Text copied!
CopyCompare
परमप्रभु यावे आ लोव़ - इजीकीएल

इजीकीएल 47

Help us?
Click on verse(s) to share them!
1मिनु नोले मेकोमी आं कली परमप्रभु यावे आ खिं आ ओव़तीक लाप्‍चोम लेश्‍शा चाक्‍ती। मिनु गो मेको लाप्‍चो आ थेंका रे ब्‍वाक्‍कु यिशा, पूर्ब गे शाइश्‍शो ताता। मारदे हना मेको परमप्रभु यावे आ खिं पूर्ब गे कोव़शो बाक्‍त। मिनु मेको ब्‍वाक्‍कु परमप्रभु यावे आ खिं आ दक्‍खिन चढ़ेतीक आ दक्‍खिन रे शाइश्‍शो बाक्‍त। उत्‍पत्ती २:१०-१४; योएल ४:१८; प्रकाश २२:१
2नोले मेकोमी आं कली उत्तर गे ङा ठेयब लाप्‍चो रे पा लाङगा ग्रुंइताक्‍यी। मिनु पूर्ब गे लेश्‍शो लाङगा ङा लाप्‍चो रे पा हिरशा चाक्‍ती। मेको ब्‍वाक्‍कु दक्‍खिन गे शाइश्‍शो बाक्‍त।
3मिनु मेको पुक्‍तीक डोरी का शेशा पूर्ब गे लत। मिनु मेकोम हजार का कुबीत पुक्‍तु। मिनु नोले मेकोमी आं कली ब्‍वाक्‍कु शोक्‍‍पाइक्‍ती। मेको ब्‍वाक्‍कु दिम्‍ला सम्‍म जाक्‍शो बाक्‍त। कुबीत का ०.५ मिटर बाक्‍ब। इजीकीएल ४०:३
4मिनु लेंशा अर्को हजार का कुबीत पुक्‍तु। मिनु मेको ब्‍वाक्‍कुम शोक्‍‍पाइक्‍ती। मेको ब्‍वाक्‍कु पोक्‍च सम्‍म जाक्‍शो बाक्‍त। मिनु मेकोम लेंशा अर्को हजार का कुबीत पुक्‍तु। मिनु मेकोमी आं कली मेको ब्‍वाक्‍कुम शोक्‍‍पाइक्‍ती। मेको ब्‍वाक्‍कु क्रातो सम्‍म जाक्‍शो बाक्‍त।
5मिनु मेकोम लेंशा अर्को हजार का कुबीत पुक्‍तु। मिनु गो मेको खोला शोक्‍ने मचबु। मारदे हना ब्‍वाक्‍कु बारशो बाक्‍त। मेको दोम्‍ली ग्‍यारचा ङा दुम्‍शो बाक्‍त हना यो, शोक्‍ने मचाप्‍चा ङा बाक्‍त।
6मिनु मेकोम आं कली “ए मुर, गे एको तवी” देंत। मिनु लेंशा खोला आ नेक्‍था लेप्‍पाइक्‍ती।
7मिनु गो मेकेर जाक्‍ङानु, मेको समुन्‍द्र आ ओंथ हांबु नु आइक्‍ची हांबु नेल्‍ल शुश रवा तातामी।
8मिनु मेकोम आं कली “एको ब्‍वाक्‍कु पूर्ब रागी गे लशा, उइ अराबाह गे लशो बाक्‍ब। मिनु मेको हिक्‍सी समुन्‍द्रम ब्‍वांइसीब। मिनु मेकेर ङा ब्‍वाक्‍कु रिम्‍शो दुम्‍ब।
9मेको ब्‍वाक्‍कु शाइक्‍तीकेमी शुश खाल ङा जन्‍तु बाक्‍नीम। मेकेर हिक्‍ने मचाप्‍चा ङा पा, ङांइ बाक्‍नीम। मारदे हना मेको ब्‍वाक्‍कु मेकेर जाक्‍दीश्‍शो बाक्‍ब। मेको ब्‍वाक्‍कु रिम्‍शो दुम्‍तीके मेकेर मारेइ मारेइ ब्रोंइनीम। प्रस्‍थान १५:२३
10मेको आ एर ओंथ नेल्‍लेम ग्‍याइल आप्‍बपुकी राप्‍नीम। एन-गेदी रे एन-एग्‍लै सम्‍म ग्‍याइल आप्‍तीक दुम्‍नीम। मेकेर ठेयब समुन्‍द्र खोदेंशो पा शुश खाल ङा ङांइ बाक्‍नीम।
11तन्‍न मेको समुन्‍द्र आ सिम नु हिलो बाक्‍तीके ङा ब्‍वाक्‍कु रिम्‍शो मदुम्‍ब। मेको हिक्‍सी ग्रुंइचा कली बाक्‍नीम।
12मेको समुन्‍द्र आ एर ओंथ नेल्‍ल शुश खाल ङा फल फुल रवा वानीम। मेको आन सफा मसोव़नीम। मेको आन फल गेनायो मनुप्‍नीम। मेको महिना महिनाम सित्‍नीम। मारदे हना मेको आन कली माल्‍शो ब्‍वाक्‍कु परमप्रभु यावे आ बाक्‍तीक रे लशो बाक्‍ब। मेको आन फल रूचा कली नु मेको आन सफा सापाइक्‍चा कली दुम्‍नीम” देंत। यसैया ३२:१५; प्रकाश २२:२
13मिनु परमप्रभु, परमप्रभु यावेमी “इस्राएल ङा सांद आगा ङा १२ थर आन थेरशो रू दोपा योक्‍चा माल्‍नीनी देंशा हना, योसेफ कली भाग निक्‍शी गेचा माल्‍नीनी। उत्‍पत्ती ४८:५; यहोसु १७:१७
14मेको लीशो रागी इन दातेम उइक्‍थ उइक्‍थ पा योक्‍चा माल्‍नीनी। मिनु गो इन किकी पिपी आन कली गेनुङ, दे कसम जतीके मेको रागी इन शोंप दुम्‍ब। उत्‍पत्ती १२:७
15मेको रागी आ सांद ते बाक्‍चा माल्‍नीम देंशा हना, उत्तर गे ङा सांद ठेयब समुन्‍द्र रे हेथ्‍लोन ङा लां, लेबो-हमाथ रे सेदाद सम्‍म दुम्‍चा माल्‍‍ब। गन्‍ती ३४:२-१२
16मेको सांद बेरोथाह नु सिब्रैम सम्‍म दुम्‍चा माल्‍‍ब। मेको दमस्‍कस नु हमाथ आस दातेम बाक्‍शो बाक्‍नीस। मेको सांद हासेर-हात्‍तीकोन सम्‍म जाक्‍दीप्‍ब। मेको हौरान ङा सांद आ नेक्‍था बाक्‍ब।
17मिनु ठेयब समुन्‍द्र रे हासर-एनोन सम्‍म बाक्‍ब। मेको दमस्‍कस आ उत्तर गे बाक्‍ब। मेको आ उत्तर गे हमाथ आ सांद बाक्‍ब। मेको उत्तर ङा सांद बाक्‍ब।
18पूर्ब गे ङा सांद हौरान नु दमस्‍कस आस दातेम, यर्दन खोला आ नेक्‍था गिलाद नु इस्राएल रागी आस दातेमी बाक्‍ब। मेको पूर्ब ङा समुन्‍द्र नु तामार सम्‍म बाक्‍ब। मेको पूर्ब ङा सांद बाक्‍ब।

19दक्‍खिन गे ङा सांद तामार रे मेरीबाथ-कादेश ङा ब्‍वाक्‍कु बाक्‍तीके सम्‍म दुम्‍चा माल्‍‍ब। मिनु मेकेर रे इजीप्‍त ङा खोल्‍सा रे ठेयब समुन्‍द्र सम्‍म जाक्‍दीप्‍ब। मेको दक्‍खिन ङा सांद बाक्‍ब। गन्‍ती २०:१३; गन्‍ती ३४:५
20पच्‍छिम गे ङा सांद ठेयब समुन्‍द्र लेबो-हमाथ आ ङोंइती सम्‍म दुम्‍चा माल्‍ब। मेको पच्‍छिम ङा सांद बाक्‍ब।
21गे मेको रागी इन दातेम इस्राएल आ थर ङा मुर आन कली योक्‍शा गेचा माल्‍नीनी।
22गेपुकीम आंम इन थेरशो रू वोइक्‍चा माल्‍नीनी। इन दातेमी बाक्‍ब तमी तौ थिशो अर्को रागी ङा मुर आन कली यो आन भाग योक्‍शा, गेचा माल्‍नीनी। गेपुकीम मेको आन कली इस्राएल रागीम जरमेशो आंम रागी ङा मुर खोदेंशो मिम्‍चा माल्‍नीनी। मिनु गेपुकी नु इस्राएल आ थर आन दातेम मेकोपुकीम आन थेरशो रू तचा माल्‍नीम। लेवी १९:३३-३४
23मेको अर्को रागी ङा मुरपुकी तेको थर ङा बाक्‍तीकेम बाक्‍नीमी, मेकेर मेको आन कली आन थेरशो रू गेचा माल्‍नीनी” दे परमप्रभु, परमप्रभु यावेम देंत।