1Dameŋ ira Jesuzi ŋic gâcne â motecfâcne ʒiŋuc jazawec:
2“Mosere ŋeŋetacko miti qaqazu â farisaio ŋeeŋgopieŋ.
3Irec dâŋ ŋaza mutâc epie manarâ reŋkenʒepieŋ, â jaŋacne jujuo ine mi junʒepieŋ. Jaŋe miczi mumune i mueŋgopieŋ, â rereŋke ine mi reŋkeeŋgopieŋ.
4Jaŋe tagi ŋemâcne bâmâckerâ fai‐ŋeŋicko râehuc jaŋacne metariŋ jueŋgopieŋ.
5Wiac eeŋgopieŋ i ŋiczi honebâc‐jopaniŋte sawa eeŋgopieŋ. Jaŋe miti nunumuzi mâc qâʒere‐jeŋic eme qonaŋkerâ ma fuŋne fuŋne rorâ erioŋ barioŋ jueŋgopieŋ.
6Ehuc tutumaŋko â mitificko ŋicbomboŋ ŋeŋeoa micne ŋeniŋte mueŋgopieŋ.
7Ŋic ŋokac omanezi hatao mu ʒeri ejareniŋte masu wânʒâŋ jueŋgopieŋ, erâ ʒâŋe‐jeŋic qaqazu mujarepie mananiŋte hazec râehuc jueŋgopieŋ.
8Ŋoŋe ine qaqazu muŋareniŋte mi munʒepieŋ. Qaqazu‐ŋeŋic mocjaha jukac, ŋoŋe ine qoqomâ sasawa.
9Erâ mâreŋko ŋic mocte mamac mi munʒepieŋ, Mamac‐ŋeŋic mocjaha jukac, sambâŋko hâcne.
10Erâ micne bapa muŋareniŋte wâc mi munʒepieŋ, micne bapa‐ŋeŋic mocjaha, Kristo hâcne.
11Ŋoŋerao micne fekicne juocmuzi gâcne ŋoŋere kiŋaŋ qaocmu.
12Moc e jahacne maŋte fehuc jume bawahazo, â moc e jahacne maŋte wahahuc jume bafezo.
13“Jei, miti qaqazu â farisaio, burecŋic ŋoŋe! Ŋic jaŋe sambâŋte uucmaŋko raʒizo mupie hata âte bâzicke‐jareeŋgopieŋ. Ŋaŋacne mi raʒihuc jaŋe raʒizo mupie hecke‐jareeŋgopieŋ.
14Jei, miti qaqazu â farisaio burecŋic, ŋoŋe hozec bekâ nunumu ʒorazi bâmiriŋ‐jopahuc ficjeŋic kâŋgâc jowac roeŋgopieŋ. Eme irec okacne baafeckehuc mi eŋarezo.
15Jei, miti qaqazu â farisaio burecŋic, ŋoŋe ŋic mocjaha maczi ŋoŋere biŋe eocte mâreŋ â hâwec fotâcnerâ raeŋgopieŋ. Eme iŋucnezi ŋoŋerao ʒuhuckeme jowa jukupie hârâc kikefuŋte tofa jaha ehuc siric‐ŋopaekac.
16Jei, micne bapa tiŋtuŋne ŋoŋe kecʒiŋuc mueŋgopieŋ: ‘Taha ufuŋko ɋetickehuc mumupaŋ i racne, taha ufuŋko eri qaraweŋ wiac ŋekac ira ɋetickehuc mumupaŋ i fârine.’
17Oi, ŋic maŋsanaŋ â mutucne, ufuŋ e tiri ŋeekacte eri qaraweŋ wiac‐ticnezi tiri jaha wâc eekac. Irec wenimoizi fârine jâmbâŋ ekac, ufuŋzi me eri qaraweŋ wiac‐ticnezi?
18Erâ moc kecʒiŋuc mueŋgopieŋ: ‘Alatao ɋetickehuc mumupaŋ i racne, â alata faio bâzi fokac ira ɋetickehuc mumupaŋ i fârine.’
19Oi, ŋic tiŋtuŋne ŋoŋe, alata tiri ŋeekacte fainao bâzi râekicnezi tiri jaha eekac. Irec wenimoizi fârine jâmbâŋ ekac, alatazi me bâzizi?
20Irec moc e alatao ɋetickehuc mupaŋkeme alata e jahacne erâ fainao wiac fokac i mâmâc roocmu.
21Â moc e taha ufuŋko ɋetickehuc mupaŋkeme ine ufuŋ e jahacne â ufuŋko juekac e mâmâc roocmu.
22Â moc e sambâŋko ɋetickehuc mupaŋkeme ine Anuture ŋeŋe â ŋeŋe rune e mâmâc roocmu.
23“Jei, miti qaqazu â farisaio, burecŋic ŋoŋe! Wiac racne, romboc wifu qase wiac i teŋkonec wâŋ irec sâc Wofuŋte biŋe râeeŋgopieŋ, ehuc ŋifecne wiac fârine, mitio mu bâtiŋ, hone jauŋ â mamanasiŋ, ine behepie wahaekac. Moc reŋkehuc moc reŋkezo.
24Micne bapa tiŋtuŋne, ŋoŋe sicŋeŋicko qoʒazaŋ huzacte saia baeŋgopieŋ, ehuc kamele wiac sâko acmâc ɋâckeeŋgopieŋ.
25Jei, miti qaqazu â farisaio, burecŋic ŋoŋe! Oto râqâc‐ŋeŋic sahacne ʒure ɋaɋackeeŋgopieŋ, ehame irec maŋnao ine bajauc â râmbe fusucmarâ fokac.
26Farisaio ŋic tiŋtuŋne go, qanaŋ râqâc maŋnao wiac fokac i ʒure emasaŋ etecne ʒâhec sahacne iŋuc jaha ɋaɋackezejec.
27Jei, miti qaqazu â farisaio, burecŋic ŋoŋe! Ŋoŋe ʒâŋeruŋ iŋucne. Ʒâŋeruŋ e sahacnao ʒariŋzi erickekicne, maŋnao ine ŋicsiec â gârâŋ ɋâsu fokac.
28Ŋoŋe iŋuc jaha sahac‐ŋeŋiczi ŋic maio tiŋne hawari eeŋgopieŋ, â maŋŋeŋic ine burec â miti ima qaqazi fusekicne.
29Jei, miti qaqazu â farisaio, burecŋic ŋoŋe! Porofete jaŋere ʒâŋeruŋ baɋaɋackeeŋgopieŋ â mitiŋic raŋɋane jaŋere ʒâŋeruŋ gie bâʒureeŋgopieŋ.
30Ehuc ʒiŋuc mueŋgopieŋ: ‘Mimiŋnefâc‐nâŋec jumbiŋko jurâ muzac, jaŋe bafic‐jopahuc porofete jopa sipiric mi enʒapeŋ.’
31Ŋoŋe dâŋ iŋuc muhuc porofete jojopa jaŋere ɋâricfâc juŋgopieŋ fuŋne‐ŋeŋic mutaniŋkeeŋgopieŋ hâcne.
32Kâcɋenefâc‐ŋeŋic jaŋe kiŋ fainezi faine râe wefumbiŋ, ŋoŋe ijaha ʒuhuckepie kiŋte sâc micne qazejec.
33Homa neŋgoc motec ŋoŋe, kiŋte okacne hârâcko huhu maickeme wena moc wiserâ soŋkeniŋmu?
34“Manaŋgopieŋ, no nahac ŋoŋerao porofete â mamana ŋic â miti qaqazu sorec‐jopape fisipie ŋoŋe gâcne jopa sipiric eniŋmu â gâcne maripoŋko jopaniŋmu â gâcne mitific‐ŋeŋicko kâcbiŋzi jopahuc, hae sâc rapie rahuc jopa roc ejareniŋmu.
35Ekupie ŋic socbiaŋ‐jeŋic oma jâmbâŋ sipiricke warehuc jumbiŋ irec okacne ŋoŋerao fisiocmu. Mârâc jaha Abe eraonec ʒika fuŋkerâ sueme sue qawefuku. Berekia ŋokâ‐ticne Ʒekaria e taha ufuŋko alata fuŋko qahuc ʒika qatarambiŋ.
36No jâmbomac ŋazape: Ʒika sasawa irec kiŋ mâreŋ ʒirec rune ŋoŋerao batarazo.
37“Jerusalem rune, Jerusalem rune, go wemocte porofete ʒikazi jopahuc mitiŋic gorao sorec‐jopakicne qânâzi hehâmoc‐jopaekic! Qâqâczi motecfâcne qânusuc‐joparâ fakecnezi ɋoroc‐jopaekac, iŋuc jaha noni ɋâricfâcge wemo afecne maŋfuŋ‐naneo qânusuc‐jopazo mupe qikiŋne warehuc jumbiŋ!
38Irec fic hae‐ŋeŋic behepe tuhune qarâ fozokac hâcne.
39Mupe mananiŋ, ŋoŋe mocwâc mi hohonecnu juraku ʒiŋuc muhuc honecnunʒoŋgopieŋ: Wofuŋte micte warekac e mumbiaŋkenaŋ.”
