1मिनु येसुमी मेकेर देल्शो शुश मुर नु आ शेंसीब आन कली शेंना शेंन
2“सास्त्री नु फरिसीपुकी इं किकी पिपी मोसा आ पा ङा दुम्शो बाक्नीम।
3मेको आन शेंशो टिने, तन्न आन पशो खोदेंशो मपने। मारदे हना मेकोपुकीमी देंनीम, तन्न मपाइनीम। मलाकी २:७-८; रोमी २:२१-२३
4हेल्शो भारी सेल्शा, मुर आन कली कुरपाइक्नीम। मेकोपुकीम चहिं ब्रेप्चो कामी यो नेप्शा मगेनीम। मत्ती ११:२८-३०; प्रेरित १५:१०,२८
5मार मार पामेनु, मुर आन ङोंइती ला पाइनीम। ठेयब टालोमी परमप्रभु यावेमी अरेशो लोव़ ब्रेक्शा आन फेक्शो वामी केप्नीमी। मिनु आन वामी लाइश्शो झुम्का क्युक्सीनीम। मत्ती ६:१; गन्ती १५:३८-३९
6भोजमी नु ग्रुम्तीक खिंमी मान पचा पुंइसीतीकेमी नित्चा दाक्नीम। लूका १४:७
7लां बजारमी गाक्मानु, मान पा सेउ पा ‘शेंब, हजुर’ देंपांइसीचा दाक्नीम।
8गे इन कली सुइमी शेंब हजुर मदेंमल। मारदे हना इन कली शेंब का ला बाक्ब। गे नेल्ल वोबु ननी।
9एको रागीमी सुइ आन कली आफ मदेनीने। मारदे हना इन आफ का ला स्वर्गम बाक्ब।
10गे इन कली सुइमी होव़प मदेंमल। मारदे हना इन होव़प का ला ख्रीस्त बाक्ब।
11इन दातेमी नेल्ल क्येङा ठेयब सु बाक्मे, मेको इन गेय पाइब दुम्ब। मत्ती २०:२६-२७
12ठेयब सुंइसीब हिक्चा मपुंइसीब। महिक्सीशो चहिं मान पाइक्चा पुंइसीब। अय्युब २२:२९; हितोपदेस २९:२३; इजीकीएल २१:३१; लूका १८:१४; १पत्रुस ५:५
13सास्त्री नु फरिसीपुकी, गे कपटी, इन कली तशा थुं खाइक्ती। मारदे हना स्वर्ग ङा राज्य ओव़तीक लां तेक्नीनी। गे मओव़नीनी, मिनु अरु आन कली यो ओव़चा मगेनीनी।
14सास्त्री नु फरिसीपुकी, गे कपटी, इन कली तशा थुं खाइक्ती। मारदे हना दुइश्शो प्रार्थना पा कोंइखु पा वोंइश बेक्शो मीश मुर आन शोंप नेल्ल नेक्शा गेनीनी। मोपतीके अरु आन क्येङा शुश सजाइ ताइनीनी।
15सास्त्री नु फरिसीपुकी, गे कपटी, इन कली तशा थुं खाइक्ती। मारदे हना इन खोदेंशो पा यहूदी धर्म पाइब का सेल्चा कली रागी नेल्ल हिरशा गाक्नीनी। मिनु इन लोव़ टीब सेल्शा, इन क्येङा शुश सजाइ तपाइश्शा, नरक सोइक्नीनी।
16मिक्च मताइब दुम्शा यो लां कोंइखु पाइब, इन कली तशा थुं खाइक्ती। मारदे हना परमप्रभु यावे आ खिं थिशा कसम जशोमी मारेइ लोव़ मथोक्सीब, खिं ङा सुन थिशा चहिं लोव़ थोक्सीब, दे शेंनीनी। मत्ती ५:३४-३७; मत्ती १५:१४
17मिक्च मपाइश्शो मूर्खपुकी, सुन ठेयब मिम्सीबा, दे सुनमी ग्योम्सीशो खिं ठेयब मिम्सीबा?
18चढ़ेतीके थिशा, कसम जशोमी लोव़ मथोक्सीब, चढ़ेशो थोव़की थिशा कसम जशोमी चहिं लोव़ थोक्सीब, दे यो शेंनीनी।
19मिक्च मपाइश्शोपुकी, चढ़ेशो ठेयब मिम्सीबा, दे चढ़ेतीके ठेयब मिम्सीबा?
20चढ़ेतीके थिशा कसम जाइबमी चढ़ेतीके नु चढ़ेशो थोव़की थिशा कसम जशो बाक्ब।
21परमप्रभु यावे आ खिं थिशा कसम जाइबमी परमप्रभु यावे आ खिं नु मेकेर बाक्ब परमप्रभु यावे कली थिशा कसम जशो बाक्ब।
22स्वर्ग कोव़शा कसम जाइबमी परमप्रभु यावे आ नित्तीके नु मेकेर निप्ब कली कोव़शा, कसम जशो बाक्ब, दे रुपीने।
23सास्त्री नु फरिसीपुकी, गे कपटी, इन कली तशा थुं खाइक्ती। मारदे हना मसला खोरसानी ङा १० भागमी भाग का परमप्रभु यावे कली चढ़ेनीनी। तन्न परमप्रभु यावे आ अरेशो तुइक्चा माल्शो ठीक निसाफ पतीके, मुर आन कली शिशी पतीके नु परमप्रभु यावे कली थमा सुइक्तीके लोव़ ममिम्नीनी। एको गेय पचा माल्शो ननी, मिनु इन पशो यो मप्रोंइचा माल्शो ननी। लेवी २७:३०; लूका १८:१२; मीका ६:८
24मिक्च मताइब दुम्शा यो लां कोंइखु पाइबपुकी, तूचा ब्वाक्कुमी रकमिक्च ओव़शो बाक्त हना, तिल्शा तूनीनी। दलओंठ खोदेंशो ठेयब जन्तु ओव़शो बाक्त हना, ग्रु दाक्नीनी।
25सास्त्री नु फरिसीपुकी, गे कपटी, इन कली तशा थुं खाइक्ती। मारदे हना बोस आ तार ला खुइश्शो खोदेंशो पा गेपुकी लाङगा रे रिम्शो तांइसीनीनी। तन्न इन आगामी खुइ नु ग्रांग्रा दिचा ङा गेय पतीकेमी ब्रीशो बाक्नीनी। मर्कूस ७:४,८
26ए मिक्च मपाइश्शो फरिसीपुकी, ङोंइती बोस आगा खुइक्तीने। मिनु आ तारी यो रिम्शो तांइसेक्ल। यूहन्ना ९:४०; तीतस १:१५
27सास्त्री नु फरिसीपुकी, गे कपटी, इन कली तशा थुं खाइक्ती। मारदे हना बुलु ब्रुइश्शा दारपाइश्शो तुरस खोदेंशो ननी। मेको आ तारी दारशो तांइसीब, तन्न आगाम रुश राक्शा, रिना पाइश्शा ग्रांग्रा दिचा ङा बाक्ब।
28मोदेंशो पा गेपुकी यो मुर आन ङोंइती धर्मी तांइसीनीनी, तन्न इन थुं कपट नु पापम ब्रीशो बाक्नीनी।
29सास्त्री नु फरिसीपुकी, गे कपटी, इन कली तशा थुं खाइक्ती। मारदे हना बेक्शा लशो परमप्रभु यावे आ लोव़ पाइब नु ठीक पाइब आन तुरस दारशो सेल्नीनी।
30मिनु ‘इं किकी पिपी आन पालामी गो यो बाक्शो नक हना, मेको आन परमप्रभु यावे आन कली साइक्पाइक्चा मगेक वा’ देंनीनी।
31मो देंशोमी ‘साइ नेसी परमप्रभु यावे आ लोव़ पाइब आन कली साइक्ब आन चच युइ गो नकी’ दे तुइक्पांइसीनीनी। येरमीया २६:२०-२३; मत्ती ५:१२; प्रेरित ७:५२
32इन किकी पिपीम पचा मजाक्दीश्शो पाप गेपुकीमी खपीने।
33गे बीख पाइश्शो बुस्स आ खलकपुकी, नरक लतीके सजाइ रे दोपा ब्रोंइनीनी ङा?
34मोपतीके गो इन बाक्तीके परमप्रभु यावे आ लोव़ पाइब, जोक्ब तुइक्ब मुर नु परमप्रभु यावे आ लोव़ शेंब सोइक्नुङमी। का निक्शी आन कली साइक्नीनी, का निक्शी आन कली शीमी क्याइश्शा साइक्नीनी, का निक्शी आन कली ग्रुम्तीक खिंमी लाइश्शा, कोर्रामी युक्नीनी, मिनु तेइ बाक्चा मगेथु, खेदा पा खेरनीनी।
35मेको मोपा खेदा पा साइश्शो पाप नेल्ल इन कली राइब। साइ नेसी रिम्शो पाइब हाबील साइश्शो रे बेरेक्याह आ तौ जकरिया साइश्शो सम्म ङा आन हुशेमी लां मताइनीनी। जकरिया कली परमप्रभु यावे आ खिंमी चढ़ेतीके आ ङोंइती साइश्शो बाक्मा बाक्त। उत्पत्ती ४:८; २इतिहास २४:२०-२१
36नोफा दाइश्शा नेनीने, मेको पाप एको पाला ङा मुर आन कली राइब। लूका १३:३४-३५
37ए यरूसलेम, यरूसलेम, परमप्रभु यावे आ लोव़ पाइब आन कली साइक्तीवी। इ कली शेंथ सोइश्शो आन कली फुल्लु क्रोम्ताक्वी। पोथीमी आ चितोली आन कली आ फ्रा आगामी पुप्शो खोदेंशो पा, गो शुश खेयप इ आल आन कली पुप्चा माल्ता, गे चहिं मबिस्से।
38मिनु मार दुम्ब देंशा हना, इ खिं ब्रेश्शा, मारेइ मलीब। येरमीया २२:५; भजन संग्रह ६९:२६; १राजा ९:७-८
39गो माइक्नन ‘परमप्रभु यावे आ नेंमी जाक्ब कली आसीक रल’ दे मान मपवी सम्म आं कली लेंशा मताइनेवे” देंत। मत्ती २१:९; मत्ती २६:६४
