1Beto asa, si zama la koe Mosese se Zihova, “La mamu dogoria sa baṉara, ura ele va luli nia nana hiniva Rau si asa, meke gua tugo sari nana palabatu pude maqu taveti koa rini sari na tiṉitoṉa variva magasadi hire.
2Pude boka vivineini gamu koari na tumia, na tudia rina tumia, gua meke va duviduvili Rau sari na tie pa popoa Izipi, totoso taveti Rau sari na tiṉitoṉa variva magasadi. Meke kaqu gilania gamu doduru sapu Arau se Zihova.”
3Ke topue la koasa baṉara sari Mosese e Eroni, meke zama, “Se Zihova, sa Tamasa tadi na tie Hiburu si zama guahe: ‘Ve kote seunae gua meke kaqu koromu pude va tabe Au goi? Mu va malumu taloai sari na Qua tie, pude kaqu vahesi Au rini, gua.
4Ego, be korapa koromu va malumi tugo goi si arini, pude va taloai gua, si kaqu va atui Rau vugo pa korapa mua popoa sari na kupokupo.
5Kaqu soku hola si arini, meke kaqu opo tamunia sa pepeso, meke gani betoi rini sari na huda saripu koa hola, meke sari doduru tiṉitoṉa saripu lopu va matei rina kabukabue aesi saripu hoqa gore mae guana ruku pa galegalearane.
6Meke kaqu siṉi rini sari na vetu tadi na tie nomadi, meke sari doduru vetu tadi na mua tinoni. Kaqu kaleana hola nia rini sa tiṉitoṉa sapu ele hoke dogoria ri na tiatamamia pukerane,’ ” gua si asa. Meke taliri vura taloa se Mosese.
7Meke zama la koasa baṉara sari nana palabatu, “Ve seunae gua si kaqu poni gita tinasuna sa tie hie si gita? Va taloai mo sari na tie, pude boka vahesia rini se Zihova sa dia Tamasa. Vegua lopu gilania goi sapu ele ta ṉovala sisigiti sa popoa Izipi,” gua si arini.
8Ke ta turaṉa pule la koasa baṉara sari Mosese e Eroni, meke zama la koa rini si asa, “Boka taloa si gamu, mamu vahesia se Zihova sa mia Tamasa. Mamu tozi nau sapu ari sei si boka taloa?” gua si asa.
9Meke olaṉa se Mosese, “Gami doduru si kaqu taloa, sari mami koburu, meke sari na mami barogoso na kaleqe. Kaqu turaṉi tugo gami sari na mami bulumakao, sina kote tavetia gami si keke inevaṉa pude va lavatia se Zihova,” gua se Mosese.
10Meke zama sa baṉara, “Zama hinokara si arau koe Zihova, sapu namu lopu kaqu va malumigo rau, pude turaṉi sari na mia barikaleqe na koburu! Ele ta gilana valeana, sapu korapa kuhana nia gamu si keke hiniva kaleana pude vura taloa beto pa popoa Izipi.
11Namu lokari hokara! Gamu na tie mo si kaqu taloa, meke vahesia se Zihova,” gua. Meke tupele vurani rini pa kenuna sa baṉara sari Mosese e Eroni.
12Beto sapu gua asa, si zama la koe Mosese se Zihova, “Ego, mu ovulu va sage nia sa limamu pa popoa Izipi, pude va maei sari na kupokupo. Kaqu mae gani betoi rini sari doduru likakalae saripu toqolodi, meke sari doduru likakalae saripu veko hola i rina kabukabue aesi saripu hoqa gore mae guana ruku pa galegalearane,” gua si Asa.
13Ke ovulu va sagea e Mosese sa nana kolu hodu, meke va givusu maea e Zihova sa givusu gevasa, meke raza koasa popoa koasa doduruna sa rane meke boṉi. Meke pana munumunu si tava mae sari na kupokupo.
14Meke mae koari na rovana si arini, meke koa koasa doduruna sa popoa. Meke nomana lavata sa rovana kupokupo asa, sapu lopu ele hite ta dogoro, babe sapu lopu kaqu hite ta dogoro pule kaiqa rane.
15Meke opo betoa mo rini sa doduru pepeso, osolae muho toa nana sa popoa. Meke gani betoi rini sari doduru likakalae, meke sari doduru vuadi ri na huda, saripu veko hola i rina kabukabue aesi, saripu hoqa gore mae guana ruku lavata pa galegalearane. Meke namu loke elelo buma hokara si hite koa koa keke huda babe linetelete pa doduru vasina pa popoa Izipi.
16Meke tuture tioki sa baṉara sari Mosese e Eroni meke zama, “Ele tavete va sea si rau koe Zihova sa mia Tamasa, meke koa gamu.
17Ego, mamu taleoso nia sa qua sinea kamahire, mamu varavara la koe Zihova sa mia Tamasa, pude vagi va seu ia sa vina kilasa lavata hie koa rau,” gua si asa.
18Meke taluarae koasa baṉara se Mosese, meke varavara la koe Zihova.
19Meke hobe la nia givusu togarauru, sapu ṉiṉira hola e Zihova sa givusu gevasa, sapu vagi taloa ni meke paleke lani koasa koqu lavata Suezi sari na kupokupo, meke lopu keke kupokupo si koa hola pa doduruna sa popoa Izipi.
20Ba va luli nia nana hiniva e Zihova sa baṉara, meke lopu va malumi sa sari na tinoni Izireli pude taloa.
21Beto asa, si zama la koe Mosese se Zihova, “Mamu ovulu sage la nia pa galegalearane sa limamu, meke kaqu opo tamunia na hinuporo sa doduruna sa popoa Izipi sa moatana gua sa huporo asa si variva matagutu na huporo sisigiti,” gua si asa.
22Meke ovulu sage nia e Mosese pa galegalearane sa limana, meke huporo toa nana koari ka ṉeta rane sa doduru vasina pa popoa Izipi.
23Meke lopu boka varidogori sari na tinoni pa popoa Izipi, ke lopu boka vura pa dia vetu koasa totoso asa. Ba sa kalalasa si koa nana, vasina sapu koa ri na tinoni Izireli.
24Meke tiokia sa baṉara se Mosese meke zama, “Kaqu taloa beto si gamu doduru; mamu la vahesia se Zihova. Kaqu turaṉa betoi gamu sari na mia barikaleqe na koburu. Ba sari na mia sipi, na qoti meke sari na mia bulumakao si kaqu veko hola i gamu tani,” gua sa baṉara.
25Meke olaṉa se Mosese, “Ego, be gua asa si kaqu poni gami kurukuru goi, si gami pude mami va vukivukihi va uququ la koe Zihova, sa mami Tamasa.
26Namu lokari, kaqu turaṉa betoi gami sari na mami kurukuru, meke loketoṉa si kaqu ta veko palae. Sina gami telemami si kaqu vizati sari na kurukuru pude tana mami vinahesi koe Zihova, sa mami Tamasa. Lopu kaqu gilania gami, sapu na kurukuru sa si kaqu vahesi la nia gami koa Sa, osolae kamo si gami vasina,” gua se Mosese.
27Meke va luli nia nana hiniva e Zihova sa baṉara, meke lopu va malumu taloai sa si arini.
28Meke zama la koe Mosese si asa, “Mu vura taloa! Lopu hiva dogoro puleigo rau! Koasa rane dogorigo rau, si kaqu mate si goi!” gua sa baṉara.
29Meke olaṉa se Mosese, “Toṉoto mate si gunia goi. Lopu kaqu dogoro puleau goi,” gua si asa.
