1Dikiri arubarikaa dà Saragu lákũ à ò nà, à kɛ̀nɛ lákũ à lɛ́ sɛ̀nɛ nà.
2Akũ à nↄ̀ↄ sì à nɛ́ ì kũ Ibrahĩo gↄ̃gbɛ̃ ũ a zĩkũnaa gũn gↄrↄ kũ Luda dìtɛnɛɛa.
3Ibrahĩ tↄ́ kpà nɛ́ pìinɛ Isaaku.
4À tↄ̃̀ↄ zↄ̃̀nɛ a gↄrↄ sↄraakↄ̃de zĩ lákũ Luda dìtɛnɛ nà.
5À kà wɛ̃̀ basↄↄro a nɛ́ pì igↄrↄa.
6Akũ Sara pì: Luda yáadↄyã kɛ̀mɛnɛ, gbɛ̃ kũ à mà pínki ni yáa dↄ kũmao.
7À pì dↄ: Oni we ò pi Ibrahĩnɛ yã mani gↄ̃ nɛ́rande ũ yá? Akũ ma nɛ́gↄ̃gbɛ̃ ì kãao a zĩkũnaa gũn.
8Kũ nɛ́ pì zↄ̃kↄ̃ kũ̀ à kɛ̃̀ yↄ̃a, akũ Ibrahĩ a kɛ̃na yↄ̃a pↄnna kɛ̀.
9Sara è nɛ́ kũ Misila nↄgbɛ̃ Hazara ì kũ Ibrahĩo dìgↄ̃ Isaaku yáa dↄmɛ,
10akũ à pì Ibrahĩnɛ: Ǹ pɛ́ zↄ̀ↄ pìia kũ a nɛ́o, zaakũ zↄ̀ nɛ́ pì ni túbi ble kũ ma nɛ́ Isaakuoro.
11Yã pìi Ibrahĩ pↄ yàka manamana, zaakũ a nɛ́mɛ,
12akũ Luda pìnɛ: Ǹsun tó n pↄ yaka n nɛ́ kũ n zↄ̀nↄgbɛ̃ pìio yã musuro. Yã kũ Sara tɛn onnɛ pínki ǹ ma, zaakũ Isaaku burinↄn onigↄ̃ pińnɛ n burinↄ ũ.
13Mani tó zↄ̀ nɛ́ pìi buri kɛ se, zaakũ n nɛ́mɛ.
14Akũ Ibrahĩ fùtɛ kↄnkↄkↄnkↄ, à pↄ́ble sɛ̀ kũ í tùruuo à kpà Hazaraa. À dìnɛ, akũ à a nɛ́ kpàa dↄ. À a gbàrɛ, akũ à gɛ̀ɛ àtɛn likara zↄ̃ Bɛsɛba gbárannan.
15Kũ í làkaḿma, à kɛfɛnna pìi tò lí gbáru,
16akũ à gɛ̀ɛ à vùtɛ arɛ kàzulɛtɛki zã̀ lɛ́n, zaakũ à pì á ye à a nɛ́ gana ero. Kũ à gɛ̀ɛ à vùtɛ zã̀ lɛ, akũ à nà ↄ́ↄdↄnaaa.
17Luda kɛfɛnna pì ↄ́ↄ dↄ mà, akũ Luda Malaika lɛ́ zù Hazarai zaa musu à pì: Bↄ́ mɛ́ à n lee Hazara? Ǹsun vĩna kɛro, zaakũ Luda nɛ́ pì ↄ́ↄ dↄ mà gu kũ à kunwa.
18Ǹ futɛ ǹ n nɛ́ pì sɛ́ ǹ a kũ a ↄa, zaakũ mani tó à gↄ̃ buri zↄ̃kↄ̃ ũ.
19Luda nↄgbɛ̃ pì wɛ́ kɛ̃̀nɛ, akũ à lↄ̀gↄↄ è. À gɛ̀ɛ à í tↄ̀ a tùru pa, akũ à sù à kpà a nɛ́ pìia à mì.
20Luda kú kũ nɛ́ pìio ari à zↄ̃kↄ̃ kũ̀. Àdigↄ̃ kú gbárannan, akũ à gↄ̃̀ tofekari ũ.
21Gↄrↄ kũ à kú Parani gbáranna pìi gũnn a da Misila bùsu nↄ sɛ̀nɛ.
22Gↄrↄ birea Abimɛlɛki kũ a zĩ̀karinↄ gbɛ̃ zↄ̃kↄ̃ Fikↄluo gɛ̀ɛ Ibrahĩ kĩnaa ò pìnɛ: Luda kú kũnwo yã kũ ntɛn kɛ gũn pínki.
23Ǹ la damɛnɛ la gↄ̃̀nↄ ǹ sì kũ Ludao kũ ĩni bo ma kpɛro ke ma nɛ́nↄ ke ma burinↄ. Lákũ ma gbɛ̃kɛ kɛ̀nnɛ nà, ǹ kɛmɛnɛ lɛ kũ bùsu kũ ń kú a gũn gbɛ̃ zĩ̀tↄ ũo.
24Akũ Ibrahĩ pìnɛ: Ma la dànnɛ.
25Akũ Ibrahĩ lↄ̀gↄ kũ Abimɛlɛki gbɛ̃nↄ sìa yã sɛ̀tɛ à ònɛ.
26Abimɛlɛki pì: Má gbɛ̃ kũ ò yã bire kɛ̀nↄ dↄ̃ro, ńdi omɛnɛ yãro, gbãran ma mà.
27Akũ Ibrahĩ sãnↄ kũ zùnↄ kũ̀ à kpà Abimɛlɛkia, akũ ò lɛ́dokↄ̃nↄ kɛ̀ kũ kↄ̃o.
28Akũ Ibrahĩ sãnunu mɛ̀n supplanↄ bò à kàtɛ ńdona.
29Abimɛlɛki a là à pì: Sã mɛ̀n suppla kũ n ń kátɛ ńdona pìnↄ yã de deramɛɛ?
30Akũ à wèa à pì: Ǹ sã mɛ̀n suppla pìnↄ sí sèeda ũ kũ makũ mɛ́ ma lↄ̀gↄↄ pìi yↄ̃̀.
31A yã mɛ́ à tò ò tↄ́ kpà gu pìinɛ Bɛsɛba, zaakũ gwen ò la dànkↄ̃nɛ.
32Lɛn ò lɛ́dokↄ̃nↄ kɛ̀ Bɛsɛba lɛ, akũ Abimɛlɛki kũ a zĩ̀karinↄ gbɛ̃ zↄ̃kↄ̃ Fikↄluo ɛ̀ra ò tà Filisitini bùsun.
33Ibrahĩ sãma lí tↄ̃̀ Bɛsɛba, akũ à Dikiri Luda Gↄrↄsĩndapinkide sìsi gwe.
34Akũ à gↄrↄ pla kɛ̀ Filisitini bùsuu pìi gũn.
