1Sambasa gii mendenya Jisasame wiisa ee kaina mendenya kaita peamopa, baanya disaipele dupame wiisa dii mendapua kii lao nyepapu kuka pinya nepata napapyoo peami-pyaa.
2Dopa piaminopa Patasi mendapuame lao pituu, “Aipuma nyakamame mana setapae dupa nepao Sambasa gii dokonya daa latae singi mana doko minilyamipi?” leami-pyaa.
3Jisasame pii doko yanu pyao, “Nyakamame Dapitimi piamo doko pepanya itaki pyala nayamipi? Baapi baa-pipa awapa kateamino akali dupapimi lopo kayapala Gotenya losuu anda dokonya kolandatala betesa Gotenyana lao setapae pitisa dupame iki napenge dupa nyepala baa-pipa awapa kateamino dupa maiyoo nea-pyaana,” lea-pyaa.
5Dopa latala Jisasame dokaita lamaiyoo, “Endakalinya Ikiningi dokome Sambasa gii doko isoo kalyamona,” lea-pyaa.
6Dee Sambasa gii mendenya Jisasame Jutamanya losuu anda mendenya kolandatala endakali dupa mana lamaiyoo kateamopa, akali kingi tolae-kaita kumapae mende petea-pyaa.
7Peteamopa mana setapae masingi akalipi dee Patasipi dupame Jisasa kosimi lamana lao masetala baame endakali yaina pyapae mende Sambasa gii dokonya mee injisilyape daape lao baa isokondape pyoo peteami-pyaa.
8Dopa lao masoo peteamino doko kandatala Jisasame akali kingi kumapae doko lamaiyoo, “Emba sakatatala ipao kaina dakenya toya kata!” lea-pyaa. Akali doko sakatatala toya katea-pyaa.
9Dokopa Jisasame dokaita lamaiyoo, “Nambame nyakama pii mende pisilyo. Mana setapae dupame naima langyoo aipa lelyape? Sambasa gii dokonya koo pipenge doko kapa pelyape, pande epe pipenge doko kapa pelyape? Endakali mende pyao kumasepenge doko kapa pelyape, pande pyoo nyepenge doko kapa pelyape?” lea-pyaa.
10Dopa latala baame endakali pitaka kandayoko lao kandatala akali doko lamaiyoo, “Embanya kingi doko tinoka!” lea-pyaa. Akali dokome Jisasame leamoli piamopa kingi doko dee auu pia-pyaa.
11Dopaka doko, Patasipi mana setapae masingi akalipi dupame etete imbumi kumapala lao pituu, “Naimame Jisasa doko aipa pimape?” lao nyakamalapo leami-pyaa.
12Gii dokopa Jisasame manda mendenya loma salanya pyakalyia-pyaa. Pyakalyetala Gote lao loma soo katao yuu kuisetala yongasia-pyaa.
13Yuu yongateamopa baame baanya disaipele dupa epena latala akali kingi ita-kisa dee lapoma dutupa yapao nyia-pyaa.
14Akali Saimone doko Jisasame kenge mende Pita leamo dokopi, Saimonenya kaiminingi Endutu dokopi, Jemesapi, Jonepi, Pilipapi, Batolomyupi, Matyupi, Tomasapi, Jemesa lenge Aopiasa ikiningi dokopi, Saimonekenge mende Selote lenge dokopi, Jutasa lenge Jemesa ikiningi dokopi, Jutasa Isaketiote lenge Jisasa enge nyiamo akali dokopi dutupa yapao nyepala kenge aposele lea-pyaa.
17Jisasame akali dutupa-pipa yuu lama mendasa lanao ipupala baanya disaipele longopi, Jutia yuu doko pitakanya endakali etete longo epeamino dupapi, Jetusaleme tangepi, solowata pete andake dokonya lembanya yuu singi Taya tangepi, Saitone tangepi dupa awapa kateamiaka-pyaa.
18Dokaitame Jisasanya pii doko salanya ipao pituu dee baame nyakamanya yaina dupa mee injisekena lao epamiaka-pyaa. Enjele koo dupame endakali kenda pisiamo dupa epeaminopa Jisasame dupanya enjele koo paleamo dupa watao nepakamaiyoo mee injisakamaiya-pyaa.
19Jisasanya pupu lapae dokome endakali auu pisiamosa endakali pitakame baa kingimi watandalanya ipata piami-pyaa.
20Dokopa Jisasame baanya disaipele dupa kandatala lao pituu, “Nyakama endakali tipya dupa Goteme isoo kalyamona lao mona yaepao kalyamino.
21Nyakama indupa lopo kayao katenge endakali dupa tiaka kayao katatamana lao mona yaepao kalyamino. Nyakama ee lao katenge endakali dupa gii kayao katatamana lao mona yaepao kalyamino.
22“Endakali dupame nyakama kandao imbu kaengyowapi dee nyakama maka kayapala pii koo lawaka nyakamanya lao nambonambo pyowapi pitaminopa, dokaitame Endakalinya Ikiningi doko daa lao masetala dopa pilyaminona lao nyakama mona yaepao katatami.
23Endakali dupame nyakama kandao dopa lataminopa, nyakamame nyakamanya yole etete andake kaiti-kisa silyame lamona lao masoo mona yaepao lyoo katatami. Dupanya yumbange dupame potopesa dupa kandao dopaka piami daape!
24“Dopaka doko, nyakama oapi longo setelyamino dupanya mona yaepasingi tenge dupa indupa etapelyamona koyatami iki lamo!
25Dee indupa nyakama nee napala tiaka kaelyamino dupame tenda lopo kayao koyatami iki lamo! Dee indupa nyakama mona yaepatala gii kayao kalyamino dupame tenda mona kenda kayapala ee lao koyatami iki lamo!
26Wamba dokaitanya yumbange dupame sambo potopesa dupanya kenge minalyiaminoli pyoo endakali pitakame nyakamanya kenge minalyetamino kandao doko, nyakama koyatami iki lamo!
27“Dopana, nyakama nambanya pii silyamino dupa dapa lao langilyo: nyakamame nyakamanya yandapipi dupa-pipa auu kayao kalyepape. Nyakama kandao imbu kaengelyamino endakali dupa nyakamame mana epe lamaiyepape.
28Nyakama koyasalanya pii lelyamino endakali dupa auu pyoo katena lao Gote lao loma sakamaiyepape! Dee nyakama minakasoo kenda pisilyamino endakali dupa lao masetala Goteme kondo kaena lao loma salapape!
29Akali mendeme embanya wakena yangi takyoo pia kandeno dokopa, embame kapilyetala yangi etete pina lapeaka. Akali mendeme embanya yonge pee pingi kisa doko nyia kandeno doko, isa pingi doko awapa daa laa naenya nyina kayapeaka.
30Endakali dupame oapi mende emba-kisa tee latamino doko embame maipi. Akali mendeme embanya oapi mende nyia kandeno doko, embame yanu pyekena laa nayape.
31Endakali dupame nyakamanya pyakapimili lao masetamili pyoaka nyakamame dupanya pyakamaiyepape.
32“Nyakamame endakali nyakama auu kayatamino dupa iki auu kayatamino kandao doko, apimi nyakamanya mana doko ‘Yaka minilyaminona,’ lakatape? Endakali koo mana minao paenge dupame dokaita auu kayatamino endakali dupaka auu kaengema daape.
33Endakali nyakama auu pisingima dupa iki itingi auu pisatamino kandao doko, apimi nyakamanya mana doko ‘Yaka minilyaminona,’ lakatape? Endakali koo mana minao paenge dupame dokaita auu kayamailyamino endakali dupaka auu kayamaingima daape.
34Nyakamame nyakamanya oapi mende yanu pyapenge endakali dupa iki maitamino kandao doko, apimi nyakamanya mana doko ‘Yaka minilyaminona,’ lakatape? Mana koo minao paenge endakali dupame dopale yango dupa oapi maitala dopaka pyoo yanu nyemana lao masingima daape.
35Dopana, nyakamame nyakamanya endakali yandapipi dupa auu kayalapape! Nyakamame dupa auu kayao oapi mende maitala yanu pyakatamina lao masala nayalapape. Nyakamame dopa pitaminopa etete epe mende nyakama-kisa seta. Dee nyakama Etete Ketae Katenge dokonya ikiningi katatamiaka. Epe nyilyamino dupanya tange doko lao masala naenge endakali dupapi koo pingi endakali dupapi dupa kandao Goteme kondo kaenge.
36Nyakamanya Takange kaitinya katenge dokome nyakama kondo kaengeli pyoo nyakamame endakali dupa kondo kayalapape.
37“Nyakamame endakali mende koo epe lao yapala nayalapape! Dokopa Goteme nyakama koo epe lao yapala nayataka. Nyakamame endakali mende-kisa tenge setamopa kenda pisala nayalapape! Dokopa Goteme nyakama kenda pisala nayataka. Nyakamame dokaitanya koo pingi yanu dupa kayalapape! Dokopa Goteme nyakamanya koo dupa kunanya nepakata.
38Nyakamame nyakamanya epe dupa endakali dupa maiyepape. Dopa pitaminopa Goteme epe dupa nyakama dita. Baame eteteaka longo dupa dyoo tumbasetala minao lyanda lyanda lao tuu lanya pyandatamopa eteteaka tumbao kai lala pupenge jeta. Dopa pyoo Goteme nyakama oapi dupa sanga pyata. Nyakamame endakali dupa maitaminoliaka pyoo Goteme nyakama ditana,” lea-pyaa.
39Dopa latala Jisasame pii dokonya waipa soo dee kongali mende dokaita lamaiyoo, “Akali lenge koo mendeme lenge koo yango mende kapa pao kaitini laitaka pitape, pande lapota yuli mendenya pyakatambipi? Dolapo yulinya pyakatambi daape!
40Dee disaipele mendeme baa mana lamaingi dokonya alyasale joo nakatenge. Dopaka doko, baa mana nyoo etapala baa mana lamaingi dopale jeta.
41“Aipuma embame emba tangenya lenge dokonya ita waiyepae andake silyamo doko nakandenya embanya endakali yango mendenya lengenya kuni silyamo doko kandakamaiyoo kalyepe?
42Embame emba tangenya lenge dokonya ita waiyepae andake silyamo doko kandala naeleno doko aipa pyoo embanya endakali yango doko kandao, ‘Kaimia, embanya lengenya kuni silyamona nyakatoo,’ latepe? Emba sambo akali epe jili pyoo kalyeno! Wambao embanya lengenya ita waiyepae andake silyamo doko nyoo nepao embanya lenge takondape petala endakali yango mendenya lenge kuni silyamo doko kapa pao nyoo nepakamaitina,” lea-pyaa.
43“Ita epe dupame dii koo namandenge. Ita koo dupame dii epe namandengeaka.
44Ita mendenya dii mandelyamo dupa endakali dupame wambao kandatala ita angi doko dopale lamo lao masingima. Endakali mendeme makua ita mendenya kapa pao anga lyao nanyingi. Dee ikililyambu kende mendenya kopi lyao nanyingiaka daape.
45Endakali epe mendeme baanya monanya mana epe palelyamo dokoaka miningi. Dee endakali koo mendeme baanya monanya mana koo palelyamo dokoaka miningi. Endakali monanya palelyali pyoo kambunya pyakalyingina,” lea-pyaa.
46“Nyakamame namba kandao, ‘Kamongo, Kamongo,’ lelyaminoaka doko, aipuma nambanya pii doko watao minala naelyamipi?
47Akali mende namba-kisa ipao nambanya pii soo latoli pitamo akali doko dapalena lao langilyona salapape!
48Akali dokome baanya anda pyaanya muku minapala yuu kyoto mendasa anda pia-pyaa. Dopa peteamopa maitakao endaki andake lyiamopa anda doko takyalanya piamoaka doko, baame anda doko kyoto joo piamo dokonya emapi mende napia-pyaa.
49Dopaka doko, endakali mendeme nambanya pii doko sepala watao minala naenge akali doko dapale: baame baanya anda piamo doko muku minala naenya mee yuunya piamosa maitakao endaki lyepala anda doko yapa takyepala etete koya-pyaana,” lea-pyaa.
