1Abire gbɛra Yesu yã ò gbɛ̃nↄnɛ kũ a ìbanↄ
2à pì: Ludayãdannɛrinↄ kũ Farisinↄ mɛ́ ò gↄ̃̀ Musa gɛ̃nɛ ũ.
3Abire yãi à yã kũ òdi oárɛnↄ kɛ pínki àgↄ̃ kũna. Ama àsun ń yãkɛna kɛro, zaakũ òdi yã kũ òdi o kɛro.
4Òdi aso tìkisi yĩyĩ ò di gbɛ̃nↄnɛ ń gã̀n akũsↄ̃ bee ↄnɛ do òdigↄ̃ ye ò káiro.
5Òdi ń yã sĩnda pínki kɛ de gbɛ̃nↄ ń e yãimɛ. Lɛn òdi Luda yã ɛzɛba gbɛ̃̀ntɛ̃ da lɛ, òdi bùsubusu gbãna da ń pↄ́kasanↄi.
6Òdigↄ̃ ye ò vutɛ pↄnna pↄ́ble vutɛki mananↄn kũ aduakɛkpɛ vutɛki mananↄo.
7Òdigↄ̃ ye ògↄ̃ fↄ kpákpaḿma ɛtɛnↄa, ògↄ̃ ń sísi Rabi.
8Àsun tó ò á sísi Rabio, zaakũ á pínki vĩ̀ninↄ kũ dakũnanↄmɛ á ũ, á Dannɛri mɛ̀n domɛ.
9Àsun gbɛ̃ke sísi á de zĩtɛ laro, zaakũ á De mɛ̀n domɛ, àkũ mɛ́ à kú musu.
10Àsun tó ò á sísi Arɛdero, zaakũ á Arɛde mɛ̀n domɛ, àkũ mɛ́ à Arumasihu ũ.
11Á zĩ̀rin gbɛ̃ zↄ̃kↄ̃ ũ á tɛ́.
12Gbɛ̃ kũ àdi a zĩda kara, Luda ni a busa. Gbɛ̃ kũ àdi a zĩda busa, Luda ni a kara.
13Waiyoo ákↄ̃nↄ yãdannɛrinↄ kũ Farisinↄ! Manafikidenↄ! Adì kpata kũ à bò Luda kĩnaa zɛ́ tata gbɛ̃nↄnɛ. Adì gɛ̃ a gũnlo, akũsↄ̃ adì we gbɛ̃ kũ ò ye ò gɛ̃ a gũnnↄ gɛ̃n sero.
14Waiyoo ákↄ̃nↄ yãdannɛrinↄ kũ Farisinↄ! Manafikidenↄ! Adì adua gbã̀na kɛ de gbɛ̃nↄ á e yãi, akũ adì gyaanↄnↄ kpɛ́ síḿma. Abire yãi á wɛ́tãmma nigↄ̃ pãsĩ de gbɛ̃ sĩnda pínki pↄ́la.
15Waiyoo ákↄ̃nↄ yãdannɛrinↄ kũ Farisinↄ! Manafikidenↄ! Adì kure zĩtɛ kũ ísirao ìba mɛ̀n do lena yãi. Tó a a lè sↄ̃, adì a kɛ tɛ́ pↄ́ ũ deála lɛu pla.
16Waiyoo ákↄ̃nↄ vĩ̀na don'arɛdenↄ! Adì pi, tó ò pì ò sì kũ Luda kpɛ́o, à yãke vĩro, ama tó ò pì ò sì kũ Luda kpɛ́ wuraao, abirekũ mɛ́ à yã vĩ.
17Vĩ̀na yↄ̃nkↄnↄ! A kpate mɛ́ à zↄ̃kↄ̃ↄ? Wuraan yá, ke Luda kpɛ́ kũ àdi tó wura gↄ̃ a pↄ́ ũ?
18Adì pi dↄ, tó ò la dà kũ sa'okio, a yãke vĩro, ama tó ò la dà kũ sa'obↄ kũ à kú gweo, abirekũ mɛ́ à yã vĩ.
19Vĩ̀nanↄ! A kpate mɛ́ à zↄ̃kↄ̃ↄ? Sa'obↄↄn yá, ke sa'oki kũ àdi tó sa'obↄ gↄ̃ Luda pↄ́ ũ?
20Gbɛ̃ kũ à la dà kũ sa'okio la dà kũ pↄ́ kũ à kú gwenↄo pínkimɛ dↄ.
21Gbɛ̃ kũ à la dà kũ Luda kpɛ́o la dà kũ Luda kũ à kú a gũnwomɛ dↄ.
22Gbɛ̃ kũ à la dà kũ ludambɛo la dà kũ Luda kíblegbaao kũ Luda kũ à vutɛnaaaomɛ.
23Waiyoo ákↄ̃nↄ yãdannɛrinↄ kũ Farisinↄ! Manafikidenↄ! Adì tofenↄ tↄkↄtɛdo kũ kpè'akão kũ dã̀ láo kuride kpá Ludaa, akũ adì dokayã tìkisinↄ tón, yãzɛde kũ sùruuo kũ náanio. Yã birenↄ mɛ́ à de ògↄ̃ kũna a kpara tonaa sari.
24Vĩ̀na don'arɛdenↄ! Adì mↄ́sↄ nɛ́ bo á pↄ́minan, akũ adì lakumi mↄ́.
25Waiyoo ákↄ̃nↄ yãdannɛrinↄ kũ Farisinↄ! Manafikidenↄ! Adì tokonↄ kpɛ gbãsĩ bo kũ tanↄ, ama wãkũ kũ zĩdakũnadↄ̃nasario mɛ́ à á nɛ̀sɛɛ pà.
26Mↄkↄ̃n Farisi vĩ̀na! Ǹ gbãsĩ bo toko gũnnɛ gĩa, a kpɛ ni gↄ̃ gbãsĩ sari.
27Waiyoo ákↄ̃nↄ yãdannɛrinↄ kũ Farisinↄ! Manafikidenↄ! Á de lán mira kũ ò gbɛ̀ pura lɛ̀anↄ bàmɛ. Ń kpɛ mana wɛ́nɛ, ama gɛ̀wanↄ kũ gbãsĩ pínkio mɛ́ à ń gũn pà.
28Lɛmɛ ákↄ̃nↄ se dↄ, á kunna mana gbɛ̃nↄ wɛ́nɛ, ama manafiki kũ yã vãnio mɛ́ à á gũn pà.
29Waiyoo ákↄ̃nↄ yãdannɛrinↄ kũ Farisinↄ! Manafikidenↄ! Adì pↄ́ bo annabinↄ miranↄa, adì zã ble Luda gbɛ̃nↄ pↄ́a
30adì pi: Tó ó kun yã ó dizinↄ gↄrↄa, ó bàka nigↄ̃ kú kũńwo annabinↄ dɛdɛnaa gũnlo.
31Lɛmɛ a sì kũ gbɛ̃ kũ ò annabinↄ dɛ̀dɛnↄ burinↄn á ũ.
32À ania kɛ, à á dizinↄ tàragaa ba à a mì dɛ sà!
33Mlɛ̃̀nↄ! Bisãsiri pitikonↄ! Áni kɛ dera à bo tɛ́ yã kũ à danaála gũnn?
34Abire yãi mani annabinↄ kũ ↄ̃ndↄ̃rinↄ kũ yãdannɛrinↄ zĩáwa. Áni ń gbɛ̃kenↄ dɛdɛ, áni ń gbɛ̃kenↄ pá lía, áni ń gbɛ̃kenↄ gbɛ̃ kũ flã̀ao á aduakɛkpɛnↄ gũn, áni pɛ́ḿma wɛ̃tɛ kũ wɛ̃tɛo.
35Lɛmɛ Luda gbɛ̃ kũ ò ń dɛdɛnↄ yã ni wí á musu lɛ, sɛna zaa gbɛ̃ mana Habila dɛnaaa ari à gɛ̀ɛ pɛ́ Bɛrɛkia nɛ́ Zakari kũ a a dɛ̀ Luda kpɛ́ kũ sa'okio daguraa.
36Yãpuran matɛn oárɛ, yã birenↄ pínki ni wí gbãragbɛ̃nↄ musumɛ.
37Yurusalɛmudenↄ, Yurusalɛmudenↄ! Adì annabinↄ dɛdɛ, adì gbɛ̃ kũ Luda ń zĩáwanↄ papa kũ gbɛ̀ɛo à ń dɛdɛ. Madìgↄ̃ ye mà á kakaramai gɛ̃̀n baaakↄ̃, lán ko dì a dɛ̀mbɛrɛ kú a nɛ́nↄla nà, ama ádi weiro.
38Luda ni á kpɛ́ tóárɛ bɛzĩ ũmɛ sà.
39Matɛn oárɛ, áni ma e doro ari à pi, arubarikaden gbɛ̃ kũ àtɛn su kũ Dikiri tↄ́o ũ.
