1Dikiri pì Musanɛ: Ǹ gɛ́ Firi'auna kĩnaa, zaakũ ma a kù kɛ gbãna kũ a ìbanↄ, de mà a daboyã dínↄ kɛ ń tɛ́,
2de ǹ le ǹ o n nɛ́nↄnɛ kũ n daikorenↄ lákũ ma wɛ́ tã̀ Misilanↄa nà kũ daboyã kũ ma kɛ̀ ń tɛ́nↄ, àgↄ̃ dↄ̃ kũ makũmɛ Dikiri ũ.
3Akũ Musa kũ Harunao gɛ̀ɛ ò pì Firi'aunanɛ: Dikiri Eberunↄ Luda pì, ĩnigↄ̃ kun mìnatɛnaarɛ sari ari bↄrɛmɛɛ? Ǹ a gbɛ̃nↄ gbarɛ ò gɛ́ donyĩ kɛarɛ.
4Tó n gi ń gbarɛi, zia ani kwanↄ ká n bùsun.
5Ò da zĩtɛla, oni gu ero. Ò lɛ́tɛ pↄ́ kũ ò gↄ̃̀nnɛ legũgbɛɛ gbɛranↄa kũ línↄ pínki.
6Ò pa n kpɛ́nↄ gũn kũ n ìbanↄ pↄ́nↄ kũ Misilanↄ pↄ́nↄ pínki. N denↄ kũ n dizinↄ dí a taka e zikiro, zaa gↄrↄ kũ ò vùtɛ bùsu dín ari kũ a gbãrao. Akũ Musa ɛ̀ra à bò Firi'auna kĩnaa.
7Firi'auna ìbanↄ pìnɛ: Gbɛ̃ pìnↄ nigↄ̃ kisira dawá lɛ ari bↄrɛɛ? Ǹ gbɛ̃ pìnↄ gbarɛ ò gɛ́ donyĩ kɛ Dikiri ń Ludanɛ. Ń dↄ̃ kũ Misila kàkatɛroo?
8Akũ ò ɛ̀ra ò sù kũ Musao kũ Harunao Firi'auna kĩnaa, à pìńnɛ: À gɛ́ donyĩ kɛ Dikiri á Ludanɛ. Á dínↄ mɛ́ oni gɛ́ɛ?
9Musa wèa à pì: Nɛ́ fíti gbɛ̃ zↄ̃kↄ̃. Óni gɛ́ ó pínkimɛ kũ ó nɛ́gↄ̃gbɛ̃nↄ kũ ó nɛ́nↄgbɛ̃nↄ kũ ó sãnↄ kũ ó blènↄ kũ ó zùnↄ, zaakũ Dikiri dikpɛn ótɛn gɛ́ kɛ.
10Akũ à pìńnɛ: Tó ma á gbárɛ kũ á nↄgbɛ̃nↄ kũ á nɛ́nↄ á pínki, ásarumɛ, Dikiri á bo! À laakari kɛ! Átɛn wɛtɛ à fɛ̃ kũmaomɛ.
11Oi! Á gↄ̃gbɛ̃nↄ mɛ́ oni gɛ́ donyĩ kɛ Dikirinɛ, zaakũ lɛn a gbɛ̀ka lɛ. Akũ ò pɛ̀ḿma Firi'auna arɛ.
12Dikiri pì Musanɛ: Ǹ n ↄ dↄ Misila bùsula, kwanↄ ni ká ò sɛ̃̀ kũ lá kũ ò bùtɛ legũgbɛɛ gbɛranↄ ble pínki.
13Kũ Musa a gòo dↄ̀ Misilala, Dikiri bò kũ ĩao ifãboki kpa, àtɛn pá bùsuu pìia fãnantɛ̃ kũ gwãanio zɛnaa sari. Kũ gu dↄ̀, ifãboki ĩa pìi sù kũ kwanↄ.
14Akũ kwa pìnↄ sù ò dà Misila bùsula pínki. Ń dasi de a yã pↄ́nↄla, a taka ni kɛ ziki doro.
15Ò dà zĩtɛla gu sĩnda pínki, akũ zĩtɛ sira kũ̀. Ò sɛ̃̀ kũ lánↄ kũ línɛ kũ ò bò legũgbɛɛ gbɛranↄ blè pínki. Sɛ̃̀ɛ kũ láo kú Misila bùsun doro.
16Gwe gↄ̃̀nↄ Firi'auna Musa kũ Harunao sìsi à pì: Ma durunna kɛ̀ Dikiri á Ludanɛ kũ ákↄ̃nↄ.
17À sùru gɛ̃̀n do dí kɛmɛnɛ kũ ma durunnao, à kútɛ kɛmɛnɛ Dikiri á Ludanɛ à gaga dí kɛ̃ma.
18Kũ à bò Firi'auna kĩnaa, à kútɛ kɛ̀ Dikirinɛ.
19Akũ Dikiri bò kũ ĩa gbãnao ifãlɛtɛ kpa, à sù à kwanↄ sɛ̀tɛ à kà Isira Tɛ̃ran. Bee kwa mɛ̀n do dí gↄ̃ Misila doro.
20Ama Dikiri Firi'auna kùu kɛ̀ gbãna, akũ à gì Isarailanↄ gbarɛi.
21Dikiri pì Musanɛ: Ǹ ↄ sɛ́ musu, gusira kũ oni fↄ̃ ò ↄ kɛa ni da Misilala.
22Kũ Musa a ↄ dↄ̀ musu, akũ gusira níkiniki dà Misila gu sĩnda pínkia ari gↄrↄ aakↄ̃.
23Òdi kↄ̃ ero, gbɛ̃ke dí bo a gbɛ̀nlo ari gↄrↄ aakↄ̃ pìia. Ama gupura kú gu kũ Isarailanↄn kun pínki.
24Akũ Firi'auna Musa sìsi à pì: À gɛ́ donyĩ kɛ Dikirinɛ kũ á nↄgbɛ̃nↄ kũ á nɛ́nↄ á pínki, ama à á sãnↄ kũ á blènↄ kũ á zùnↄ tó.
25Musa pì: Ǹ tó ògↄ̃ ó sa'opↄnↄ kũ sa'opↄ kũ òdi ká tɛ́n à tɛ́ kũnↄ kũna, de ò le ò Dikiri ó Luda gbagbao.
26Séto ò gɛ́ kũ ó pↄ́kãdenↄ, bee mɛ̀n do ni gↄ̃ro, zaakũ ń tɛ́n óni sa'opↄnↄ bon ò Dikiri ó Luda gbagbao. De ò kpɛ́ ò ká gwe, ó dↄ̃ pↄ́ kũ óni sɛ́, ò sa ooa gĩaro.
27Dikiri Firi'auna kùgbãna kũ̀, akũ adi we à ń gbarɛro.
28Firi'auna pì Musanɛ: Ǹ gomɛnɛ gwe! Ǹsun tó ó wɛ́ kɛ pla doro. Zĩ kũ ó wɛ́ kɛ̀ pla, n gamɛ.
29Akũ Musa pì: Lákũ n ò nà, óni kↄ̃ e doro.
