ṮAKWIIN 2:7-22

⁷dhali yan’ko’d Arumgimis ki ’diḵil wathimpa en’thi/ ’peni bu’da’cesh mo, dhali p̱i shi/in e shush piti, shi/in jin di ki e mo dhali wathimpa en’thi/ warki’d ki jin di ki e mo.

⁸Dhali Tap̱a Arumgimis thosonki bwaagoŋ e Idin, e mom’pesho’k mo dhali e mun mo a’di ki kar wathi/ jin uḵkina a’di icine/ mo.

⁹Dhali ’pena ’cesh mo tani Tap̱a Arumgimis ki kara ’cesh jin mina cwa ’ka a’diya p̱o/ mo, aris cwa ’baar mo kun ’bora’bor kun minu hil mo dhali kun ’boron kun minu shwa maman ’peni nycine/ mo. Dhali cwa gi mondiki/e si’da/ di’d e bwaman ma goŋ mo dhali cwa jin minu nyiṯẖ to jin ’boro’d dhali jin shiyi’d diki’d si’da/ mo.

¹⁰Yi’de/ guski’d ’peni bwaman ma goŋ ma Idin mo, a’di jin wolki’d e bwaagoŋ mo dhali a’di ḵwa/kunu bwa mo mmo’ko ’kusi doŋon mo.

¹¹Dhali gway gi yi’de/ jin ṯwa/a/ yuḵu gway ka P̱ishun mo, a’di jin guski’d mmokulum bampa/ gi Pam Hawiila isi ’baar mo e mo jin ’kokina ’dolkon gana/ mo.

¹²Dhali ’dolkon gana/ gi mony’cesh yan mo tani uni ’bora’bor mo. Dhala ’bica wasin dhela/ dhala wasin dhela/ jin ta’da jamas kush mo uni ’kokin mo.

¹³Dhali gway ḵumma/ yi’de/ jin ’kon ma p̱o/i su/ mo tani yuḵu gway ka Jihun mo, a’din ṯal ’de/ jin guski’d mo mmo’kama ’cesh gi Paŋ Kush is mo.

¹⁴Dhali ḵumma/ yi’de/ jin ’kon ma p̱o/i kwara mo tani a’di yuḵu gway ka Hiddaagil mo, a’di jin guski’d ’kup̱ki mom’pesho’k ki Pan Ashshuur mo. Dhali yi’de/ jin ’kon ma p̱o/i doŋon mo yuḵu gway ka Elp̱uraat mo.

¹⁵Dhali Tap̱a Arumgimis ki bu’th wathimpa en’thi/ mo mmokar a’di e bwaagoŋ ma Idin mmoḵorki a’di mo dhali mmokar a’di mo.

¹⁶Dhali Tap̱a Arumgimis ḵanki wathimpa en’thi/ gwo mo mmo/o gwo mo ki: /E mini shwa aris cwa gi bwaman bwaagoŋ ’baḵany mo

¹⁷hili cwa jin minu ’bi’th e ki miim ’boro’d mo dhali ki mii shiyi’d mo tani /e mini dhalki a’di ki shwa mo, haali/ ka tee jin mina /e shwa a’di mo tani /e mini wu mo be.

¹⁸Dhali yan’ko’d Tap̱a Arumgimis ki o gwo mo ki: A’di diki ’bor mmokar wathimpa en’thi/ a’di ’de/ kan mo. Aha/ mina mii uḵ ki a’di amanwoṯẖ, a’di jin midi gam ki a’di mo.

¹⁹Wakan ’pena ’cesh mo tani Tap̱a Arumgimis ki uḵa ris tombwaasho mo dhali aris ’dii kun p̱en e momis mo, dhali a’di ki ’doyu uni wathimpa en’thi/ mmohil mo ki a’di midi yer uni gway mo, dhali ma gway gunn kun yerkina wathi/ to/e kun uḵkunu mo kun ’ko ki e mo tani a’di ita gway kun yeru uni mo.

²⁰Wathi/ en’thi/ ki c̱i aris to/e gway ’baar mo dhali aris ’dii kun p̱en e momis mo dhali aris tombwaasho mo. Hili gom wathi/ en’thi/ mo tani wathi/ p̱iyi’d jin gamkunu jin midi woṯẖ a’di, a’di jin midi gam gom a’di mo.

²¹Wakan Tap̱a Arumgimis ki dhal mo jin ’ce’du e kagahara mmobiṯa p̱o/ wathimpa en’thi/ mo, dhali ki a’di di’di mmo/ish e mo tani a’di bu’thki’da simaŋ gwar ṯal ’de/ ’peni a’di mo dhali a’di ki ’dap̱ki buŋgwar is ki shuman ’twa/ mo.

²²Dhali ’pena simaŋ gwar jin bu’thkina Tap̱a Arumgimis ’peni wathiŋ gwaṯẖ mo tani a’di ki uḵ a’di mmota a’bom mo dhali guya yim e wathiŋ gwaṯẖ mo.