Text copied!
CopyCompare
Enga Baibolo Epapu Kapilyetae Doko - Matyu

Matyu 23

Help us?
Click on verse(s) to share them!
1Jisasame endakali kambu andake piamipi, baanya disaipolopi, dupa lamaiyoo,
2“Loo mana nyepae akalipi, Parasaipi, dupame Mosesanya panda nyoo mana lengema.
3Dopana, dupame nyakama langitamino dupa pitaka pyepape. Dopaka doko, dupame mana lelyaminoli pyoo, nyakama tange watao minala naengemana, nyakamame dopa napyepape.
4Dee dupame kenda pipae dupa, endakali dupanya lataiyanya nyoo sakamaitala, nyakamame kukipi mende nisoo sala naengema.
5Nyakama alyasale joo kalyamano lao masetala, pilyamino dupa pitaka, endakali dupame kandamili laka lao sakao pingima. Dupame Gotenya pii dokonya mendatupa, pepa pyanya bokosa yakane mendenya mandipala, langalunya angatatenge joo petala, mende kinginya kitambu joo pisetala, endakalimi kandamili lao paengema. Dee nyakamanya yonge pee ketae pingi punanya, yati pipae londe dupa, anjinya pyandatala paengemaka.
6Dee Judamanya lotuu lelyamipi, nee andake nelyamipi, dupanya nyakama enomba nyoaka pitipumali laka lao masingima.
7Dee kamapu dupanya endakali dupame, mana lenge akali lao, kingi nyoo, mambo pilyaminopa, dopaka pipimi laka lao masingima.
8Dopa pingimaka doko, nyakamanya Mana Lenge Akali mendai iki kalyamo, dokonya nyakama kaiminingiaka kalyaminona, endakali dupame nyakama kandao, mana lenge akali lena nalalapape.
9Gote kaitinya katenge doko iki, nyakamanya Takangena, nyakamame isa yuu dakenya endakali mende, lalyoo takange laa naeyalapape.
10Nyakamanya Akali Andake mendai iki kalyamo, doko baa Kraisana, endakali dupame nyakama kandao, akali andake lena nalalapape.
11Nyakamanya mendeme akali andake joo katapuli lao, masetamo doko baa, nyakamanya kalai akali joo katapenge.
12Endakali mendeme tange kenge minalyoo katatamo doko, baa kenge anasale joo seta. Dee endakali mendeme tange kenge minanao katatamo doko, baa kenge alyasale joo seta.
13“Mosesanya loo mana nyepae akalipi, Parasaipi, nyakama Gote watao miningi mane-mane pingima dupa, koeyatamina kandao kalyepape. Nyakama Gotenya isingi mate dokonya napenge dupame, endakali paanya pipimi dupanya kaita lyokelyamino.
15“Mosesanya loo mana nyepae akalipi, Parasaipi, nyakama Gote watao miningi mane-mane pingima dupa, koeyatamina kandao kalyepape. Nyakamame disaipolo mende nyemana lao kutao, solowata yangitena pata, yuu waka dupanya pata pingima. Dokopa endakali mende nyilyamino doko, nyakamanya mana koeyapae dupa lamailyaminopa, baa etete koenge.
16“Akali lenge monda dupame, endakali waka dupa kii miningima-lamo dupa, nyakama koeyatamina kandao kalyepape. Nyakamame endakali dupa mana lamaiyoo pituu, 'Endakali mendeme lotuu anda andake dokonya kenge latala, kiningi etete mende pituna latala, napitamo doko yakaka. Dopaka doko, endakali mendeme lotuu anda andake dokonya golome wasepae, setamo dupanya kenge latala, kiningi etete mende pituna latamo dokome, kaeyala naeyao, latamoli pipengena' lengema.
17Nyakama lenge monda kyakaenge! Lotuu anda andake dokome, golome wasepae andakote silyamo dupa, Gote maitaena lao auu pisingi. Tenge dokonya, golome wasepae andakote silyamo dupame, lotuu anda andake doko ita naminingi. Lotuu anda andake dokome, golome wasepae andakote silyamo dupa, ita miningi.
18Dee nyakamame endakali dupa mana lamaiyoo pituu, 'Endakali mendeme lotuu anda andake dokonya, alta dokonya kenge latala, kiningi etete mende pituna latala, napitamo doko yakaka. Dopaka doko, endakali mendeme opa alta ketae setamo dokonya, kenge latala, kiningi etete mende pituna latamo dokome, kaeyala naeyao latamoli pipengena' lengema.
19Nyakama lenge monda daape! Alta dokome opa ketae silyamo dupa, Gote maitaena lao auu pisingi. Tenge dokonya, opa alta ketae silyamo dupame, alta doko ita naminingi. Alta dokome opa, alta ketae silyamo dupa ita miningi.

20Dopana, endakali mendeme alta dokonya kenge latala, kiningi etete mende pituna latamo doko, opa alta ketae setamo dupa, apata kandao lata.
21Dee endakali mendeme lotuu anda andake dokonya, kenge latala, kiningi etete mende pituna latamo dokome, lotuu anda andake dokonya katenge Gote doko, apata kandao lata.
22Dee endakali mendeme, kaiti dokonya kenge latala, kiningi etete mende pituna latamo dokome, Gotenya petenge toko dokopa, toko dokonya petenge Gote dokopa, apata kandao lata.
23“Mosesanya loo mana nyepae akalipi, Parasaipi, nyakama Gote watao miningi mane-mane pingima dupa, koeyatamina kandao kalyepape. Nyakama lenge monda dupame, endakali waka dupa kii miningima-lamo. Nyakamame takaepi, mondaipi, itamaiyapi, dupa malu 10-pela mokosoo setapala, dutupanya malu mendai Gote maingima. Dopa pingimaka doko, mana epeme endakali tolasingipi, kondo kaengepi, Gote tungi pingipi, loo andake dutupa nyakamame watao naminingima-lamo. Nyakamame loo yakane dupa watao miningimali pyoo, loo andake dupa apata watao minalapape. Dopa napitamino doko, nyakamanya kapo mendenya pongena mende, koko setamo doko, nyoo nepatala, kamele mende nyoo nengekaita goe lapimili dopale-lamo.
25“Mosesanya loo mana nyepae akalipi, Parasaipi, nyakama Gote watao miningi mane-mane pingima dupa, koeyatamina kandao kalyepape. Endakali mendeme kapopi, pelesapi, ketaetena iki wasa pyatala, koko wasa napingili pyoo, nyakamanya yongeme Gote watao miningi mane-mane petala, nyakama iki lao masingipi, putiti kaengepi, mana dopaleme mona andaka tumbatae kalyamo.
26Nyakama Parasai dupa lenge monda! Nyakamame kapopi, pelesapi, kaimala pipae dupa koko wambao wasa pyapenge. Pyataminopa, ketaetena wasa pyatae katata.
27“Mosesanya loo mana nyepae akalipi, Parasaipi, nyakama Gote watao miningi mane-mane pingima dupa, koeyatamina kandao kalyepape. Endakali malu yati petae katengeli pyoo, nyakama kalyamino. Malu ketae yatimi auu pilyamopa, malu koko tamuo, endakali kuli akipi aimi koenge dopale joo nyakama kalyamino.
28Dokaita joo, nyakamanya yongeme tolatae mane-mane pilyaminopa, mona andaka endakali yango minakasoo, koeyapae mana miningi dupa tumbatae kalyamo.
29“Mosesanya loo mana nyepae akalipi, Parasaipi, nyakama Gote watao miningi mane-mane pingima dupa, koeyatamina kandao kalyepape. Nyakamame propeta kumiami dupanya, malu-kisa anda epe dupa petala, endakali tolatae kumilyami dupanya, malu dupa yati pisingima.
30Dopa pyoo pituu, 'Wamba naimanya yumbange kateamino gii dokopa, naima kateamali doko, yumbange dupame propeta dupa pyao kumasiaminopa, naimame yumbange dupa nisala naeyamalina' lengema.
31Nyakamame dopa lelyamino dokome, nyakama propeta dupa pyao kumasiamino, akali dupanya mandipaena lao panelyamo.
32Dopana, nyakamanya yumbange dupame kalai piamino doko, nyakamame indupa pyoo etasalapape.
33Nyakama koo kanopatonya mandipae dupa, Goteme ele panda koo dokonya watao pyandatamo doko, aipa petala wanditamipi?
34Nambame propetapi, masepae singi akalipi, mana lenge akalipi, dupa nyakamanya kainanya epena lato. Dopa pitupa, nyakamame dupanya yangi dupa pyao kumasetami. Yangi dupa pyao poko itanya yukutami. Yangi dupa nyakamanya lotuu anda dupanya konjame pyatami. Yangi dupa nyakamame taono mendenya pituu, mendenya watao paeyao pyatami.
35Nyakamame dopa pitaminosa, wamba akali tolatae kateamino dupa pitaka pyao kumasiami dokonya, tenge doko nyakama-kisa seta. Akali tolatae Abele lenge doko, pyao kumasiami dokonya pituu, Berekia ikiningi Sakaraeya, lotuu anda andakepa, altapa, dolaponya kainanya pyanya seteami, dokonya tuu lao tenge doko, nyakama-kisa seta.
36Dopa piamino dupa pitakanya, yanu doko endakali indupa palelyamino dupa-kisa, ipatana lao nambame nyakama kiningi langilyona” lea.
37Jisasame Jerusalema tange dupa kondo kaeyao, “O Jerusalema Jerusalema! Nyakamame propeta dupa pyao kumasoo, Goteme epena latae akali dupa, kaname pyao kumasoaka katengema. Paa longosa, nambame nyakama nyoo kambu pyatala, yaka matakaimi yakane dupa, papa pundi-pundi, yapu nengeli pitoo lao masipupa, nyakamame tanga lelyamino.
38Goteme nyakamanya lotuu anda andake doko yakinatamopa, anda doko mee katata.

39Nyakamame 'Akali mende, Goteme epena lapumupa, epelyamo doko Goteme auu pisetaena' latamino dokopa, nyakamame namba dee kandatamina lao, nambame nyakama langilyona” Jisasame lea.