1Ɠɔoɠɔ GALAGI ɠɛni Moize ma: «Li Falaɠɔn ʋɔ bɛ, mazɔlɔɔ nà ɠa gè kigi ɓaai, ta ná-botiɠɛ nuiti zii, nii a kɛ gè nà-poogiti kula kɛlɛma ti zaama.
2Toɠa ɓalaa ga è suɠula è-lointi ma, ta ti-lointi, pelei gè Ezipete nuiti sogai da, ta poogi ma ziiti gè ti ɠulaai kɛlɛma ti zaama. Wa kwɛɛ naa maaʋele ma ga nà ga Ɠɔoɠɔ GALAGI.»
3Moize ta Aalɔn ti liini Falaɠɔn ʋɔ bɛ, ti ɠɛ ma: «Ɠɔoɠɔ GALAGI, Eɓulu nuiti ta-ƓALAGI wooi ɠaa: ‹Ɗa yɛsu ɠɛlɛzu eyɛsu siɛgi ɓɛgele zu, ga è la ɓɔɠɔ unmaayeiɗa bɛ̀? Ɓe nà-nuɓusɛiti ba, ti li, naa ɠa a kɛ ti dɛ̀bi.
4Mazɔlɔɔ ni è la ɠɛ kɛɛni, è ʋa ɓe nà-nuɓusɛiti ba, ti ʋa li, wɛlɛ, nà ʋaazu lina ga kotogiti ɗa-yooi zu.
5Ta zooi maaɓɔɔle, nu la zooga é ʋa zooi ɠa, ti anii mɔtaiti mi nii é ná, nii sakɔtui zɛgai wo ya, guluiti kpein ti ɓɛtɛzu wo ʋɛ dɔɓɔiti su, ta naati kpein miizu.
6Ta ɗa-ʋɛlɛiti buulaave, ta ɗa-wotiɠɛ nuiti kpein ta-ʋɛlɛiti, ta Ezipete nuiti kpein ta-ʋɛlɛiti. È-ɠɛɛni, ta è-ɠɛɛni ti-ɠɛɛni ti la ɠɛni naa ɠɛɠala ɠaani, kaipa ti ɠulani, ti ɗa yɛnvu zooi nii zu, eyɛsu niima voloi.› » Moize ʋoluaveni, é ɠula Falaɠɔn ʋɔ bɛ.
7Falaɠɔn ná-botiɠɛ nuiti ti ɠɛni ma: «Zunui nii ɠa ɠɛɛzu ga balii ɠale ade ʋɛ, eyɛsu siɛ kpɛgele zu? Ɓena nui niiti ba, ti li, ti Ɠɔoɠɔ GALAGI lɛbi, ta-ƓALAGI. È la dɛ suɠwɛɛ ɓaa ga Ezipete undaa ɠana ʋili?»
8Ti ʋaani ʋolu ga Moize ta Aalɔn Falaɠɔn ʋɔ bɛ, naa ɠɛ ti ma: «À li, wo Ɠɔoɠɔ GALAGI lɛbi. Kɛlɛ ɓɛni ka ti liizu?»
9Moize gooɠaaʋoteni, é ɠɛ ma: «Gá liizu ga gá-nu niinɛiti ta gá-nu ʋɔlɔiti, gá liizu ga gi-loun zunuiti ta gi-loun anzanuiti, é ʋɛɛ gá-logani goiti ta ma wolaiti ba, mazɔlɔɔ kɛni gi fɛtii ɠula Ɠɔoɠɔ GALAGI lɛbi vaa ma.»
10Falaɠɔn ɠɛni ti ma: «Ɠɔoɠɔ GALAGI yɛ wo ʋa, ni nà ɓena wo ʋa, wo li, wa-o, wo lointi-yo! À dama ga ɓɔɠɔ, tɔɔzei maanɔɠɔi ɠa wo ɠaiziɛzu!
11Kɛlɛ é la ɠɛɛzu ɠana! Zunuiti à li, wo Ɠɔoɠɔ GALAGI lɛbi, mazɔlɔɔ naa ɠa wo maaɠaazaɠaboni!» Ti ti ɓɛɛni Falaɠɔn ʋɔ bɛ.
12Ɠɔoɠɔ GALAGI ɠɛni Moize ma: «Yeei maale Ezipete yooi maazu, nii a kɛ kotogiti ti ʋa, ti ʋu Ezipete yooi zu, ti zooi ɠa lufaiti kpein mi, nii kpein sakɔtui zɛgai.»
13Moize ná-tukpɔi maaleni Ezipete yooi maazu, Ɠɔoɠɔ GALAGI ʋaani ga folo ɠulazu ʋele viilɛi zooi zu, naama voloi pɛ ta ma ɓidii pɛ. Sobui, folo ɠulazu viilɛi ʋaani ga kotogiti.
14Kotogiti ti lɛɛni Ezipete yooi kpein ga, ti ʋuuni Ezipete yooi ɠa adaʋɛ pɛ, naa wola ɓɔini, é leʋe mɔungi ʋa, koto ge la dɛ mɔinni ɠana, kɛɠala la mɔ ɠɛa ʋelela ʋelei eyɛsu ɠɔ.
15Ti zooi maaʋɛ kpein seɠeni, zooi maaɓidini. Ti tufai kpein miini zooi ɠa, ta gulu waaiti kpein, nii kpein sakɔtui zɛni ná. Daa undu ɠila kpalaa ge la ɠɛni yɛni guluiti ga, anɛɛ tufaiti ɓalaa dɔɓɔiti su, Ezipete yooi kpein su.
16Falaɠɔn Moizeni ta Aalɔn lolini ga gaazuvilɛi, é ɠɛ ti ma: «Gè koto ɠɛa Ɠɔoɠɔ GALAGI laalɔɠɔma, wa-ƓALAGI, ta wo laalɔɠɔma.
17Kɛlɛ nà-kotoi zuvaayɛ na, niima gelei nɔ zu. Ɠɔoɠɔ GALAGI maanɛɛnɛ bɛ̀, wa-ƓALAGI, nii a kɛ é saa maanɔɠɔi nii maaɠooza bà niizu.»
18Moize ɠulani Falaɠɔn ʋɔ bɛ, é Ɠɔoɠɔ GALAGI maanɛɛnɛ.
19Ɠɔoɠɔ GALAGI ʋaani ga folo liizu ʋele viilɛi, gola yeeɠaaɓaai, é li ga kotogiti, é ti ʋili Seeli Kpoloɗɛi wu. Kotogi gila kpalaa ge la ɠɛni yɛni Ezipete yooi ná tanɔpɛ.
20Kɛlɛ Ɠɔoɠɔ GALAGI Falaɠɔn ɠigi ɓaani, Falaɠɔn la ɠɛni ɓeni Izelayɛle nuiti ba, ti ʋa li.
21Ɠɔoɠɔ GALAGI ɠɛni Moize ma: «Yeei maale geeɠɔlɔgi ʋɔ pelei, kpidii ʋɛɛ Ezipete yooi zu, kpidii nu yeei a vɔɔɠu ba.»
22Moize yeei maaleni geeɠɔlɔgi ʋɔ pelei, kpidii ʋɛɛni Ezipete yooi zu ná pɛ, nii gola ɠaaɠiligai, naa ɠɛɛni folo saʋagɔ laawu.
23Nu la ɠɛni bɔɔla ɠaazu, nu nɔpɛ ge la ɠɛni zeɠeni zeizuʋɛ folo saʋagɔ laawu. Kɛlɛ wozakalagi ɠɛni adaʋɛti pɛ, ʋɛ Izelayɛle nuiti ti ɠɛni náti.
24Falaɠɔn Moize lolini, é ɠɛ ma: «À li, wo Ɠɔoɠɔ GALAGI lɛbi. Wo-lointi ta zoo ti ʋilɛ wo ʋolu, kɛni wa-logani goiti ta ma wolaiti nɔ ɠa wa ti yɛ ʋɛ.»
25Moize gooɠaaʋoteni, é ɠɛ ma: «Kɛni è gá-loganiiti zɛ gi ya, nii a kɛ gi zalaɠaiti ta gala zalaɠaiti kula Ɠɔoɠɔ GALAGI ʋɛ.
26Gá liizu ga gá-logani ɓulugiti, ma ʋoloka gila kpalaa ge la yɛga, mazɔlɔɔ toɠa gi ta zeɠezu, gi Ɠɔoɠɔ GALAGI lɛbi la, gá-ƓALAGI. Eyɛsu gi zeeli ná, gi la kwɛɛ, nii liegɔi gá kula ga zalaɠai Ɠɔoɠɔ GALAGI lɛbi vai ma.»
27Kɛlɛ Ɠɔoɠɔ GALAGI Falaɠɔn ɠigi ɓaani, Falaɠɔn la ɠɛni kɛɛni, é ʋa ɓe ti ʋa, ti ʋa li.
28Falaɠɔn ɠɛni Moize ma: «Ɠula pɔ̀ bɛ! Dama ga ɓɔɠɔ, è ʋa gàazuʋɛ ɠa mɔnɔ, mazɔlɔɔ voloi ɗa gàazuʋɛ ʋɛtɛ da, ɗa za.»
29Moize ɠɛni ma: «È boga! Gè la mɔ è-ɠaazuʋɛ ɠaa pɛ.»
