1Nnyizinku khumuuza Munsa yoori: “Olawe wakutthanane Firawuuna, maana miiyo koomisa rooho yawe na rooho za mashawuriiya awe, yoori miiyo kithoonyeze alama zaka epo vakatthi vaya yo,
2na yoori mwiwaathatelele aaneenu na atuulwenu nanna miiyo kiwaahukhumwiyeezo amisuri na minjuza zootikinisa kirettiyeezo vakatthi vaya, khwa etthiipo pi mwinttelaavo ojuwa yoori miiyo ki Nnyizinku.”
3Aphano Munsa na Arawu khulawa okutthanana Firawuuna, yo khumuuza yoori: “Nnyizinku, Nluku wa meepereewu alupa toono: ‘Mpakha lini weeyo okatthalaka ojipushuwisa mmakhono mwaka miiyo? Owaalikhe atthu aka alawe akaaputu.
4Amana okhanyarela ohitakhi owaalikha atthu aka olawa, meesho kintiisa pala ya Mapalaka mmuti mwawo.
5Yo anteela ofinikha vathi ohisala wooneyavo, maana anteela orafuna zooshi epile zaalikhiweeyo ti vuula ya mawe mpakha na miitthi epile zinphutuwaazo mmashapa;
6anttela wiitaala nnyupa mwawo na mmanyupa wa mashawuriiya awo na wa amisuri ooshi. Vitthu amarehemu apapazenu ahooneeni siikhu epo eekhaliyeezo mphu mpakha leelo.” Elottelanaka Munsa khulankha khulaavo aphale aariivo Firawuuna.
7Aphano mashawuriiya a Firawuuna khusala alupa yoori: “Mpakha lini ntthu otu anituturushaka? Owaalikhe atthu apa alawe amwaaputu Nnyizinku Nluku aya. Khiniweeleya yoori Misuri yatapanyeya?”
8Aphano khuthuuliwa Munsa na Arawu opheya khulawaniwa mpakha wa Firawuuna, ye khuwooza yoori: “Ettani mwamwaaputu Nnyizinku, Nluku enu. Oweje, anlawaaye paani?”
9Munsa khujipu yoori: “Ninlawa na mashaapu etthu, na anakhuuluvale etthu, aaneetthu, pwittipwitthi zeetthu mpakha mompe zeetthu. Maana ninttela onrettela njampo Nnyizinku eetthu.”
10Firawuuna khuwooza yoori: “Mweeyo mwinttela onhithajiya Nnyizinku amana kuulikhani olawa na aakha enu na aana enu! Eto enthoonyeza yoori mweeyo mwinwaza shawuri zootakhala.
11Khahiyo toowo! Mwilawe alume-ru mwamwaaputu Nnyizinku maana eto ti waakivekeliyeeyo.” Munsa na Arawu khwiikariwa aphale aariivo Firawuuna.
12Aphano Nnyizinku khumuuza Munsa yoori: “Wookolele nkhono nti wa Misuri yoori ate nazope vathi apha arafune mathapa ooshi ariimo na zooshi epile zaalikhiweeyo ti vuula ya mawe.”
13Munsa khookola pakhora yawe ookolelaka nti wa Misuri, Nnyizinku khutiisa pheevo ya ntulayi khuvuma nthana wooshi mpakha osikhu. Noocha pheevo etile khutana nazope.
14Misuri yooshi khwiitaala nazope-ru woohilikhi hatha vahali, aari awaatta venkivene. Aari ahinapuwewo nkhama apo na paata ya opo khapuwiyewo theenya nkhama apo.
15Maana aafinikhiye phantte zinki za Misuri mpakha nti wooshi khwiiya wooriipa. Khurafuna zooshi epile zaalikhiweeyo ti vuula ya mawe, mathapa na mishumo za miitthi woohisali hatha etthu piishi waaza mmitthi mpakha mmashapa, nti wooshi wa Misuri.
16Firawuuna khuruma olawa okhuweliwa Munsa na Arawu woohirupazi, khuwooza yoori: “Kankosa Nnyizinku, Nluku enu na kookosani mweeyo!
17Apho kinuuvekelani yoori mwikiswaamihi twampi yaka swaafu eti theenya na mwinvekele Nnyizinku, Nluku enu yoori akilaze pala eti yoofwiwa.”
18Munsa paata ya olaavo aphale vaya aariivo Firawuuna khunvekela Nnyizinku.
19Aphano Nnyizinku khuvumisa pheevo yawaatta ya phalalazi, ethiito khukhupa mapalaka ooshi khwiitthela mpahari yookhuttuwa; khuhisalimo hatha lipalaka mmote nti opule wa Misuri.
20Ila nalelo Nnyizinku khuumisa rooho ya Firawuuna; ye khuhitakhi owaalikha meezirayiilu olawa.
21Aphano Nnyizinku khumuuza Munsa yoori: “Makhono awo olansele pinkuuni yoori Misuri yooshi yiiye yoofinikhiwa ti yiiza yookhomaala.”
22Munsa khookolela nkhono awe otulu, Misuri yooshi khufinikhiwa ti yiiza yookhomaala khwa siikhu ttatthu.
23Khuhisala oonana mmote na nzaawe, khaarivo mmote aaliyeevo vahali aariivo khwa siikhu ttatthu; ila meezirayiilu ooshi mmanyupa mwaya yaarimo nuuru.
24Aphano Firawuuna khunkhuwela Munsa khumuuza yoori: “Ettani mwamwaaputu Nnyizinku enu. Ila esale pwittipwitthi zenu na mompe zenu paasi; ila aakha na aana mwilawane.”
25Munsa khujipu yoori: “Weeyo ona ya oninkha nyama za orettela twaha na olukuza, yoori nimwinkhe Nnyizinku, Nluku eetthu.
26Na nyama zeetthu nilawaka nintta othuula hatha likhope khalinsala, maana ninttela orumeyela etthiipo yoori nimwaaputu Nnyizinku Nluku eetthu, khanijuweeni nyama-ni ninttelaaye omwaaputu-na Nnyizinku mpakha ofiya.”
27Ila Nnyizinku khuumisa rooho ya Firawuuna, ye khuhitakhi owaalikha olawa.
28Firawuuna khumuuza Munsa yoori: “Oleevo apha na ohirutelevo theenya! Siikhu onttelaavo okoona theenya ontta ofwa.”
29Munsa khuri: “Walikanisa! Akinteela woona theenya wuuso awo.”
