Talun Ngana 2:7-22

⁷Ol pe Non Soke NeHalang eu hiraua ich unne ke pip hot non ia. Pe iu teua eingana nenge maulinga ana langa non neu ina ponna pe non neu sechsech haka sapele.

⁸Non Soke NeHalang tue ume e nga chaia haka ngana nge Eten pe here non nenge alahote nem ke tu ia.

⁹Pe Non Soke NeHalang poia ae nenge urana pe ngaunga ia ke te haka nga ich nenge ala hote. Pe ae nenge maulinga ana mes nga ume tunangana pe ae nenge lete matana ngana ana nga utar nenge urana pe utar nenge poreke mes pule.

¹⁰Pe ech tana e lele hot nge Paratiso ke tunge ech langa ume nem. Pe ana ech poke hot ke ech tana iri henel.

¹¹Pe ech tana nenge lele nga ich sana nenge um chalemlem ngana tuia nge Hauila, ene ech Pison.

¹²Pe um chalemlem ngana pe ae nenge inangaria heech tetu nga ich neu pule.

¹³Ech nenge Kion i ech tana nei ngana ia nenge lele nga ich lochloch nge Kus.

¹⁴Pe ech tana molngana ene Taikiris pe lele nga ich lochloch nge Asiria nga chaia haka ngana. Pe ech tana henel ngana ene Uprates.

¹⁵Iok Non Soke NeHalang talue non neu ke umume pe nauelele ume neu.

¹⁶Non Soke NeHalang hele lange non neu ke teke, “O ngau nga ae lochloch ngana nenga ume

¹⁷pe ae nenge lete matana ngana nga poinga nge urana pe poinga nge poreke o ngaua ero. Iange nenge teke o ngaua o mete sapele.”

¹⁸Iok Non Soke NeHalang hele, “Non nei i toro mana tu pe poreke i. Pomalam lape e ume hote neingana e nge pomange i ke halaulaua i.”

¹⁹Non Soke NeHalang ume hote ur inolo mur pe ngie mur nga tapa sana pe ure nemur nenge te amamo nga ich ke het pe laia iri nge Antam ke hetue iri nga eria mur.

²⁰Pe Antam tunge kolok mur eria pe ngie mur nga tapa sana pe ure inolo mur nga eria. Pe Antam pekngana pele nge halaua i ero.

²¹Pe Non Soke NeHalang poia Antam ke mamani hun toto. Antam mamani hun toto pe NeHalang siu hote kina e nga alisina pe poi hele mule nga ulina.

²²Non Soke NeHalang ume hote heie nga Antam kina nenge siu hote nga alisina ke het pe tunge i lange Antam.