1Penga niyan, impetaking i Jose se lima kedowa din, aw dimoton dan te selotan. Minikagi si Jose, “Dimateng den se amay ko aw menge kedowa ko lekat te Canaan, sipat te kedita te karniro aw doma ayam-ayam dan aw kedakel te kedònan dan. Kidoen den dan te Gosen.” Penga niyan, impekilala din se lima kedowa din diyà te selotan.
3Mig-insà se selotan diyà kandan, “Eden lay se eg-inangen niyo?” Timaba dan, “Sir, telediyaga kay, iling te eg-inangen te menge kemonaan day gebii.
4Dimini kay so ontò medaet se bitil doton te Canaan igsà wedad palos mekaen te menge ayam-ayam day. Aw mepakay diyà kamno, peogpai kay doton te Gosen.”
5Minikagi se selotan diyà ki Jose, “Mèpiya so dimateng den se amay nikaw aw menge kedowa nikaw.
6Sikona se eglowan diyà te kebelad te Ehipto. Peogpai dan doton te Gosen, so yan se ontò mèpiya tanà. Aw doen otaw diyà kandan ontò biyasa egdiyaga, petonggoi kandan se kenaken menge ayam-ayam.”
7Penga niyan, inibing i Jose se amay din si Jacob doton te selotan. Migtawal-tawal si Jacob amon mèpiya se ibegay te Timanem kandin,
8aw mig-insà se selotan diyà kandin, “Pila lay se omay nikaw?”
9Timaba si Jacob, “Sebad gatos ketlowan se omay ko. Pilabok olò se omay sìyan, aw melima se neokitan ko. Wedà pa apet se omay ko te omay te menge kemonaan ko.”
10Todà migtawal-tawal si Jacob amon mèpiya se ibegay te Timanem diyà te selotan, aw penga niyan, nesayo sikandin.
11Impeogpà i Jose se amay din aw menge kedowa din doton te Ehipto. Ontò mèpiya se tanà imbegay din kandan medapag te lonsod te Ramases, iling te impunù te selotan kandin.
12Doen heman kànen imbegay i Jose diyà te amay din, aw menge kedowa din, aw menge doma otaw diyà te pamilya te amay din sipat te menge mengisù dan.
13Ontò medaet se bitil igsà wedad palos kànen pengkey kenan. Nebitilan se kedita te otaw doton te Ehipto aw Canaan so binallos dan.
14Minayad dan te trigo diyà ki Jose, aw inibing din se kedakel te kwarta imbayad dan kenyan doton te balay te selotan.
15Pegkeamin te kedakel te kwarta doton te kebelad te Ehipto aw Canaan, dimoton se menge tege Ehipto ki Jose, aw minikagi dan, “Begayi kay bag te kànen, so agpet kay den matay. Tebangi kay, so wedad den kànen day aw neamin den se kwarta day.”
16Minikagi si Jose, “Aw neamin den se kwarta niyo, ibingi niyo diyà se menge ayam-ayam niyo, so yan se mepakay niyo iliwan te kànen diyà kanak.”
17Yan inibing dan se menge ayam-ayam dan doton ki Jose, menge kodà dan, menge karniro, kambing, baka, aw asno dan. Yan se imbayad dan te kànen diyà ki Jose. Imbegay din kandan se kànen te omay sìyan liniwanan dan te kedita te ayam-ayam dan.
18Pegkepenga te omay sìyan, limikò dan doton ki Jose aw minikagi dan, “Sir, benal se kagi day kamno te neamin se kwarta day, aw tinig-apò no den se kedita te ayam-ayam day. Wedad den ibegay day kamno, olò pawà day aw lawa day se nesamà.
19Aw eked ka pegtabang kenami, matay kay aw kebàtan se pawà day. Lawa day aw pawà se iliwan day te kànen. Mepakay aw inangen kay allang te selotan, aw ibegay day se tanà diyà kandin. Meneng begayi kay bag olò te trigo amon eked kay kematay aw amon doen itanem day diyà te pawà.”
20Penga niyan, bineyadan i Jose se kedita te tanà kidoen te Ehipto amon tig-epoen iyan te selotan. Nemeligyà se kedita te tege Ehipto te tanà dan so ontò medaet se bitil, aw yan neinang se selotan tig-apò te kedakel te tanà.
21Neinang allang te selotan se kedita te otaw kidoen te kebelad te Ehipto tandà te ininang i Jose.
22Meneng wedà din beyadi se tanà tinig-apò te menge egpengibing te menge otaw egsimba te aldaw doton te Ehipto. Wedà dan beligyai se tanà dan so egtogpoan dan te selotan.
23Minikagi si Jose diyà te menge otaw, “So bineyadan kaw den te selotan sipat te tanà niyo, ibegay ko den kenyo se benì ipanggas niyo.
24Aw doen geniyen niyo, keilangan ibegay niyo se tengà te lima diyà te selotan. Kenyo se samà amon doen benì ipanggas niyo aw amon doen kànen niyo aw menge pamilya niyo.”
25Timaba dan, “Tandà te tabang nikaw kenami, eked kay den kematay. Sir, ontò mèpiya se ininang no kenami, aw yan meinang kay menge allang te selotan.”
26Yan migpunù si Jose doton te Ehipto te keilangan ibegay dan diyà te selotan se tengà te lima diyà te kedakel te geniyen dan, aw yan se punù egtoloen dan lamig songkani. Olò tanà te menge egpengibing te simbahan dan se wedà ketig-apò te selotan.
27Mig-ogpà se menge bowad-bowad i Jacob (doma ngadan din si Israel) kidoen te Gosen doton te Ehipto, aw yan neinang dakel se kedònan dan kidoen, aw ontò migkedita se mengisù dan.
28Mig-ogpà si Jacob doton te Ehipto te sempolò teg pito se omay, lamig minapet te sebad gatos kepatan teg pito se omay din.
29Pegdateng te aldaw te agpet den sikandin matay, tinawal i Jacob se batà din si Jose, aw minikagi sikandin, “Soli se belad nikaw diyà te salad te bobon ko amon ketegahan ko te tomanen no se ipunù ko kamno seini. Pegpakang ka kanak te eked no lebengi se lawa ko dini te Ehipto.
30Ibeg ko ilebeng beling se lawa ko doton te lebenganan doma te menge kemonaan ko. Yan ibingi se lawa ko lekat dini te Ehipto, aw lebengi a doton te linebengan kandan.” Minikagi si Jose, “Ee. Toloen ko se impunù no kanak.”
31Minikagi si Jacob, “Pegsapà ka kanak te yan se inangen nikaw.” Yan migsapà si Jose. Penga niyan, timikelong si Jacob kidoen te katri din, aw migpesiontong sikandin diyà te Timanem.
