Genesis 8

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Wedà kelibeli te Timanem si Noe aw kedita te menenanap aw ayam-ayam doma kandin simakay te arka. Impekedog te Timanem se kelamag, aw migtebò den se wayeg minuyud.

²Sinengseng din se menge selep doton didalem te dagat aw menge linekatan te odan doton te langit. Kimedit se odan.

³Minuyud se wayeg te sebad gatos keliman se aldaw.

⁴Pitsa sempolò teg pito te ikepito te bolan, nekeselà se arka diyà te bontod te Ararat.

⁵Gayed minuyud se wayeg, aw kinità se toktok te menge bontod te pitsa ono te ikesempolò te bolan.

⁶Penga te kepatan se aldaw, inowang i Noe se bintanà te arka,

⁷aw binoloyan din se sebad owak. Wedà iyan likò doton te arka meneng gayed miglegeb-legeb lamig migkepangkag se tanà.

⁸Pegkenamay-namay, binoloyan heman i Noe se sebad selepati, amon ketegahan din aw migkepangkag se tanà.

⁹Meneng so nelinep pa se tanà te wayeg, wedad kinità te selepati embongan din, aw yan limikò iyan doton te arka. Impelowà i Noe se belad din aw inabat din se selepati.

¹⁰Penga te sebad simana, todà din binoloyan se selepati.

¹¹Pegkemeapon niyan, limikò iyan doton ki Noe, aw doen tobed te kayo olibo inibing diyà te toktokay din. Doun niyan, netegahan i Noe te tabag minuyud se wayeg diyà te tanà.

¹²Penga niyan, migtagad si Noe te sebad simana, aw todà din binoloyan se selepati. Meneng wedà iyan palos likò.

¹³Nayan, peg-apet te enem gatos aw sebad se omay i Noe, te pitsa ono te tagnà bolan te omay sìyan, minuyud se wayeg diyà te tanà. Inabat i Noe se atep te arka amon megpeatap-atap. Kinità din te tabag migkepangkag se tanà.

¹⁴Peg-apet te pitsa kelowan teg pito te ikedowa te bolan, ontò migkepangkag se tanà.

¹⁵Yan minikagi se Timanem diyà ki Noe,

¹⁶“Lowà ka den lekat te arka sipat te esawa nikaw, menge batà nikaw, aw menge esawa dan.

¹⁷Pelowai heman se kedita te manok, ayam-ayam, aw menenanap, amon megbowad-bowad dan aw megkedita dan dini lanto te tanà.”

¹⁸Yan limowà si Noe lekat te arka sipat te esawa din, menge batà din, aw menge esawa dan.

¹⁹Limowà heman se menge ayam-ayam, menenanap, aw manok te tegsebad-sebad kemolò niyan.

²⁰Penga niyan, miglodok si Noe te menge bato amon meg-inang sikandin te sonoganan te ayam-ayam ibegay diyà te Timanem. Inimetayan din se sebad diyà te tegsebad-sebad kemolò te ayam-ayam aw manok mepakay sonogen aw ibegay diyà te Timanem, aw sinonog din se kedita niyan kidoen.

²¹Peg-adek te Timanem te nadeg niyan, neluba sikandin, aw minikagi sikandin diyà te pedowan din, “Eked a todà pegpelumun te tanà tandà te medaet inang te otaw, so netegahan ko te gayed medaet se ibeg te pedowan te otaw lekat te pegtebaw dan. Eked a todà peg-igelà te kedita te otaw aw menenanap iling te ininang ko den.

²²Dalem te doen pa keneyonan, gayed doen pegtanem aw peglegani, pegkegenaw aw pegkeinit, pengaldaw aw pengodan, aldaw aw delem.”