö jiba Kembu Anutunöŋ jiyök: “Azinöŋ nanŋök maliga ölöp qahö akza. Miaŋgöra nöŋön mönö nanŋi tandökŋaŋgö dop alabaukŋi miwikŋaimam.”

¹⁹Mewö jiba arökŋaŋgö sömbupŋi pakpak aka könakembagö neiŋi pakpak mi gölmenöŋ miwikŋaim eŋgiba azigö kösutŋe eŋguaŋgita azinöŋ qetŋini denöwö qetmawi, mi eka mötmapköra yaŋgöreŋ al eŋgiyök. Al eŋgiiga azinöŋ yuai malmalŋinambuk pakpak mieŋgö qetŋini mohok mohok qeriga Anutunöŋ mewö mia ahömapköra jim köhöiyök.

²⁰Mewö aiga azinöŋ mirigö sömbupŋi pakpak, könakembagö neiŋi pakpak aka arökŋaŋgö sömbupŋi pakpak mi qetŋini eŋgim teköyök. Eŋgim teköyökmö, nanŋi tandökŋaŋgö dop alabaukŋi malmapköra kun qahö miwikŋaiyök.

²¹Qahö miwikŋaiiga Kembu Anutunöŋ mi eka azi mem lömböriiga gaun lömbötŋi ahöyök. Ahöiga maröm sihitŋi kun öröba dumdumŋi busuŋan mem gwözöŋnök.

²²Gwözöŋda azinöhök maröm sihitŋi meyöhi, miaŋön ambi meyök. I memba azigöreŋ waŋgita kayök.