1Nayan, insogò i Jose se sineligan din, kagi din, “Ipenoi se menge sako dan te trigo taman te mebatog ibingen te menge asno dan, aw elesi heman se kwarta imbayad dan didalem te sako te tegsebad-sebad kandan.
2Soli se tabò ko selapì diyà te sako te temanan adi, sipat te kwarta imbayad din te kànen.” Yan timolò se sineligan te impunù i Jose kandin.
3Pegkeiselem niyan, impekesayo se menge kedowa i Jose aw menge asno dan.
4Te wedà dan pa pekeipanaw te mediyò lekat te lonsod, minikagi si Jose diyà te sineligan din, “Ayas ka peg-alaw kandan. Aw mekesaeb ka kandan, peg-insà ka, ‘Nengà lay mig-inang kaw te medaet diyà te otaw mig-inang te mèpiya diyà kenyo?
5Nengà lay nenakaw kaw te tabò selapì te amo ko? So yan se eg-ineman din, aw eggemiten din te peg-etok. Ontò medaet se ininang niyo.’”
6Pegkesaeb te sineligan kandan, minikagi sikandin te impunù i Jose kandin.
7Meneng timaba dan, “Sir, nengà lay minikagi ka kenyan? Megsapà kay te wedad ininang day iling kenyan.
8Pengkey sìyan kwarta kinità day diyà te sako day doton te Canaan, in-olì day den iyan diyà kamno. Nengà lay menakaw kay te selapì aw bolawan lekat te balay te amo nikaw?
9Sir, aw kitaen no te tinakaw iyan te otaw doma day, mepakay aw imetayan no sikandin, aw inangen no heman se kedita day menge allang nikaw.”
10Timaba se sineligan, “Mèpiya se inikagi niyo, meneng olò otaw nenakaw te tabò se inangen ko allang, aw mekelowà se doma.”
11Penga niyan, ayas dan inawas se sako dan aw mig-okal se tegsebad-sebad kandan kenyan.
12Ontò nengemahà se sineligan diyà te sako te tegsebad-sebad kandan lekat te kakay taman te adi, aw kinità din se tabò diyà te sako i Benjamin.
13Yan miglisì se kedita dan te saol dan tandà te puluk dan. Todà dan miglolan te menge sako diyà te menge asno, aw limikò dan doton te lonsod.
14Pegdateng i Juda aw menge kedowa din doton te balay i Jose, kidoen pa sikandin. Tigkan dan limongken taman te tanà.
15Minikagi si Jose, “Nengà lay mig-inang kaw te medaet seini? Wedà kaw besi ketaga-taga te mebatog ko kitaen se ininang niyo pineokit te peg-etok.”
16Timaba si Juda, “Sir, megmeno kay? Iling te wedad itaba day te inikagi nikaw. Impekità den te Timanem te benal doen salà day. Kedita day se meinang allang nikaw sipat sikandin kinitaan no te tabò.”
17Meneng minikagi si Jose, “Eked a. Eked a keibeg kenyan. Olò otaw kinitaan te tabò se inangen ko allang. Meneng mepakay aw molì se menge doma doton te amay niyo.”
18Penga niyan, migpedapag si Juda diyà ki Jose aw minikagi sikandin, “Sir, aw mepakay diyà kamno, ibeg ko mikagi a peden diyà kamno. Ikà bag egkeopal diyà kanak. Onawa te kelangkaw te selotan se kelangkaw nikaw.
19Sir, kedengan mig-insà ka diyà kenami aw doen amay day aw kedowa day.
20Timaba kay te doen amay day temoay, aw doen adi day timebaw te pegketemoay te amay day. Sikandin olò se nesamà diyà te dowa batà te inay din, so nematay se kakay din. Ontò sikandin egkedekelan te amay day te pedowan.
21Sir, timogon ka kenami te keilangan ibingen day sikandin dini kamno amon komità ka kandin.
22Minikagi kay diyà kamno te eked sikandin peketanan te amay day, so aw tomanan sikandin, matay se amay day.
23Penga niyan, minikagi ka te eked kay pekelikò dini kamno singed aw ipetaking day se kedowa day temanan adi.
24Peg-olì day doton te amay day, mig-indan kay kandin tepad te inikagi nikaw.
25“Nayan, doen aldaw minikagi se amay day te keilangan lomikò kay dini amon mayad kay te kànen.
26Meneng minikagi kay te eked iyan kepakay, so eked kay likò singed aw tomaking se adi day. Aw tomaking sikandin, yan lomikò kay.
27Penga niyan, minikagi se amay day diyà kenami, ‘Netegahan niyo,’ son din, ‘te olò dowa se batà ko timebaw diyà te esawa ko si Raquel.
28Nemetayan a den te sebad. Inimetayan besi sikandin te mebolot menenanap te kebenesan, aw wedà ko palos todà kitai.
29Aw ibingen niyo den se adi niyo aw matay sikandin, matay a heman tandà te lano ko kandin, so ontò a den temoay.’
30“Nayan Sir, aw eked taking se adi day te peg-olì day, aw komità se amay day te wedà olì, matay sikandin, so ontò dakel se pedowan din diyà te batà din sìyan. Yan pineokit kenami, matay se amay day tandà te lano din.
32Siaken heman, migsapà a diyà te amay ko te siak se megbantay te adi day amon wedad megpeeleg kandin. Minikagi a, aw eked ko keolì se adi day doton kandin, yan se salà ko kandin te wedad temanan.
33Nayan Sir, peogpai a bag dini kamno amon inangen a no allang iselilin kandin. Peolii bag sikandin sipat te menge doma kedowa din.
34Eked a olì doton te amay ko aw eked taking se adi day. Eked a keibeg komità te kegemakan domateng diyà te amay ko.”
