Matäus 23

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹IESUS ap kotin kaparok ong pokon o sapwilim a tounpadak kan,

²Masani; Saunkawewe o Parisär akan kin mondi nan deun Moses.

³Ari, karos me re indang komail, i me komail en wia o kapwaiada, a der ale sang ar wiawia kan; pwe irail kin indada, ap sota kapwaiada.

⁴Re kin pira pena kapwa en wisik me toutou melel, ap kidang pon apar en aramas, a irail sota men sairki sondin pa arail.

⁵O re kin kapwaiada ar wiawia kan karos, pwe aramas en ududial. Pwe irail kin kadälape ar kisin likau en kataman o kalaudela ni kailan ar likau.

⁶Irail kin ngongki mondi ni tapin tepel ni kamadip o, o leppandam nan sinakoke kan.

⁷O re kin mauki, aramas en ranamau ong irail nan deun net, o aramas en wia kin ir Rapi, Rapi,

⁸A komail der ngongki, aramas en wia kin komail Rapi, pwe me ta men omail Saunpadak, a komail pirien pena.

⁹O komail der kaadaneki meamen sam nan sappa, pwe amen Sam omail, me kotikot nanlang.

¹⁰O komail der ngongki, aramas en wia kin komail saumas, pwe me ta men omail Saumas: Kristus.

¹¹A me lapalap re omail, en omail papa.

¹²Pwe me pan kasapwilada pein i, pan sapwilidi, a me pan kasapwilidi pein i, pan kasapwilada.

¹³Suedi ong komail saunkawewe o Parisär akan, malaun komail! Komail kin ritingidi wein nanlang mon aramas akan, pwe komail sota pan pedelong, a me men pedelong, komail sota kin mueid ong.

¹⁴Suedi ong komail saunkawewe o Parisär akan, malaun komail! Komail me ngopur sang im en li odi kan ap liliasos kapakap reirei. Omail kalokolok pan laud melel.

¹⁵Suedi ong komail saunkawewe o Parisär akan, malaun komail! Komail kin pidipidaki sed o sap, pwen wiada proselit amen, a lao wialar, komail ap pan wia kin i toun pweleko amen, me sued sang komail.

¹⁶Suedi ong komail saunkalua maskun, komail me kin inda: Meamen kin kaukila im en kaudok, dene sota katepa, a me kin kaukila kold en im en kaudok, i me pung.

¹⁷Komail pweipwei o maskun, pwe da me kasampwal ren kold de im en kaudok o, me kin kasarauiala kold?

¹⁸O meamen kin kaukila pei saraui, dene sota katepa, a me kaukila mairong, me mi poa dene i me pung,

¹⁹Komail pweipwei o maskun, pwe da me kasampwal ren mairong de pei saraui, me kin kasarauiala mairong?

²⁰Ari, meamen kaukila pei saraui, kin kaukila i o meakan, me mi poa.

²¹O meamen kaukila im en kaudok, king kaukila i iangaki i me kotikot lole.

²²O me kaukila nanlang, kin kaukila mol en Kot o me kin kaipokedi ong poa.

²³Suedi ong komail saunkawewe o Parisär akan, malaun komail! Komail kin mairongki eisokkis eu en minse, o til, o kimel, ap sota insenoki kusoned en kapung kasampwal akan: Pung, o kadek, o poson. Komail wiada mepukat, ap pil kapwaiada me tei kan!

²⁴Saunkalua maskun komail, me kin isenoki kisin am en wel, ap katalala kamel!

²⁵Suedi ong komail saunkawewe o Parisär akan, malaun komail! Pwe komail kin kamakelekel kasak o dal liki, a lol me dir en me re kuliada o me sued.

²⁶Parisär maskun koe, kamakelekele mas lol en kasak o dal akan, pwe pali liki en pil makelekeleda!

²⁷Suedi ong komail saunkawewe o Parisär akan, malaun komail! Komail rasong sousou kan, me sementen, me kin sansal kaselel, a lole me dir en ti en me melar akan o song en saut karos.

²⁸I duen komail, me sansal pung mon aramas, a lole komail me dir en malaun o sapung.

²⁹Suedi ong komail saunkawewe o Parisär akan, malaun komail! Pwe komail kin apapwali sousou en saukop akan o kapwataki sousou en me pung kan.

³⁰Ap inda: Ma kit mia ni muein sam atail akan, kit sota pan iang irail kamela saukop akan.

³¹Ari, pein komail kin kadede, me komail nain me kamelar saukop akan.

³²A komail kaunsokala wiawia en sam omail akan!

³³Komail serpent o wan oter akan! Pala komail pan piti sang kadeik en nan pweleko?

³⁴Kilang, i me I kadara dong komail saukop akai, o me lolekong kai, o saunkawewe kai; a akai irail, me komail pan kamela, o kalopuela, o akai komail pan kaloke nan omail sinakoke kan, o komail pan paki irail sang nan eu kanim ong nan eu.

³⁵Pwen kapokon ong komail nta makelekel karos, me kapwilipwilidier nan sappa sang ntan Apel pung kokodo lel ntan Sakarias, nain Parakias, me komail kamelar nan pung en im en kaudok o pei saraui.

³⁶Melel I indai ong komail, mepukat pan pwai ong di wet.

³⁷O Ierusalem, Ierusalem, me kin kamela saukop akan o kate me pakadara dong uk kan; pan pak toto, me I pan kapokon pena noumail akan, duen litok kin kompwal pena na purok kan pan pa a, a komail kang.

³⁸Kilang, im omail pan tanla.

³⁹Pwe I indai ong komail, komail solar pan kilang ia sang ni ansau wet, lao komail pan inda: Meid iasanai, me kotido ni mar en Kaun o!