1Penga niyan, kimeles si Jose te amay din aw migkelag aw nengadek te bawa din.
2Penga niyan, migpunù si Jose te ipebalsamar te otaw biyasa se lawa te amay din.
3Kepatan se aldaw se pegbalsamar dan kandin, so yan se kenamay te pegbalsamar dan te lawa te nematay. Nelenowan sikandin te menge tege Ehipto te kepitowan se aldaw.
4Pegketagkas te pegkelano dan kandin, minikagi si Jose diyà te menge sineligan te selotan, “Aw doen keido niyo kanak, keliwati niyo bag se kagi ko seini diyà te selotan.
5‘Te wedà pa kematay se amay ko, migpakang a kandin te ilebeng ko se lawa din kidoen te lebenganan tapay din impetagad doton te Canaan. Yan aw mepakay diyà kamno, domoton a amon ilebeng ko, aw penga niyan molì a dini.’”
6Timaba se selotan, “Ee. Doton ka aw lebengi se amay nikaw iling te impakang no kandin.”
7Yan nesayo si Jose amon meglebeng te amay din. Tinekingan heman sikandin te kedita te opisyal te selotan, aw menge obanen egseligan te selotan, aw menge doma otaw nedengeg doton te Ehipto.
8Timaking heman se kedita te pamilya i Jose, aw menge kedowa din, aw kedita te otaw diyà te pamilya te amay din. Olò menge deitek mengisù, aw karniro, kambing, aw baka se wedà dan petekingi, meneng mig-ogpà dan doton te Gosen.
9Timaking heman ki Jose se menge otaw simakay te kelisa aw kodà. Ontò medita se otaw dimoton.
10Pegdateng dan doton te giyekanan kidoen te Atad doton dipag te Jordan, nenamay dan migkoliyà. Minoloy si Jose te amay din kidoen taman te pito se aldaw.
11Pegkità te menge tege Canaan te peg-oloy dan doton te Atad, minikagi dan, “Ontò minoloy se menge tege Ehipto.” Yan se doun te iningedanan se ogpeanan sìyan Abel Misraim (kelebadan niyan, oloyanan te tege Ehipto). Yan se neinang doton dipag te Jordan.
12Yan tinoman te menge batà i Jacob se impunù din kandan.
13Inibing dan se lawa din doton te Canaan, aw inlebeng dan iyan diyà te ilib kidoen te Makpela lenged te eglibtakan te lonsod te Mamre. Yan se ilib aw tanà bineyadan i Abraham ki Efron tege Heti amon inangen din lebenganan.
14Penga te peglebeng i Jose te amay din, minolì sikandin doton te Ehipto sipat te menge kedowa din aw kedita te doma otaw timaking kandin te peglebeng.
15Nayan, so nematay den si Jacob, migpebelaw-belaway se menge kedowa i Jose, kagi dan, “Megmeno kidon aw keopalan kidon den i Jose, aw megmalit den sikandin kenitadon tandà te medaet ininang tadon kandin?”
16Penga niyan, impekeliwat dan se kagi dan diyà ki Jose, “Te wedà pa kematay se amay tadon,
17migpunù sikandin te ikeliwat day diyà kamno se kagi din seini, ‘Pegwedadi bag se salà te menge kedowa no kedengan te peg-inang dan kamno te medaet.’ Yan, pegwedadi bag se salà ininang day menge sineligan te Timanem egpemenalen te amay tadon.” Pegdineg i Jose te kagi dan sìyan, migkelag sikandin.
18Penga niyan, dimoton se menge kedowa din kandin, aw limongken dan diyà kandin. Minikagi dan, “Dimini kay den amon inangen kay menge allang nikaw.”
19Meneng minikagi si Jose, “Ikà niyo egkelemitan kanak. Kenà ko se meg-okom kenyo, so olò Timanem se mepakay meg-okom.
20Pengkey medaet se tod niyo kanak, meneng ininang te Timanem iyan mèpiya, amon medita se otaw eked kematay te bitil, aw yan se doun te neantay kidon pa songkani.
21Ikà niyo palos egkelemitan, so siak se meg-ipat kenyo aw menge pamilya niyo.” Ontò mèpiya se kagi din kandan amon mesinalay se pedowan dan.
22Mig-ogpà dan pa doton te Ehipto, si Jose aw kedita te menge bowad-bowad te amay din. Pegkematay i Jose, sebad gatos sempolò se omay din.
23Te wedà pa sikandin kematay, nesàban sikandin te menge apò din te boel, menge apò i Efraim. Nesàban heman sikandin te menge apò din te boel, menge batà i Makir batà i Manases, aw inelopop din dan.
24Nayan, doen aldaw minikagi si Jose diyà te menge kedowa din, “Agpet den domateng se aldaw te pegkematay ko, meneng metoman kaw gayed ipaten te Timanem, aw ibingen kaw din lekat te ogpeanan seini doton te ogpeanan impakang din diyà te menge kemonaan tadon si Abraham, si Isaac, aw si Jacob.”
25Penga niyan, nemoyò si Jose te megsapà se menge doma bowad-bowad i Israel, kagi din, “Pegpakang kaw kanak te ibingen niyo se lawa ko te modi aldaw aw ipeolì kaw te Timanem doton te Canaan.”
26Yan nematay si Jose doton te Ehipto te sebad gatos sempolò se omay din. Penga niyan, impebalsamar dan se lawa din, aw insawol dan iyan diyà te longon.
