1Nayan, dimeleg si Jacob lamig dimateng sikandin doton te tanà inogpaan te menge otaw lenged te eglibtakan.
2Dimateng sikandin doton te balon te wayeg binengbangan kidoen mediyò te lonsod. Kinità din se telo ebong te menge karniro minibat medapag te balon. Netipon se karniro so eg-inem dan kidoen. Mebelad se bato insampeng diyà te balon sìyan.
3Aw egketipon se kedita te karniro kidoen, egkeliden te menge telediyaga se bato lekat te awang te balon, aw egsalok dan te wayeg inemen te karniro. Penga niyan, todà dan iyan egsempengan te bato.
4Mig-insà si Jacob te menge telediyaga, “Elew, kenan kaw lay lekat?” Timaba dan, “Lekat kay te Haran.”
5Mig-insà si Jacob, “Kinilala niyo lay si Laban apò i Nahor?” Timaba dan, “Ee. Kinilala day sikandin.”
6Mig-insà heman si Jacob, “Mèpiya lay se pegkesawol din?” Timaba dan, “Mèpiya man. Na, doton sida se batà din bayi si Raquel nengibing te menge karniro din dini.”
7Minikagi si Jacob, “Melangkaw pa se aldaw. Wedà pa dateng se oras te pegpeawop te menge karniro doton te kelokob. Mèpiya aw ipeinem niyo dan aw todà niyo dan ipeloyaw.”
8Timaba dan, “Meneng eked day peinemi se menge karniro singed aw metipon se kedita dan. Penga niyan, mengelid kay te bato lekat te awang te balon, aw ipeinem day se menge karniro.”
9Telobo pa minikagi si Jacob diyà kandan, dimateng si Raquel nengibing te karniro te amay din, so sikandin se migdiyaga kenyan.
10Pegkità i Jacob ki Raquel nengibing te menge karniro te emayen din si Laban, dimoton sikandin te balon, aw nengelid sikandin te bato insampeng kenyan, aw simalok sikandin te wayeg inemen te karniro te emayen din.
11Penga niyan, nengadek si Jacob ki Raquel, aw migkelag sikandin tandà te keluba din.
12Minikagi sikandin diyà ki Raquel, “Anak a te amay nikaw, so etebay din si Rebecca se inay ko.” Penga niyan, kimagnan si Raquel minolì aw mig-indan sikandin te amay din.
13Pegketaga-taga i Laban te dimateng se anak din si Jacob, ayas sikandin simongon kandin. Kinelesan sikandin i Laban, aw inedekan din, aw inibing din doton te balay din. Pegdateng dan kidoen, mig-indan si Jacob diyà kandin tepad te kedita neinang diyà kandin.
14Penga niyan, minikagi si Laban, “Ontò ka anak ko.” Penga niyan, mig-ogpà si Jacob kidoen te sebad se bolan.
15Nayan, minikagi si Laban diyà ki Jacob, “Pengkey anak ko sikona, meneng eked kepakay aw megterbaho ka diyà kanak aw wedad itandan ko kamno. Na, ikegihi a aw eden se itandan ko kamno.”
16Dowa se batà laga i Laban. Si Lea se kakay, aw si Raquel se adi din.
17Mèpiya tengtengen se mata i Lea, meneng ontò beling mèpiya se bawa i Raquel egtengtengen.
18Ontò dakel se pedowan i Jacob diyà ki Raquel, aw yan minikagi sikandin, “Aw mepakay pengognanen ko si Raquel, megterbaho a dini kamno te pito se omay.”
19Minikagi si Laban, “Mèpiya aw sikona se ipepengognan ko diyà kandin, so sikona se labi mèpiya diyà te menge doma otaw mengognan peden kandin. Na, pegterbaho ka den diyà kanak.”
20Penga niyan, migterbaho si Jacob te pito se omay amon pengognanen din si Raquel, meneng diyà te aneng-aneng i Jacob, iling te pilabok olò se aldaw sìyan so dakel se pedowan din diyà ki Raquel.
21Penga niyan, minikagi si Jacob diyà ki Laban, “Netagkas den se pito se omay. Peipidi den se batà no diyà kanak.”
22Yan migpeinang si Laban te dakel kànen, aw impetanod din se kedita te otaw mig-ogpà kidoen.
23Meneng pegkedelem niyan, si Lea beling se impeipid i Laban diyà ki Jacob, aw yan se lineyokan i Jacob.
24Imbegay i Laban se allang din bayi si Zilfa diyà ki Lea amon megtelaban kandin.
25Pegkeiselem niyan, kinità i Jacob te si Lea se impeipid i Laban diyà kandin, aw yan mig-insà sikandin diyà ki Laban, “Nengà lay mig-inang ka te medaet diyà kanak? Si Raquel se impakang no diyà kanak tepad te terbaho ko. Nengà lay mig-akal ka kanak?”
26Timaba si Laban, “Doen ketanem day dini te eked kepakay aw ipepengognan se adi laga singed aw onà ipepengognan se kakay din laga.
27Pegtagad ka den te sebad simana lamig mepenga se peipid no ki Lea. Penga niyan, aw megterbaho ka diyà kanak te pito mendad se omay, ibegay ko heman kamno se adi din si Raquel.”
28Yan se ininang i Jacob. Penga te sebad simana te peipid sìyan, imbegay heman i Laban se batà din si Raquel diyà ki Jacob amon meinang heman esawa din.
29Imbegay heman i Laban se allang din bayi si Bilha diyà ki Raquel amon megtelaban kandin.
30Limayok heman si Jacob diyà ki Raquel. Deitek se pedowan i Jacob diyà ki Lea, meneng dakel se pedowan din diyà ki Raquel. Penga niyan, migterbaho si Jacob diyà ki Laban te pito mendad se omay.
31Pegketaga-taga te Timanem te deitek se pedowan i Jacob diyà ki Lea, impebatà din si Lea. Meneng wedà beling peglaman si Raquel.
32Miglaman si Lea aw tinebawan sikandin te batà meama. Iningedanan din se batà din ki Ruben (kelebadan niyan, kinità se kelimahan), so minikagi sikandin, “Kinità te Timanem se kelimahan ko. Kedekelan a den besi te esawa ko te pedowan.”
33Todà sikandin miglaman, aw tinebawan heman sikandin te batà meama. Minikagi sikandin, “Binegayan a heman te Timanem te batà seini, so dinineg din te deitek se pedowan te esawa ko diyà kanak.” Yan iningedanan din se batà din ki Simeon (kelebadan niyan, egdineg).
34Todà miglaman si Lea, aw tinebawan heman sikandin te batà meama. Penga niyan, minikagi sikandin, “Kedekelan a den besi te pedowan te esawa ko, so tinebawan a den te telo batà din meama.” Yan iningedanan din se batà din ki Levi (kelebadan niyan, kedekelan).
35Todà miglaman si Lea, aw tinebawan heman sikandin te batà meama. Penga niyan, minikagi sikandin, “Iduyun ko den se Timanem.” Yan iningedanan din se batà din ki Juda (kelebadan niyan, pegduyun). Penga niyan, wedà den sikandin todà pegbatà.
