1Nayan, penga te dowa se omay, migtegeinep heman se selotan. Timindeg sikandin doton te kilid te dakel wayeg iningedanan Nilo.
2Tigkan din kinità se pito baka ontò melambò aw mèpiya se bawa. Minanggin dan lekat te wayeg, aw kimaen dan te sagbet doton te kilid niyan.
3Tigkan din heman kinità se doma pito baka minanggin lekat te wayeg, meneng ontò dan megasà aw medaet se bawa. Dimoton dan te doma pito baka timindeg kidoen te kilid te wayeg.
4Se menge baka megasà, yan se kimaen te menge baka melambò. Penga niyan, neloka se selotan.
5Todà timedogi se selotan aw todà sikandin migtegeinep. Kinità din se sebad ponò te trigo doen pito oway ontò melambò aw mèpiya se bawa.
6Penga niyan, timilles se doma pito oway nekoped aw kimipes te emiyan.
7Se oway nekoped, yan se nengame te oway melambò. Penga niyan, neloka se selotan aw netaga-taga sikandin te tegeinep din olò iyan.
8Pegkeiselem niyan, netetana se pedowan te selotan. Yan impeangay din se kedita te otaw biyasa egselemangka aw menge doma otaw biyasa doton te Ehipto. Mig-indan sikandin diyà kandan tepad te tegeinep din, meneng wedad palos nekeindan kandin aw eden se kedegdagan niyan.
9Penga niyan, minikagi se otaw egpengibing te bino, “Keilangan meg-indan a den seini tepad te salà ko.
10Kedengan neopalan kay nikaw sìyan otaw mig-inang te pan, aw impekeleboso kay nikaw doton te balay te kapitan te menge sondalo.
11Doen sebad delem, migtegeinep kay, meneng kenà onawa se kedegdagan te tegeinep day.
12Doen Hebreo kidoen, telaki pa, sineligan te kapitan te menge sondalo. Mig-indan kay diyà kandin tepad te tegeinep day, aw in-indan din kenami se kedegdagan niyan.
13Netoman se kedita te inikagi din, so todà a no impelikò doton te tapay terbaho ko, aw impeimatay no se otaw mig-inang te pan.”
14Yan impeangay te selotan si Jose, aw ayas sikandin impelowà lekat te keleboso. Migpegopit sikandin, aw mig-ekas, aw dimoton te selotan.
15Minikagi se selotan diyà ki Jose, “Migtegeinep a, aw wedad otaw nekeindan kanak aw eden se kedegdagan niyan. Inindanan a te biyasa ka eg-indan aw eden se kedegdagan te tegeinep aw iindan iyan diyà kamno.”
16Timaba si Jose, “Kenà lekat kanak se kebiyasa, meneng Timanem olò se megpetaga-taga kamno te mèpiya kedegdagan niyan.”
17Minikagi se selotan, “Pegtegeinep ko, timindeg a doton te kilid te wayeg te Nilo.
18Tigkan ko kinità se pito baka ontò melambò aw mèpiya se bawa. Minanggin dan lekat te wayeg, aw kimaen dan te sagbet doton te kilid niyan.
19Tigkan ko heman kinità se doma pito baka minanggin lekat te wayeg, meneng ontò dan megasà aw medaet se bawa. Wedad palos baka kinità ko dini te Ehipto labi pa megasà.
20Penga niyan, se menge baka megasà, yan se kimaen te menge baka melambò.
21Meneng pengkey kimaen dan te baka melambò, iling te wedad kinaen dan so kunù pa se kegasà dan. Penga niyan, neloka a.
22“Todà a migtegeinep, aw kinità ko se sebad ponò te trigo doen pito oway ontò melambò aw mèpiya se bawa.
23Penga niyan, timilles se doma pito oway nekoped aw kimipes te emiyan.
24Se oway nekoped, yan se nengame te oway melambò. Yan se tegeinep in-indan ko diyà te menge otaw biyasa egselemangka, meneng wedad palos nekeindan kanak aw eden se kedegdagan niyan.”
25Minikagi si Jose diyà te selotan, “Sir, olò sebad se kedegdagan te didowa tegeinep nikaw. Impetaga-taga te Timanem diyà kamno aw eden se inangen din.
26Se pito baka melambò, yan se pito se omay. Se pito oway te trigo, yan heman se pito se omay. Olò sebad se kedegdagan te didowa tegeinep nikaw.
27Se pito baka megasà nekemodi, aw sìyan pito oway nekoped aw kimipes te emiyan, yan se pito se omay te bitil.
28Ontò benal se inikagi ko gina. Impetaga-taga te Timanem diyà kamno aw eden se inangen din.
29Domateng den se pito se omay te ontò dakel se geniyen dini te kebelad te Ehipto.
30Penga te pito se omay mèpiya, domateng se pito se omay te bayil, aw yan se mekebaet te kedita dini te Ehipto igsà kelibelan se pito se omay doen dakel geniyen.
31Ontò kelibelan se omay te beyang-beyang tandà te kedaet te bayil domateng te modi aldaw.
32Mekedowa ka pegtegeinep amon ketegahan no te yan se metoman inangen te Timanem, aw tomanen din iyan te eked kenamay.
33“Nayan, mèpiya aw pemellien no se otaw ontò biyasa, aw inangen no sikandin keseligan dini te Ehipto.
34Mèpiya heman aw pemellien no se menge doma opisyal doton te tegsebad-sebad ogpeanan amon ebaten dan se tengà te lima diyà te kedakel te trigo geniyen dalem te pito se omay doen dakel geniyen.
35Sogò ka kandan te keilangan imonen dan se kànen dalem te menge omay doen dakel geniyen amon itagò iyan doton te tegsebad-sebad lonsod aw bentayan iyan.
36Se itagò, yan se kànen te menge otaw aw domateng se pito se omay te bitil dini te Ehipto, amon eked kematay se otaw te bitil.”
37Nayan, ontò neluba se selotan aw menge doma opisyal tepad te inikagi i Jose.
38Minikagi se selotan diyà kandan, “Wedad doma otaw ketelaan tadon labi pa mèpiya ki Jose, so egdomaan sikandin te Timanem.”
39Minikagi se selotan diyà ki Jose, “So sikona se pinetega-tegahan te Timanem te kedita niyan, wedad palos otaw labi pa biyasa diyà kamno.
40Inangen ta den melangkaw diyà te gobirno. Pengkey eden se isogò nikaw, yan se keilangan toloen te kedita te otaw. Olò siaken se labi pa melangkaw diyà kamno, so siak se selotan.”
41Minikagi heman se selotan diyà ki Jose, “Inangen ta den gobirnador dini te kebelad te Ehipto.”
42Penga niyan, inabat te selotan se peningsing din, sìyan pengilala te peglowan din, aw imbegay din iyan ki Jose. Impesaol din te sapot ontò meelagà, aw impepeninga din te bolawan.
43Impesakay din heman diyà te kelisa eggemiten te ontò melangkaw sineligan din, aw doen otaw insogò din doton te peselowan i Jose amon tomawal dan, “Peselangi niyo! Peokiti niyo!” Yan se peg-inang ki Jose gobirnador doton te kebelad te Ehipto.
44Minikagi heman se selotan diyà ki Jose, “Pengkey siak se selotan, meneng wedad palos mepakay inangen dini te kebelad te Ehipto singed aw mepakay iyan diyà kamno.”
45Sinelilinan te selotan se ngadan i Jose so iningedanan din sikandin ki Sapenat Panea. Pineipidan din ki Asenat, batà i Potiferas. Si Potiferas se egpengibing te menge otaw migsimba te aldaw doton te lonsod te On. Yan ininang si Jose melangkaw doton te kebelad te Ehipto.
46Peg-inang ki Jose opisyal te selotan te Ehipto, ketlowan se omay din. Nesayo sikandin lekat te balay te selotan, aw timeped sikandin te kedita te ogpeanan doton te kebelad te Ehipto.
47Dalem te pito se omay mèpiya, dakel se ginani kidoen.
48Impeimon i Jose se talad te trigo ginani aw impetagò din iyan doton te menge lonsod. Doen intagò doton te tegsebad-sebad lonsod lekat te kedepagan niyan.
49Se kedakel te trigo intagò, yan se iling te kedakel te enay doton te dagat, so ontò iyan dakel. Yan se doun te impelengà i Jose se pegbilang kenyan so ontò iyan dakel.
50Te wedà pa dateng se bitil, dowa se batà i Jose timebaw diyà ki Asenat.
51Iningedanan din se kakay ki Manases (kelebadan niyan, nelibelan), so minikagi si Jose, “Tinebangan a te Timanem aw yan nelibelan ko den se kedakel te kelimahan ko aw tepad te dela ko te amay aw menge gaked ko.”
52Iningedanan din se adi ki Efraim (kelebadan niyan, migmengisù), so minikagi si Jose, “Tinebangan a te Timanem aw yan migmengisù a den dini te tanà te kelimahan ko.”
53Minokit se pito se omay dakel se ginani te tege Ehipto.
54Penga niyan, dimateng se pito se omay te bitil, iling te tapay inikagi i Jose. Nebitilan se menge otaw doton te kedita te doma ogpeanan, meneng doen beling kànen doton te kebelad te Ehipto.
55Pegkeballos te menge tege Ehipto, nemoyò dan te kànen diyà te selotan. Meneng minikagi sikandin, “Doton kaw ki Jose aw tolò kaw te ipunù din kenyo.”
56Neinang labi pa medaet se bayil igsà nebitilan se kedita te tege Ehipto. Penga niyan, impeowang i Jose se kedita te pol tinegoan te trigo, aw impebeligyà din iyan diyà te menge tege Ehipto.
57Medita heman se otaw dimoton te Ehipto lekat te menge doma ogpeanan amon mayad dan te trigo diyà ki Jose, so medaet se bitil doton te kebelad te keneyonan.
