Aisea 43:5-11

⁵Ke mi lopu matagutu, ura Arau korapa koa turaṉigo; kote turaṉa maeni Rau sari mua koburu pa kali gasa rimata meke varigara pule ni pa kali lodu rimata.

⁶Kote zama si Rau koari pa kali gede, ‘Va vura mae i!’ meke koari pa kali matao, ‘Lopu tuqe puleni,’ gua. Turaṉa mae ni sari tuqu koreo pa seu, meke sari tuqu vineki pa vina betona sa popoa pepeso,

⁷doduru pu ta pozae na tie te Zihova si arini, arini pu taveti Arau pude na vinahesiqu, arini pu va podaki Arau meke va evaṉi.”

⁸Turaṉa vurani sarini pu koa matadia ba behu, pu koa taliṉadia ba nuli.

⁹Varigara mae ni sari doduru butubutu, meke madi koa pa keke vasina sari tie. Esei koari dia beku na korotae ni si hire meke tozi va kenue nia gua sapu kote ta evaṉa vugo? Va mae i sari dia tie va sosode pude tozia sapu toṉoto dia, sapu gua, pude boka avosia ri kaiqa meke zama, “Uve, hinokara dia.”

¹⁰Zama vura se Zihova, “Gamu sari Qua tie va sosode, Gua na qua nabulu si gamu sapu vizatia Rau, pude mi gilana Au meke va hinokara Au, pude mi gilania sapu Arau mo telequ sa Tamasa. Pa kenuqu si loke Tamasa si koa, meke lopu kote koa tugo si keke pa mudiqu.

¹¹Arau, uve Arau, mo se Zihova, meke loketoṉa pule sa Hinarupu ba Arau mo.