Lukas 19:32-39

³²Hidim oen duas lakos, kon net keledai ana na, banansila el Yesus in teka ka.

³³Nikit oen loat keledai ana na talin na kon, lamtua ka keket oen noan, “Tasao le mi loat sao hmukit ni lia?”

³⁴Oen siut noan, “Kaim Tuang ngu le pake.”

³⁵Kon keledai la lamtua ka tade, ta oen duas pel nol keledai ana na lako bel Yesus. Hidim oen lekat oen seman nas laok se keledai ana na blepo ka, le sakeng Yesus se dapa.

³⁶Atuil hut mamo kas kon kat oen seman nas nol hlendang ngas, le lekat laok se lalan na, halin sodo-sium Yesus banansila el in sodo-sium atuil tene ka.

³⁷Oras Un niu lako deng leten Saitun na ka, atuil hut mamo kas leo-leo nol Un ima-ii las, kidu le naka-naka Ama Lamtua Allah, undeng tada-taad herang man oen in net son nas.

³⁸Oen leo-leo naka-naka noan, “Un niam, Lahing man Ama Lamtua Allah in nutus maa ka! Ama Lamtua Allah bel hangun se Una! Halas nia, atuli li haup in mole-daem nol Ama Lamtua se sorga son. Naka Ama Lamtua man daad le kil prenta ne apan-dapa man lapa dudui kua.”

³⁹Mo atuil Farisi las kon muik se atuil hut mamo kas hlala. Oen tek Yesus noan, “Paap Guru! Kaing one, le oen kidu-ahan muun isi ela deken, ta ni lai-lisin son!”