1Kũ malaika gbɛ̃nↄn pla pìnↄ kà Sↄdↄmu ↄkↄsi, Lutu vutɛna Sↄdↄmu bĩni kpɛ́lɛlɛa. Kũ à ń é, à fùtɛ à gɛ̀ɛ à dàńlɛ à kùtɛńnɛ à wùtɛ a nɛ̀sɛlɛ kutɛna
2à pì: Ma dikirinↄ, á yã nna! À mↄ́ à gɛ́ kipa makũ á zↄ̀bleri bɛa. À zú o à i la, zia kↄnkↄ káakukaaku á da zɛ́n. Ò pì: Oi, óni i gãnulɛamɛ.
3Lutu nàkaraḿma manamana, akũ ò gɛ̃̀ a kpɛ́n. À ń yàrii kɛ̀ manamana à masaa kɛ̀ńnɛ, akũ ò sò.
4Ari ògↄ̃ gɛ́ wútɛ, Sↄdↄmudenↄ lìka Lutu kpɛ́i. Wɛ̃tɛ pì gↄ̃gbɛ̃nↄ kàkara gwe mámmam, kɛfɛnnanↄ kũ gbɛ̃ zↄ̃kↄ̃nↄ ń pínki.
5Ò lɛ́ zù Lutui ò pì: Gↄ̃gbɛ̃ kũ ò kìpa n bɛa ↄkↄsialanↄn kú máa? Ǹ bↄtɛ kũńwowɛrɛ, ò pãpã kɛ kũńwo.
6Lutu bò à zɛ̀ kpɛ́lɛlɛa ń kĩnaa, à gbàa tàta kũ kpɛo
7à pì: Á'a ma gbɛ̃nↄ, àsun yã bɛ̃̀nɛ kɛro.
8Má nɛ́nↄgbɛ̃nↄ vĩ gbɛ̃nↄn pla kũ ò gↄ̃gbɛ̃ dↄ̃ro, mani ń bↄtɛárɛ. Lákũ á yei nà à kɛ kũńwo, ama àsun yãke kɛ gↄ̃gbɛ̃ díkĩnanↄnɛro, zaakũ ò kìpa ma bɛamɛ.
9Ò pìnɛ: Ǹ gowɛrɛ gwe! Akũ ò pì dↄ: Gbɛ̃ dí bi gbɛ̃ zĩ̀tↄↄmɛ, akũ à ye à kɛ ó yãkpatɛkɛri ũ. Óni yã vãni kɛnnɛ de ń pↄ́la. Akũ ò kùsia kũ gbãnao, òtɛn su kpɛ́ gbàa gboro.
10Akũ gbɛ̃nↄn pla pìnↄ ↄ bò ò Lutu kũ̀ ò gɛ̃̀ kãao kpɛ́n, akũ ò zɛ́ tàta.
11Ò tò vĩ̀na gbɛ̃ kũ ò kú kpɛ arɛnↄ kũ̀ ń pínki nɛ́ fíti gbɛ̃ zↄ̃kↄ̃, akũ òtɛn kpɛ́ gbà wɛtɛ ari ò kpàsa.
12Gbɛ̃nↄn pla pìnↄ pì Lutunɛ: Dí ń vĩ la dↄↄ? Nɛ́gↄ̃gbɛ̃nↄ, nɛ́nↄgbɛ̃nↄ, n nɛ́ anzurenↄ kũ gbɛ̃ kũ ò de n gbɛ̃ ũnↄ wɛ̃tɛ gũn ń pínki. Ǹ bↄtɛ kũńwo,
13zaakũ o su ò gu dí kakatɛmɛ. Yã vãni kũ òtɛn o wɛ̃tɛpidenↄ musu gɛ̃̀ Dikiri sãn, akũ à ó zĩ ò wɛ̃tɛ pì kakatɛ.
14Lutu bò à gɛ̀ɛ à ò a nɛ́nↄ anzurenↄnɛ à pì: À futɛ ò bↄtɛ, zaakũ Dikiri ni wɛ̃tɛ dí pì kakatɛ teramɛ. Akũ òtɛn da àtɛn fàai bomɛ.
15Kũ gu dↄ̀ malaikaa pìnↄ nàkara Lutua ò pì: Ǹ futɛ ǹ n nanↄ kũ n nɛ́nↄgbɛ̃ gbɛ̃nↄn pla dínↄ sɛ́tɛ ǹ bↄtɛ kũńwo la, de ǹsun ga wɛ̃tɛ pì kakatɛnaa gũnlo yãi.
16Kũ Lutu tɛn sika kɛ, Dikiri a wɛ̃nda bò, akũ gbɛ̃nↄn pla pìnↄ a kũ̀ a ↄa kũ a nanↄo kũ a nɛ́nↄgbɛ̃ gbɛ̃nↄn planↄ, ò bↄ̀tɛ kũńwo wɛ̃tɛ kpɛ.
17Kũ ò bↄ̀tɛ kũńwo lɛ, akũ malaikaa pìnↄ do pì Lutunɛ: Ǹ bàa lɛ́ ǹ n zĩda mì sí. Ǹsun kpɛ gwaro. Ǹsun zɛ guvutɛ pìi gũnlo. Ǹ bàa lɛ́ ǹ mì pɛ́ kpinↄa de ǹsun garo yãi.
18Akũ à pìńnɛ: Oi ma dikiri! N yã nna!
19Makũ n zↄ̀bleri ma n pↄnna lè, n gbɛ̃kɛ kɛ̀mɛnɛ manamana n ma mìi sì. Ama mani fↄ̃ mà bàa lɛ́ mà kpi pìnↄ kĩnaa lero. Ari màgↄ̃ gɛ́ ká gwe, kakatɛnaa pì ni ma le mà ga.
20Ǹ lakutu ke gwa zã̀ dire. Lákũ à kãni nà, mani fↄ̃ mà bàa lɛ́ mà gɛ́ gwe. Lakutu fítimɛ sↄ̃. Ǹ tó mà bàa sí mà tá gwe, manigↄ̃ aafia. Asa à fítiroo?
21Akũ à pìnɛ: Ma n gba zɛ́, mani lakutu kũ ntɛn o pì kakatɛro.
22Ǹ bàa lɛ́ ǹ tá gwe likalika, zaakũ mani yãke kɛ gĩaro ari ǹ gɛ́ káo gwe. A yã mɛ́ à tò, ò tↄ́ kpà lakutu pìinɛ Zoa.
23Kũ Lutu Zoa lè, ifãntɛ̃ tɛn bo,
24akũ Dikiri tò tɛ́ kũ ifãntɛ̃gbↄ̃ↄo bò musu à kà Sↄdↄmu kũ Gↄmↄraola.
25À wɛ̃tɛ pìnↄ kàkatɛ kũ gbɛ̃nↄ kũ guvutɛ pìio kũ línↄ kũ sɛ̃̀nↄ pínki.
26Kũ Lutu nanↄ a kpɛ gwà, akũ à lì à gↄ̃̀ zɛna wisi gbɛ̀ ũ.
27Kũ gu dↄ̀, Ibrahĩ fùtɛ kↄnkↄkↄnkↄ, à gɛ̀ɛ gu kũ à kun yã kũ Dikirioo pìn.
28Kũ à Sↄdↄmu kũ Gↄmↄrao kpa gwà kũ guvutɛ pìio pínki, à è túsukpɛ tɛn futɛ zĩtɛ lán tãmatɛ túsukpɛ bà.
29Lɛmɛ kũ Luda guvutɛ kũ Lutu kunwa wɛ̃tɛnↄ kàkatɛ lɛ, Ibrahĩ yã dↄ̀n, akũ à Lutu bò wɛ̃tɛ kũ à kàkatɛ pìnↄ gũn.
30Kũ Lutu bò Zoa, à gɛ̀ɛ à vùtɛ kpinↄ tɛ́ kũ a nɛ́nↄgbɛ̃ gbɛ̃nↄn planↄ, kũ à kunna Zoa vĩna vĩ yãi. Akũ à gↄ̃̀ kú gbɛ̀wɛɛn kũ a nɛ́nↄgbɛ̃ pìnↄ.
31Akũ Yↄ̃ↄ pì Bãnanɛ: Ó de zĩ kũ̀, akũ gↄ̃gbɛ̃ ke kú bùsun à wútɛ kũoo lákũ òdi kɛ nàro.
32Ǹ mↄ́ ò sèwɛ̃ kákanɛ ó wútɛ kãao, de ògↄ̃ ó buri le a gãi.
33Gwãani birea ò wɛ̃ kàkanɛ, akũ Yↄ̃ↄ gɛ̀ɛ à wùtɛ kãao. Lutu dí dↄ̃ gↄrↄ kũ à wùtɛ kãao ke gↄrↄ kũ à fùtɛro.
34Kũ gu dↄ̀ Yↄ̃ↄ pì Bãnanɛ: Ma wutɛ kũ ma deo gĩa. Ò wɛ̃ kákanɛ ↄkↄsiala dↄ, ĩni gɛ́ ǹ wútɛ kãao, de ògↄ̃ ó buri le a gãi.
35Gwãani birea dↄ ò wɛ̃ kàkanɛ, akũ Bãna gɛ̀ɛ à wùtɛ kãao. Lutu dí dↄ̃ gↄrↄ kũ à wùtɛ kãao ke gↄrↄ kũ à fùtɛro.
36Lɛmɛ Lutu nɛ́nↄgbɛ̃ gbɛ̃nↄn pla pìnↄ kɛ̀ lɛ ò nↄ̀ↄ sì kãao.
37Yↄ̃ↄ nɛ́ ì gↄ̃gbɛ̃ ũ, akũ à tↄ́ kpànɛ Mↄabu. Àkũmɛ Mↄabu buri kũ ò kun ari gbãranↄ dizi káaku ũ.
38Bãna nɛ́ ì gↄ̃gbɛ̃ ũ se, akũ à tↄ́ kpànɛ Aminɛ. Àkũmɛ Amↄni buri kũ ò kun ari gbãranↄ dizi káaku ũ.
