1Luda pì Yakubunɛ: Ǹ futɛ ǹ tá Bɛtɛli ǹ vutɛ gwe. Ǹ ma gbagbaki bo gwe, zaakũ ma bo ma summa gwe gↄrↄ kũ ntɛn bàa lɛ́ n vĩ̀ninɛ.
2Akũ Yakubu pì a ↄndenↄnɛ kũ gbɛ̃ kũ ò kú kãaonↄ ń pínki: À buri zĩ̀tↄnↄ tãna kũ á vĩnↄ kↄ́tɛ à zú o à á pↄ́kasanↄ lilin kɛ.
3Óni futɛ ò tá Bɛtɛli. Mani Luda gbagbaki bo gwe, zaakũ à kpàmai ma warikɛgↄrↄ zĩ, àdigↄ̃ kú kũmao gu kũ ma gɛn pínki.
4Akũ ò buri zĩ̀tↄnↄ tãna kũ ò vĩnↄ kpàa kũ pↄ́sã kũ ò dananↄ, akũ à pↄ́ pìnↄ vĩ̀ gbiri lí gbáru Sɛkɛmu sarɛ.
5Kũ Yakubu kũ a nɛ́nↄ dà zɛ́n, Luda tò vĩna wɛ̃tɛ kũ ò kú ń sarɛnↄ denↄ kũ̀ manamana, akũ ń gbɛ̃ke dí pɛ́tɛńyĩro.
6Akũ Yakubu kũ gbɛ̃ kũ ò kú kãaonↄ ń pínki kà Luzu kũ òdi pi tera Bɛtɛli, Kanaanↄ bùsun.
7À sa'oki bò gwe, akũ à tↄ́ kpà gu pìinɛ Bɛtɛli Luda, zaakũ gwen Luda bò à sùan gↄrↄ kũ àtɛn bàa sí a vĩ̀ninɛ.
8Debora kũ à de Rɛbɛka gwàri ũ yã gà gwe, akũ ò a vĩ̀ gbiri lí gbáru Bɛtɛli sarɛ. Akũ ò tↄ́ kpà lí pìinɛ Ɔ́ↄdↄlii.
9Luda bò à sù Yakubua dↄ a suna kũ Mɛsↄpↄtamiao gbɛra, à arubarikaa dàagu
10à pì: N tↄ́n Yakubu, ama oni pinnɛ Yakubu doro, sé Isaraila. Lɛmɛ à tↄ́ kpànɛ Isaraila lɛ.
11Luda pìnɛ dↄ: Luda Gbãnasĩndapinkidemɛ ma ũ. Àgↄ̃ nɛ́ i àgↄ̃ kara. Buri ni bo n kĩnaa kũ buri dasinↄ dↄ, n buri kenↄ nigↄ̃ de kínanↄ ũ.
12Mani bùsu kũ ma kpà Ibrahĩ kũ Isaakuooa kpámma kũ n burinↄ n ga gbɛra.
13Akũ Luda fùtɛ à bò gu kũ à yã ò kãaon.
14Yakubu gbɛ̀ɛ pɛ̀tɛ gu kũ Luda yã ònɛn dↄngupↄ ũ. À í tↄ̀a à nísi kùa.
15Akũ Yakubu tↄ́ kpà gu kũ Luda yã ònɛn pìinɛ Bɛtɛli.
16Akũ ò fùtɛ Bɛtɛli ò dà zɛ́n. Kũ ò kà kãni kũ Ɛflatao, Rahila nɛ́'igↄrↄ kà, akũ nɛ́'i kɛ̀a zĩ'ũ.
17Nɛ́'iwãwã a kũ̀ gbãna, akũ nↄgbɛ̃ nɛ́sɛtɛrii pìnɛ: Ǹsun vĩna kɛro, n nɛ́gↄ̃gbɛ̃ ì dↄ.
18Rahila gbãna vĩ doro àtɛn ga, akũ à tↄ́ kpà a nɛ́ pìinɛ Bɛnↄni, akũ a de tↄ́ kpànɛ Biliaminu.
19Kũ Rahila gà, ò a vĩ̀ Ɛflata kũ òdi pi tera Bɛtilihamu zɛ́n.
20Yakubu gbɛ̀ dↄngupↄ pɛ̀tɛ a miraa. Rahila mira gbɛ̀ɛ pì kú gwe ari kũ a gbãrao.
21Isaraila ɛ̀ra à dà zɛ́n, akũ à bùraa kàtɛ Migidalɛda arɛ kpa.
22Gↄrↄ kũ à kú bùsuu pìn Rubɛni gɛ̀ɛ à wùtɛ kũ Bilao, Yakubu nↄ yìgisaride, akũ Yakubu yã pìi mà. Yakubu nɛ́gↄ̃gbɛ̃nↄ ì mɛ̀n kuri awɛɛpla.
23Lea nɛ́gↄ̃gbɛ̃nↄn dí: Yakubu daudu Rubɛni, Simɛↄ, Levi, Yuda, Isaka kũ Zɛbulunio.
24Rahila nɛ́nↄn Yusufu kũ Biliaminuo ũ.
25Rahila zĩkɛri Bila nɛ́nↄn Dã kũ Nafatalio ũ.
26Lea zĩkɛri Zilipa nɛ́nↄn Gada kũ Asao ũ. Nɛ́gↄ̃gbɛ̃ kũ ò ń í kũ Yakubuo Mɛsↄpↄtamianↄn gwe.
27Akũ Yakubu kà a de Isaaku kĩnaa Mamare. À kú Kiriataba kũ òdi pi tera Ɛblↄnu sarɛ, gu kũ Ibrahĩ kũ Isaakuo vùtɛn.
28Isaaku kà wɛ̃̀ bakɛ̃ndo
29à zĩ kũ̀ yúkuyuku, akũ à gà à kàkara kũ a gbɛ̃nↄo, akũ a nɛ́nↄ Isau kũ Yakubuo a vĩ̀.
