1Dee Jisasame baanya disaipele dupame maka nakaenya koteaka lao loma soaka katena lao baame kongali pii mende dapa lamaiya-pyaa:
2“Yuu taono mendenya pii tolasingi akali jasa mende katea-pyaa. Akali dokome Gote paka nakayao endakali dupa masala nayawaka pingi-pyaa.
3Dee enda walyakae mendeme yuu dokonyaka pituu koteaka lao jasa doko kateamo dokonya ipatapu baa lamaiyoo, ‘Endakali mendeme namba pundu nyoo diana embame namba nisoo pundu doko lao tolasakape!’ lata pingi-pyaa.
4Koto longo jasa dokome enda dokonya pundu doko tolasakamaitoo lao masala nayamoaka doko, maitakao baame dapa lao masia-pyaa: ‘Nambame Gote paka nakayao, endakali dupa masala naelyoaka doko, enda walyakae dakeme namba maka pisoo koteaka lao ipao pii lati-lati setamopa tenda namba etete maka pisetana, nambame baanya pundu doko tolasakamaitoo,’ lao masia-pyaana,” Jisasame lea-pyaa.
6Dopa latala Kamongo dokome pii dokonya waipa soo lao pituu, “Nyakamame jasa koo dokome enda doko lao masetala tolasakamaitoo leamo doko masalapape.
7Dopaka pyoo Gotenya yapao nyepae endakali dupame kuka kotakapi Gote lao ee lao loma setaminopa baame dupanya pii tolasakamaiyanya koto longo malisoo mee katatape?
8Daa, baame dupanya pii yapa tolasakamaitana langilyo. Goteme dokaita nisoo pii yapa tolasakamaitamoaka doko, Endakalinya Ikiningi doko ipatamo gii dokopa masoo miningi endakali mende yuu dakenya katatamino baame kandata laape?” lea-pyaa.
9Yuu mendepa endakali yangimi nyakama tange tolataena lao masetala waka dupa kilya kandao kateaminosa Jisasame dokaita kandao kongali pii mende dapa lea-pyaa:
10“Akali Patasi mendepa muni takisa nyingi akali mendepa losuu anda andake dokonya loma sala peambi-pyaa.
11Pupala Patasi dokome toya katao dapa lao moname loma sia-pyaa: ‘Endakali waka dupa pitakame oapi putiti kayao, mana setapae dupa nepao kepo kolao paengemali pyoo nambame napaengena, Gote emba lao yaka pilino lelyo. Dee namba muni takisa nyingi akali dapale joo nakalyo dokonya emba lao etete yaka pilino lelyoaka.
12Satete dii lao kote lapoma nambame emba lao masoo nee nanenya katenge. Munipi oapi nambame nyilyo dupa pitakanya kingi ita mende lao konjepala konjepae dokonya mende losuu andaka setengena,’ dopa lao loma soo katea-pyaa.
13Dopaka doko, takisa nyingi akali dokome lembasa waka yuu kandanatae katao kingi tukyoo dapa lao loma sia-pyaa: ‘Nambame mana koo miningina, Gote embame namba kondo kayape!’ lao loma sia-pyaa.
14Dopa piambi-pyaana nambame nyakama dapa langilyo: akali dolapome losuu anda andake doko yakinateambinopa, takisa nyingi akali doko Gotenya enombasa tolatae joo andaka pea-pyaa. Akali mende doko daa. Endakali mende tangeme alyasale joo katenge dupa Goteme minanya isa palyeta. Dee endakali mende tangeme anasala joo katenge dupa baame kenge minalyetana,” Jisasame lea-pyaa.
15Yuu mendepa endakali mendapuame wane wanakupi ŋaŋa dupa Jisasame watandena lao mandyuu epeami-pyaa. Dopaka doko, disaipele dupame dokaita kandatala pyalanya leami-pyaa.
16Pyalanya leaminopa Jisasame wane wanakupi koo dupa epena latala lao pituu, “Wane wanakupi koo dupa epekena kaita lyokala nayakalapa! Goteme wane wanakupi dapale joo kalyamino endakali dupa isoo kalyamo.
17Nambame nyakama kiningi langilyona, wane wanakupi koo dupame nyakama Goteme isina lao katengemali pyoo endakali mende nakatatamo kandao doko, baa kapa pao Goteme isina lao nakatatana,” lea-pyaa.
18Yuu mendepa Jutamanya isingi akali mendeme Jisasa kandao, “Emba mana lenge akali epe. Tenda namba lete etete katatopa lao aipa pyuape?” lao pisia-pyaa.
19Dokopa Jisasame baa lamaiyoo, “Aipuma embame namba kandao epena leepe? Endakali mendaipi mende epe daa. Gote baa iki epe.
20Embame mana setapae datupa masilino: ‘Embame kepo kolala nayape. Embame endakali pyao kumasala nayape. Embame pake nala nayape. Embame endakali mende minakasalanya sambo laa nayape. Embanya endangi takangepa dolapo andanda semaiyoo katapena,’ lapae silyamo dutupa masilino,” lea-pyaa.
21Dokopa isingi akali dokome lao pituu, “Wamba namba wane kolesa katao mana setapae dutupa watao minio doko mee minawaka kalyona,” lea-pyaa.
22Jisasame pii doko sepala baa lamaiyoo, “Embame mendai iki mende napilinona, embame embanya oapi dupa pitakame muni nyepala endakali tipya dupa mokosoo maipi. Dopa pitinopa embanya epe etete dupa kaitinya setakatana, embame namba watao ipu,” lea-pyaa.
23Dopa leamopa isingi akali dokome sepala baanya oapi etete longo setenge dupa lao masetala mona etete kenda kaya-pyaa.
24Kenda kayamo doko Jisasame kandatala dapa lea-pyaa: “Kamongo dupa nyakama Goteme isina lao kalyanya etete lekeleke tenge.
25Mena kamele mendeme lekeleke tapala kepo tii mendenya kolandapyaliaka doko, endakali oapi longo setenge kamongo mendeme baa Goteme isina lao kalyanya etete lekeleke tapenge jetana,” Jisasame lea-pyaa.
26Dopa leamopa endakali dupame sepala baa pisoo, “Dopa tamo kandao doko, api kapa pao pyoo nyepae katatape?” leami-pyaa.
27Dopa leaminopa Jisasame yanu pyao, “Endakalimi kapa pao napipenge dupa Goteme pingina,” lea-pyaa.
28Dokopa Pitame lao pituu, “Kandeleno! Naimame oapi dupa yakinatala emba watao paelyamanona,” lea-pyaa.
29Dopa lateamopa Jisasame dokaita lamaiyoo, “Nambame nyakama kiningi langilyona, akali mendeme baa Goteme isinaka lao auu kayapala baanya anda tamopi, enda tamopi, kaiminingi tamopi, endangi tamopi, takange tamopi, wane tamopi dupa yakineamo dokome indupa gii dakepa baanya yanu etete longo waa palyoo nyepala, dee tenda auu pyoo lete etete katatana,” Jisasame lea-pyaa.
31Jisasame baanya disaipele kingi ita-kisa dee lapoma dutupa lanyepala dutupa lamaiyoo, “Kandeleno! Naima indupa Jetusaleme pelyamano. Pupala katatamanopa potopesa dupame Endakalinya Ikiningi dokonya lao pepa wamba piamino dupa pitaka angi jalapomo.
32Akali doko endakali waka dupanya kingilyaka katatamopa dokaitame baa lamba lao sopakalimi pyao koyasetami.
33Dee baa konjame pyapala angi pyao kumasetataminopa koto teponya dee sakatatana,” Jisasame lea-pyaa.
34Dopa leamoaka doko, baanya disaipele dupame baanya pii dupanya kukipi mende masala nayami-pyaa. Jisasame pii leamo dupanya tenge doko yalo piamosa dokaitame baanya pii lyaa doko nasiami-pyaa.
35Maitakao Jisasa yuu taono Jeteko dokonya tengesa epeamopa, akali lenge monda mende kaitinisa pitipala endakali dupame munipi oapi mende dyepa lao tee lao petea-pyaa.
36Dopa lao pituu baame endakali longo kaita ipao puiyamino sepala pisoo pituu, “Upa aipa pilyamipi?” lea-pyaa.
37Dopa leamopa dokaitame baa lamaiyoo, “Nasatete tange Jisasa doko ipao pelyamona,” leami-pyaa.
38Dopa leamino sepala baame puu lao, “Jisasa! Emba Dapiti Yumbange! Embame namba kondo kayape!” lea-pyaa.
39Dopa lateamopa endakali wamba epeamino dupame baa pii kaena lao pyalanya leami-pyaa. Dopa leaminoaka doko, baame etete puu lao ae lao, “Dapiti Yumbange! Embame namba kondo kayape!” lea-pyaa.
40Dopa leamopa Jisasame ipao katapala dokaita lamaiyoo, “Nyakamame baa laminao namba kalyo dasa ipupa,” lea-pyaa. Dokopa dokaitame baa tengesa laminao ipateaminopa Jisasame baa pisoo, “Nambame embanya aipa pyakapili lao masilipi?” lea-pyaa. Dokopa akali lenge monda dokome baa lamaiyoo, “Kamongo, namba lenge dee tapuli lao masilyona,” lea-pyaa.
42Dokopa Jisasame baa lamaiyoo, “Emba lenge taa! Embame masoo minapino dokome auu pisekelyamona,” lea-pyaa.
43Dopa leamo gii dokopaka akali dokonya lenge dee talu pia-pyaa. Dokopa baame Jisasa watao pao pituu Gote lao lalyoo pea-pyaa. Dopa pyoo peamopa endakali awapa peamino dupa pitakame kandatala Gote lao lalyiami-pyaa.
