Luke 19:32-39

³²Kwertengerl ratherr alherrek, ratherr tangkey renh aretj-alhek, Ngkartel renh-atherrenh ilekarl-arteh.

³³Ratherr rope renh rlwemarleng, tangkeyeh-artweyelemeh renh-atherrenh pawenhek, “Wenheham mpwel tangkey renh rlwemel angem?”

³⁴Ratherr renh ilek, “Ngkart kwenh kwer ahentj.”

³⁵Kwertengerl ratherr tangkey kwek renh Jesu-warn angerl-anerrek. Kwereng ratherr mantarr tangkey kwer artep-warn arrernerl-anerrek. Ratherr Jesu renh tangkey kwer antjelh-ilek.

³⁶Jesu rang tangkeyel-ayeng mpank petjetjam, tjerrtj mapel mantarr inehenh tjeyeh antjam-wek kwereng arrwekel.

³⁷Jesu kel Olive pwerteng anarnpetj-alhemeng, nakenh-nakenh kwerenh mapel arrkenel Altjerr nakewarrek. Inang arrwekel arekarl-penh, Jesu rang twer anthwerrel mpwarekarl-penh.

³⁸Tjerrtj inang arnterr arlkerrerretjam, “Altjerray, king nwern-henh twer-ilang! King rang lyet nwerneh-warn petjem arreny Ngkartel-ayel. Altjerr rang nwerneh ngwerleny mernelhem. Alker-areny mapel thwen renh nakem, inang arrken anemeng wart!”

³⁹Artwang Pharisee rrpwetj inehel-ayeng irnek. Inang Jesu renh ilek, “Kaltj-anthenh-anthenhay, nakenh-nakenh ngkwengenh map intertelh-ilang!”