1Seini se ngadan te menge bowad-bowad te ditelo batà i Noe, si Sem, si Ham, aw si Japet, so doen menge batà dan timebaw penga te pegkelinep te tanà te wayeg.
2Se menge batà meama i Japet, yan si Gomer, si Magog, si Madai, si Jaban, si Tubal, si Mesec, aw si Tiras.
3Se menge batà i Gomer, yan si Askenas, si Rifat, aw si Togarma.
4Se menge bowad-bowad i Jaban, yan si Elisa, si Tarsis, aw menge tege Kiti aw tege Dodani.
5Sikandan se menge kemonaan te kedita te otaw eg-ogpà medapag te dagat aw doton te menge polò. Yan se menge bowad-bowad i Japet. Mig-ogpà se tegsebad-sebad pongan doton te kandan ogpeanan, aw doen heman kagi te tegsebad-sebad pongan.
6Se menge batà meama i Ham, yan si Cus, si Ehipto, si Put, aw si Canaan.
7Se menge batà meama i Cus, yan si Seba, si Habila, si Sabata, si Raama, aw si Sabaca. Se menge batà meama i Raama, yan si Saba aw si Dadan.
8Doen batà meama i Cus iningedanan ki Nimrod, aw sikandin se tagnà otaw neinang medengeg tandà te keyseg din.
9Ontò sikandin metomawan egpemanà pineokit te tabang te Timanem, aw yan se doun te eg-ikagi den se menge otaw, “Inangen ka peden te Timanem ontò metomawan egpemanà iling ki Nimrod.”
10Pegtebò te peglowan din, limowan sikandin diyà te menge lonsod te Babel, Erac, aw Acad, ditelo lonsod doton te Sinar.
11Lekat kidoen, dimoton sikandin te Asirya, aw mig-inang sikandin te menge lonsod te Niniba, Rehobot-Ir, Cala,
12aw Resen diyà te tengà-tengà te Niniba aw dakel lonsod te Cala.
13Si Ehipto se kemonaan te kedita te otaw mig-ogpà doton te Lud, Anam, Laab, Neftu,
14Fetrusim, Casluim, aw Caftor linekatan te kedita te tege Filisti.
15Se menge batà i Canaan, yan si Sidon penganay batà din, aw si Het.
16Si Canaan heman se kemonaan te menge pongan te otaw iningedanan Jebusi, Amori, Girgasi,
17Hebi, Arki, Sinai,
18Arvadi, Semari, aw Hamati. Neteped se tegsebad-sebad pongan te menge bowad-bowad i Canaan
19lamig nesakop dan se kebelad te tanà lekat te lonsod te Sidon taman te lonsod te Gerara medapag te Gasa, aw nesakop heman se menge lonsod te Sodoma, Gomora, Adma, aw Seboim medapag te Lasa.
20Yan se menge bowad-bowad i Ham. Mig-ogpà se tegsebad-sebad pongan dan doton te kandan ogpeanan, aw doen heman kagi te tegsebad-sebad pongan.
21Si Sem kakay i Japet, yan se kemonaan te kedita te otaw nesakop te pongan iningedanan Hebreo.
22Se menge batà i Sem, yan si Elam, si Asur, si Arfacsad, si Lud, aw si Aram, aw yan heman se ngadan te menge bowad-bowad dan.
23Se menge batà i Aram, yan si Us, si Hul, si Geter, aw si Mes.
24Si Arfacsad se amay i Sela, aw si Sela se amay i Eber.
25Dowa se batà i Eber. Iningedanan se kakay ki Peleg (kelebadan niyan, netani), so pegtebaw din, netani-tani se kedita te otaw dini lanto te tanà. Iningedanan se adi din ki Joctan.
26Si Joctan se kemonaan te menge pongan iningedanan Almodad, Selap, Hasarmabet, Jera,
27Hadoram, Usal, Dicla,
28Obal, Abimael, Seba,
29Opir, Habila, aw Jobab. Menge batà i Joctan se kedita dan.
30Mig-ogpà se menge pongan dan doton te tanà lekat te Mesa taman te Separ kidoen te bontod lenged te eglibtakan te aldaw.
31Yan se menge bowad-bowad i Sem. Mig-ogpà se tegsebad-sebad pongan dan doton te kandan ogpeanan, aw doen heman kagi te tegsebad-sebad pongan.
32Menge bowad-bowad i Noe se kedita niyan, aw doen pongan aw pamilya te tegsebad-sebad kandan. Penga te pegkelinep te tanà te wayeg, se kedita te otaw diyà te tegsebad-sebad pongan te keneyonan, yan se menge bowad-bowad te menge batà i Noe.
