ESAII 43:5-11

⁵Di bɑ́ nyĩɛ̃̀kù n di bonɛ̀mu, n yóó tɔnímu di yɑɑ̀bí ìì bo diyiè yìɛ̀ní kɛ̀ɛ̀ bíɛ́kɛ̀, kɛ tíínní diyiè tɑɑ̀ kɛ̀ɛ̀ bíɛ́kɛ̀ kɔbɛ.

⁶M bo nɑ́kɛ́ kubɑkù yoú bíɛ́kɛ̀ kɔbɛ kɛ dɔ̀: Tɛ̃́nnɛ́nɛ̀ní bɛ! Kɛ́nɑ́kɛ́ kucɑ̃̀nku bíɛ́kɛ̀ kɔbɛ kɛ dɔ̀: Fĩ́ĩnnɛ̀nní bɛ! Tɛ̃́nnɛ́nɛ̀ní n nitidɑbí ìì bo di bíɛ́kɛ̀. N nitipobí ìì bo kutemmɑ̀nku kɛ̀ ìì konní.

⁷Bɛ̀ɛ̀ kó dimɑ̀ɑ̀ tɔ n yètìrì, n dɔ̀ɔ̀ bɛ̀, míì bɛ̀ ɑ̃nnɛ́, míì bɛ̀ pìítɛ́ kɛ̀ bɛ̀ bo bɛnkɛ n kpetì.

⁸Kɛ̀ Kuyie mbɛ́i nkɛ dɔ̀: Dennɛnɛ̀ní tiyũ̀ɔ̃̀ntì, tì mɔ̀kɛmu inuɔ, nti mɛ nyí wúó. Dennɛnɛ̀ní yɛwũ̀ɔ̃̀, bɛ̀ mɔ̀kɛ yɛto bɛ̀ mɛ nyí yo.

⁹Yɛbotɛ̀ yɛmɔu kɔbɛ tíínnɛ̀nní, kɛ̀ ibotí imɔu kɔbɛɛ wɛ̃nnɛ́. Di kó sitenkɑɑnìi miɛkɛ, ɔ̃̀ntɛ pɑ̃ɑ̃́ kɛ nɑ̀kɛ́ tìì mɛ̀ ndɔ̀ɔ̀? Ɔ̃̀ntɛ do niitɛ́ kɛ́ tì nɑ̀kɛ́? Tɛ̀ɛ̀ nɑ̀kɛ́ tɛ̀ do tì nɑ̀ɑ́ nkɛ̀ bɛ̀ɛ̀ bo, kɛ̀ bɛ̀ɛ kónnɛ́ tɛ̀ do tú mù, kɛ̀ ti nɛ́ yie nkɛ dɔ̀ tì tu timɔ́mmɔnti.

¹⁰Díndi Isidɑyɛɛribɛ díì nɑ̀ɑ́ n kpɛ́í mí ndi Yiɛ̀ nKuyie, díì tu n kó bɛtɔ̃mbɛ̀ n tɑ̃ɑ̃tɛ́ bɛ̀, n dɔ́ tì tu di bo bɑntɛ́mɛ̀, kɛ́yie, nkɛ́yĩ́ɛ̃́tɛ́ míì tumɛ̀ Kuyie, kɛ̀ dɛ̀ í tú mí Kuyie ntɛkù mɑkù í bo, kùmɑkù í buotɛ́, kùmɑkù mɛ nyí yóó buotɛ́.

¹¹Mí nKuyie mmíì tu di Yiɛ̀ nKuyie m mɑ́ɑ̀, n kó difɔ̃nkúò odɛɛtíwè tɔù mɔù í bo.